Titus 2

Man Ik Ronduⱡ

Wote, nim ndi molkᵾn kᵾn, wamp mbᵾ ik ronduⱡ mat, tᵾn ndi, mbo rundᵾrmᵾn nimbᵾ nga puⱡ petᵾm mbila, kun mbo rundi. Wu mam ronduⱡ na mbᵾ kundkᵾn, nu nok kekilip rui narᵾk, enim nga numan orunga rᵾp mint etᵾk, numan tenda ei piyangga. Wote, i etᵾk molk kᵾn, en enim nga mondpa pili orunga, wamp numan ngui uⱡ ei kᵾn, wote enim nga mbun kandᵾk tinmᵾn uⱡ mbila, ronduⱡ mundᵾk muⱡing uⱡ ei, kun mba piyangga! Ei mel ku, amp wenda ronduⱡ na mbᵾ kundkᵾn, amp ingk kun kai mbᵾ muⱡeing ni, nu nok kekilip rui narᵾk, wote wamp ti nga ik mbuldung orunga nindi uⱡ ei nga iti natᵾk, uⱡ kai mbᵾ nga mint pep rok iteing ni. I eng uⱡ ei ndi, amp wendᵾp mbᵾ, mbo rundangina, en enim nga wamᵾl na, kangambuⱡa na mbᵾ, numan ngᵾk, numan tenda pilik, kun kai molk, wote mang kona kongun mbᵾ nga mura muⱡangga, wamᵾl nga mana orunga mint molk, ik teng nduk iteing. I etᵾk tangina kᵾn, wamp tenda na ti ndi, Got nga rᵾnang ik ei nᵾk, kit mundi nᵾmᵾndeing.

Uⱡ ei mel ku, kang wu mbᵾ, en enim nga numan orunga rᵾp etᵾk, muⱡeing nᵾkᵾn man ngui! Nim ninim uⱡ mbila pora, mura mondkᵾn, ninim wamp mbᵾ, ik mbo rondrᵾn ei mel, pep rokᵾn etkᵾn kuimp tiyana! Wote, wamp mbᵾ ndi, nim nga in uⱡ mbᵾ kandᵾk pep reing. Ik kupa ei, ronduⱡ mundkᵾn, mbo endᵾnt nᵾkᵾn iti! Ik mong ronduⱡ mbᵾ, ekit tᵾkᵾn nana kᵾn, ik mbuldung orunga nᵾndᵾtmᵾn wamp mbᵾ, nᵾkᵾn pipil kundana, wote tᵾn nᵾk kit mundi nᵾmᵾndeing.

Wote, kongun kindmant wu mbᵾ kundkᵾn, en enim nga wu nuim mbᵾ nga ik teng nduk, uⱡ namba uⱡ eng mbᵾ etᵾk, wu nuim mbᵾ nga numan orunga etᵾk, wang nduk, ik pundma rui narᵾk, kindᵾp nui nandᵾk, kongun kindmant wu mbᵾ, en enim ora nduk, en enim molk kai mondᵾk, numan tenda pendᵾk muⱡeing. Wote, i eng uⱡ ei ndi, Got ei, tᵾn nga Etpa Ti Wu ei nga ik mbo rondrum kᵾⱡ, omba muⱡ piyangga. 11 Got elim nga wamp poⱡ tᵾpa, wote etpa rukᵾr tᵾtᵾm uⱡ ei, unt wamp mbᵾ kᵾn etpa mot ndurum. 12 Tᵾn pᵾtmᵾn ni, wamp poⱡ titim uⱡ ei ndi, tᵾn ora ndupa, Got tᵾpa mbuⱡ ngui uⱡ kit mbᵾ kᵾn, wote mᵾi kona ila uⱡ mbᵾ, ou ndupᵾn pep rop enmin ei uⱡ mbᵾ, akup ui monmᵾn ila wak ropᵾn, numan kai mbᵾ yant tᵾpᵾn, numan orunga ronduⱡ mundpᵾn, Got nga nombuⱡa kun tetᵾm ila pᵾmᵾn. 13 I etᵾp moⱡpᵾn kᵾn, Got nga memp pinditim Ui ei, nokundpᵾn muⱡᵾmin. Wote ei kᵾn, tᵾn nga Nuim Got, wote wamp Etpa Ti Wu Kraist Jisas rᵾpndi rᵾⱡang eng nui pol ila moⱡpa, wangga mon mba ei, wote ui tila mot nimba. 14 Elim ndi, elim wak ropa, tᵾn uⱡ kit mbila etpa tᵾpa, wote wamp eng nui kᵾⱡ mundrum. Ei nga, tᵾn akup wamp elim nga mendpᵾⱡ kᵾⱡ moⱡpᵾn kᵾn, uⱡ kai mbᵾ itmin ei nga, numan pendᵾp muⱡᵾmin. 15 Rᵾk rᵾk ya ik mong kᵾⱡ nᵾkᵾn, wamp mbᵾ etᵾk ronduⱡ mundkᵾn, mbo rondkᵾn, man ngokᵾn iti! Wote, nim kang wu kokila ti nᵾk, nim tᵾk mana ndui nᵾndeing, mon!

Copyright information for `MED