1 Chronicles 11

David na Israel pavapavana ai ela

Bena Israel idoinai na David dekenai e hebou, Heberon ai, eto, A itaia, ai na oi turiamu bona oi hidiomu. Nega gunadia ai, Saulo e lohiava ai, oi ese Israel o hakaua lasi bona o hakaua vareai. Bena Iehova, emu Dirava, ese e hereva henimu, eto, Oi na egu bese Israel ireḡuna tauna ai bona egu bese Israel pavapavana ai baola. Taunabunai, Israel tau-badadia iboudiai na hanua pavapavana dekena ela, Heberon ai; bena David na idia ida e hegwauhamata heheni Heberon ai, Iehova vairanai. Bena idia ese David e horoa, Israel pavapavana, Iehova ena hereva Samuel ena amo heḡereḡerena.

David ese Siona e abia

David bona Israel idoinai na Ierusalem (ladana ta na Iebusu) ela. Iebusu taudia, una tano e noholaiava taudia, na unuseni ai. Iebusu taudia ese David e hamaoroa, eto, Oi na iniseni ai basio raka vareai. Ḡau tamona, David ese Siona kohorona e abia; una na David ena hanua. David eto, Daika ese Iebusu taudia baine hadareredia guna, ia na lohia bona tuari biaguna ai bainela. Bena Ioab Seruia na e dae guna; una dainai ia na lohia ai ela. Bena David na una kohoro ai e nohova; una dainai ladana e hatoa “David ena hanua”. Bena ia ese hanua e hadaia heḡeḡe, Milo kohorona amo e matamaia ela bona e heḡeḡe dae. A Ioab ese hanua orena e haginia lou. Bena David na e bada herea e laova, badina be Iehova Sabaota na ia ida.

David ena goada taudia

10 David ena goada taudia lohiadia bini. Idia ese e durua goadagoadava ena basileia lalonai, Israel idoinai ida, pavapava ai bae halaoa totona, Iehova ese Israel e herevalaia heḡereḡerena. 11 David ena goada taudia herevadia bini: Iasobeama, Hakamoni tauna, na tatau tatoi ikwaradia tauna. Nega ta ai ia ese ena io amo tatau sinahu-toi e aladia mase.

12 Unu tatoiosi bogaragidiai, ia murinai na Eleasara; ia na Dodo, tau Ahohi, natuna. 13 Filistia taudia na tuari totona Pasadamimi ai e hebou negana ai, una tau danu David ida unuseni ai. Bali umana ta na unuseni ai, bena Israel taudia na Filistia taudia vairadia amo e heau. 14 A ia na uma bogaraginai e gini, e gimaia, bona Filistia taudia e aladia mase; una kwalimu badana amo Iehova ese e hamauridia.

15 Lohia toiahuiosi bogaragidia amo tatau tatoi na nadi-gini ela, David dekenai, Adulama kohuana ai. Una negana ai Filistia taudia edia tuari oreana na Refaim kourana ai e taruha. 16 David na gabu aukana ai, a Filistia taudia na Betelehem ai e hegimava. 17 Bena David na mai lalo-hekisehekisena ida e hereva, eto, Ta ese Betelehem ikoukou badibadinai guri e miamu ranuna kuri ta bema henigu, bama inua. 18 Bena hari goadaherea taudia tatoiosi na Filistia taudia edia taruha amo e tata uru, Betelehem ikoukou badibadinai guri e miamu ranuna e utua, bena e abia, David dekena e laohaia. A David ese inuna se ura; ia na e bubua diho Iehova ena; 19 eto, Egu Dirava vairanai, unu baina kara toma na lalogu ai se heḡereḡeremu, lasi ona lasi vaitani. Ini tatau edia mauri rarana baina inu a? Badina be edia mauri inegedia asie laloa, bena e mailaia. Taunabunai, ia na inuna se ura. Ini kara be goada-herea taudia tatoiosi ese e kara.

20 Abisai, Ioab tadina, na hari toiahuiosi biagudia. Ia ese tatau sinahu-toi na ena io amo e aladia mase; bena ladana e dae, idia tatoiosi ida heḡereḡere. 21 Hari toiahuiosi bogaragidiai, ia mo sibona harina vada e bada, bena biagudia ai ela. A ia na hari tatoiosi ida se heḡereḡere.

22 Benaia Iehoiada na boga-auka tauna ta, Kabsele amo; ia na kara badadia ikaradia tauna. Ia ese Ariele natuna raruosi Moab amo na e aladia mase. Ia danu e hekei lao, leona ta na guri lalonai e alaia mase, snow e dihova dinana ai. 23 Aigupto tauna ta danu ia ese e alaia mase; una tau na tau bada-hereana, ena lata na kiubit ima. Una Aigupto tauna imana na mai iona; una io na dabua ihatuna tauna ena au na heto. A Benaia ese mai auna ida ia e lao henia, io na Aigupto tauna imana amo e dadihaia, bena sibona ena io amo e gwadaia mase. 24 Ini kara na Benaia Iehoiada ese e karava, bena ia harina na hari goada-herea taudia tatoiosi haridia ida e gwauraidia hebou. 25 Ia na mai harina unu toiahuiosi bogaragidiai; ḡau tamona hari tatoiosi ida se heḡereḡere. Bena David ese ia igimana oreana biaguna ai e halaoa.

26 Goada-herea taudia tuari oreadia lalodiai ladadia bini: Asahele, Ioab tadina; Elhanan Dodo, tau Betelehem; 27 Samota, tau Harod; Helese, tau Pelono; 28 Ira Ikese, Tekoa tauna; Abiesere, Anatoto tauna; 29 Sibekai, tau Husata; Ilai, tau Ahohi; 30 Maharai, tau Netofa; Helede Baanaha, tau Netofa; 31 Itai Ribai, tau Gibea, Beniamina iduhuna tauna; Benaia, tau Piratono; 32 Hurai, Gaasa sinavaidia amo; Abiele, Araba tauna; 33 Asamavete, Baharumu tauna; Eliaba, tau Saalbon; 34 Haseme, tau Gisono; Ionatan Sage, tau Harara; 35 Ahiama Sakara, tau Harara; Elifala Uru; 36 Hefere, tau Mekerata; Ahia, tau Pelono; 37 Hesero, Karamele tauna; Naarai Esebai; 38 Ioel, Natan tadina; Mibhara Hagri; 39 Seleke, Amono tauna; Naharai, tau Beroto, Ioab Seruia ena kesi ihuana tauna; 40 Ira, tau Itiri; Gareb, tau Itiri; 41 Uria, Hiti tauna; Sabada Ahalai; 42 Adina Sisa, Ruben iduhuna tauna, Ruben taudia edia lohia ta, bona tatau toi-ahui ia ida; 43 Hanana Maaka; Iosafat, tau Mitini; 44 Usia, tau Astaroto; Sama bona Ieiele, Hotama tau Aroere natuna raruosi; 45 Iediaele Simri, bona ia tadina loha, tau Tisi; 46 Eliele, Mahava tauna; Ieribai bona Iosavia, Elnama natuna raruosi; Itima, Moab tauna; 47 Eliele; Obed; bona Iaasiel, tau Mesoba.

Copyright information for `MEU