2 Timothy 3

Kapa'ina Mo Kina Fua'iai Akemia Auga Fou'i

Timoti oi i'ina iifa'i fologo felo: Kina fua'iai papiau kapa apala'i ipauma'i ma'o akekapa'i puo, kina apala'i ipauma'i akemia. Ega'ina kina'iai papiau alo'i ko'agai ifo'i mo ani'i akeani. Isa alo'i ko'agai moni mo anina akeani, ke kapa'ina akekapa'i au'i aina'au'i akepa'au'i. Isa akeopolaga papiau isa'i isa fou i'opo laa'i kai, isa ifo'i mo auga kelogo alogai akeoma. Isa Deo ke papiau fou ee'iai akeifa apala aage mo. Isa ina'i ama'i aina'i afakeafia. Ke Deo papiau fou tenkiu afakepeni'i. Ke mino'iai kapa apala'i mo akeopolani'i puo, alo'i ageofu alogaina. Isa alo'i ko'agai kai aga'o anina afakeani, ke gua'i afakeania e'i apala afake'agegeaina. Ke papiau pifogeai akepaagu fofou'i. Isa ifo'i kegapaapakipo'i akeoma afaekaini'i. Ke isa a'o a'i'i koa i'opo'i, papiau ee'iai ake'e'efa alogaina, ke kapa felo'i au'i ani'i afakeani. Isa papiau akeafi'i ake'afa'afalaini'i, ke kapa'ina akekapa auga, laafuai akekapa. Isa papiau ago'iai ifo'i au akaiki'a'i akepamia'i. Ke Deo anina afakeani kai kapa'ina alo'i kepagama au'i mo kapa'i ani'i akeani akekapa'i. Isa Deo keau afagaina akeoma kai Deo agepalagaini'i, e'i laomai felo agemia auga afakepako'ania. Kai pau ganinagai iina koa kekapa'i papiau'i isafa epomiai keague. Ega puo oi ega'ina papiau'i ani'i foloani, ke fomuni'i foumakalaini'i.

Ega'ina papiau'i epo'iai isa'i au'i ima'ima koa i'opo'i aifafa'i mo papiau e'i e'ai kekoko. Ke papie alo'i apokega, laomai apala'i alo'iai epogu, ke kapa apala'i ma'oai kemaani'i kainai, pifogeai alo'i keania, isa mo aina'i keafia. Ega'ina papie'i auga aufa kina kemalele aefuafua mo ganinagai, Deo ega iifa oko ko'a ipauma auga akelogo felo paisa. Pifoge pamalele'i ega'ina au'i ufainagai au auni'i aka'i, Ianes ke Iambres fou Moses keumakalaina koa i'opoga, pau isa Deo ega iifa kekaisapua. Isa tiapolo alo'i ke opo'i fou epalifu afe'aina. Ke isa Deo ega iifa akepako'ania kainai, Deo isa eumakalaini'i epua'afuni'i. Kai papiau Ianes ke Iambres auni'i kafo'o lao'i mai'i kekapai'i au'i fiakoa mo keisa'i kelogo. Ega koa i'opoga mo, pifoge pamalelega au'i kafo'o lao'i mai'i kekapa'i au'i afa'agamo agelao koa kai, papiau ma'oai isa e'i laomai ega'ina akeisa felo akelogo.

Kapa'ina Lomaleleaina Auga Fopako'ania Faefuafua

10 Kai Timoti, oi lau e'u laomai ma'oai ala lakapa oma'i au'i lologo afe'ai: Lau kapa'ina mo lapamalele au'i ma'oai lologo. Ke kapa puo i'ina agofa'agai laagu, ke kapa'ina mo lakapai'i ke ala laagu oma auga isafa lologo. Ke Deo ala lapako'a oma auga ke pinauga laafi'inia mo elao auga lologo. Ke papiau ani'i ala laani oma ke kina apala eafiiau lakiekie mo ganinagai, e'u kiekie gamuga mo laoponia laafiapia mo auga isafa fouga lologo. 11 Ke Antiok, Ikonium, ke Listra taoni'iai kapa'ina mo faagauai kemia, ke papiau keafi apalaniau mo ganinagai, gamu'i mo laoponia laafiapia mo auga isafa fouga lologo. Ega'ina kapa'i ma'oai faagauai kemia mo ganinagai, aufa kina Lopia epalagainiau ee'iai epapealaisau. 12 Iifa gome maamuai laifania. Papiau ma'oai anina keani Iesu Kristo kegapako'ania ke alo'i ko'agai Deo kegaau afagaina keoma au'i, papiau isa ega koa fekekapa auga anina afakeani puo akeafi apalani'i. 13 Ega'ina alogai papiau apala'i kepifoge au'i papiau isa'i akefoge'i, ke e'i pifogeai papiau akefoge'i akepalifu alogaini'i akelao apala'i ipauma'i akemia. Ke tiapolo apala ipauma auga isa agefoge'i puo, ifo'i mo e'i iifa akepako'ania akekapa, ke ifo'i mo isafa akefoge'i. 14 Kai Timoti, oi kaisau mo kepamalelenio auga lologo felo'i. Ke oi e'elemuai Deo ega iifa pukagai ega iifa kekae au'i lokuapini'i lologo felo. Ega'ina iifa'i oi Iesu Kristo alopako'ania aisama, kaniamu isagamauga ikifaga agepalogonio keagagai agepapeaiso. Ega puo oi Deo ega iifa ega'ina ko'a ipauma lomaleleaina, ke lopako'ania auga kai'iai mo fopea faefuafua. 16 Deo ega iifa puka ma'oai papiau kepapua'i aisama, Deo ega Spiritu isa epenii'i, ke Spiritu ega'ina isa epalagaini'i e'imai'i puka ega'ina kepapua'i. Ke Deo anina eani papiau kapa'i Isa ega papiau epamia'i au'i, ega iifa puka akepapinauga aisama, isa e'i laomai felo'i, Deo epaini'i fekekapa eoma auga mo akekapa. Ke Deo ega iifa pukagai ega'ina pamalele'i papiau fau'iai agepinauga felo. Ke papiau puka ega'ina akekuapina aisama, laomai apala'i akekapa'i aisama agefina'i, ke agepalagaini'i ifo'i e'i laomai apala'i akeumakalaini'i. Ke ega'ina puka i'a isafa epamaleleni'a, epafuai'a aagu, ega koa Deo maagai laomai felo'i mo akapa'i.

Copyright information for `MEK