Titus 3

Uⱡ Kai Mbila Ronduⱡ Mondpᵾn Muⱡᵾmᵾn

Nim ndi wamp mbᵾ, aldpa man ngukᵾn, en enim nga gapman ei kᵾn, gapman nga wu nuim mbᵾ nga ronduⱡ ila, mana orunga molk, ik teng nduk, uⱡ kai mbᵾ iting ei nga, rᵾk rᵾk tᵾk kun etᵾk muⱡeing ni! Moⱡpa kundi uⱡ kai mbᵾ etᵾk, rᵾk rᵾk wamp mbᵾ kᵾn min mondᵾk, wamp ti ndi ti, nᵾk kit mundi uⱡ ei nga ti, iti nᵾteing mon ni! Tᵾn pᵾtmᵾn ni, unt tᵾn nga numan orunga kᵾn, pi napᵾpᵾn ik tᵾp roi ndupᵾn, meka ropᵾn, ⱡawa minal itmin. Mᵾi kona ila mel mbᵾ nga kindmant endᵾtmin ei ndi, tᵾn tᵾpa kan ngurum. Wamp ti kᵾn, pilpa kit pili uⱡ na, kandpa kum pindi uⱡ mbᵾ nga minal itmin. Wamp mat ndi, tᵾn numan ngui nganggᵾrmᵾn. Wote tᵾn ndi, wamp mbᵾ numan ngui nganggᵾrmᵾn ku.

Wote, Got tᵾn nga Etpa Ti Wu ei nga, wamp numan ngui uⱡ ei kᵾn, wamp tᵾpa rᵾpᵾndi uⱡ ei kᵾn, omba pena ila pitim. Uⱡ ei ndi, tᵾn etpa titim. Tᵾn etpa titim uⱡ ei, tᵾn nga uⱡ kai etmin mbᵾ ndi mon! Wote, Got elim nga wamp kont kurum uⱡ ei ndi, tᵾn etpa titim. Ei kᵾn, tᵾn nu titmin ei kᵾn, Muⱡnga Wingti ei ndi, tᵾn kont nga melinga, wamp kont kat murmᵾn. Tᵾn nga Etpa Ti Wu Jisas Kraist ndi, kongun itim uⱡ ila, Got ndi, tᵾn Muⱡnga Wingti ei, pilpa kelpa oi ndupa ngurum. Uⱡ ei ndi, elim nga wamp poⱡ ti uⱡ ila, tᵾn etpa tilinga, Got nga kuimp keta ila tᵾn kun purmin. Wote, i etpᵾn moⱡpᵾn mbun, uⱡ nga kᵾnt nga kont mba mul uⱡ ei, timin pilpᵾn nokundpᵾn mormᵾn. Ik kupa ei, nᵾmp ngont. Wote nim ndi, wamp mbᵾ kᵾn, ronduⱡ mundkᵾn nana, wote Got kᵾn mondᵾk piling wamp mbᵾ, en enim ronduⱡ mundᵾk, uⱡ kai mbᵾ etᵾk muⱡing. Ya nᵾnt ik mbᵾ, wamp mbᵾ pora molk, kai munding. Wote, wamp mat ik nᵾmᵾ nᵾk, anda kouwᵾmᵾn kalk tᵾtᵾng mbᵾ nga ik nᵾk, mi ik na mbᵾ nga ik palk etmin wamp mbᵾ kᵾn ok, tᵾk muⱡᵾi! Nambuⱡ emel, ik mbᵾ, ik kai mat mon. 10 Wamp ti ndi, atinga rormᵾn ik ei, pep rui narᵾpa, elim nga ik ei pep reing nimba em wamp ei, kuimp tekᵾn man ngana pilpa, ti natᵾm ndam, aldpa man ngui! Wote ei kᵾn, ik ei kum ti natᵾm ndam, wamp ei tᵾkᵾn mbuⱡ ngui! 11 Nim pilik morᵾn, wamp ti, nombuⱡa kun ei, wak ropa, elim nga uⱡ kit etᵾm ei ndi, elim etpa kit mondrum.

Nimba Pora Ndurum Ik Mat

12 Wote na ndi, wu Artemas kep, wu Tikikus kep, tᵾp nim kᵾn mundunt ei kᵾn, nim okᵾn, ya Nikopolis kona ila ui! Nambuⱡ emel, ⱡapta mana orum ui ei kᵾn, na kona ila omp muⱡimp. 13 Gapman nga mi ik pili wu Seinas kᵾn, Apolus raⱡ, nombuⱡa pinggil ila, mek pinggil mel mbᵾ, nim ndi, tᵾkᵾn kun indana mekᵾⱡ pinggil. 14 Tᵾn nga wamp mbᵾ, kongun kai mbᵾ, ronduⱡ mundᵾk etᵾk, wote wamp mat pilik rundᵾng mbᵾ, tᵾk rapᵾndᵾk iteing. Enimp mondᵾk wei monmᵾn uⱡ ei mon. Moⱡpa kundi uⱡ kai mbᵾ iteing.

15 Na kᵾn rup rop mormin wamp mbᵾ ndi, nim kᵾn rawe etᵾk mundᵾnmᵾn. Tᵾn nga rawe ik kai mbᵾ nᵾkᵾn, tᵾn nga mondpa pili wamp mat, tᵾn numan ngormᵾn mbᵾ kᵾn nᵾkᵾn ngui! Got nga wamp poⱡ ti uⱡ ei, enim kᵾn pora piyangga!

Copyright information for `MED