1 Corinthians 5

Ekalesia taravatudia

Sivarai vada e piua, umui bogaragimui ai lebulebu karana ta mia; kara unuhetomana bese idau-idau taudia na asi dibadia. Karana binai: tau ta tamana adavana ida e heuda hanai. A umui be o hekokorokumu, asio taimu, asio tomu unu e kara toma tauna na bogaragimui amo bema heabi oho bema namo. Benaini, ena be taugu na idau gabu ai to laumagu na dekemui ai; taunabunai, lau ese una kara e karaia tauna vada na hahemaoro henia vaitani, dekemui ai bama noho na heto. Lohiabada Iesu Keriso ladana ai na haḡanimuimu: lau laumagu ida ba hebou Lohiabada Iesu Keriso siahuna ai, bena una kara e karaia tauna na Satana ba henia, Iauanina ihamasena totona; bena laumana do baine mauri Lohiabada ena mai dinana ai.

Emui hekokoroku na dia namo. Asi dibamui a, hatubu ḡauna sisina ese taba idoinai e hatubuamu? Hatubu ḡauna gunana ba negea, taba matamatana ai baola, se hatubua ḡauna. Badina be Keriso vada e alaia mase, iseda Lagau-hanai mamoena ai ela. Taunabunai, aria baita karaia, dia hatubu ḡauna gunana ai, bona dia lalo-hadai dikadia bona kara dikadia edia hatubu ḡauna ai, a se hatubua anianina ai: una na lalo ḡoeva bona hereva momokani.

Egu revareva ta lalonai na tore henimui, nato heuda-hanai taudia basio bamodia. 10 To asinato nega idoinai ina tanobada ena heuda-hanai taudia, eiava mata-ḡaniḡani taudia, eiava dadidadi taudia, eiava kaivakuku itomadiho-henidia taudia, ida basio hebou; unu asina gwau toma. Boma ura unu boma kara toma, dala tamona be tanobada boma rakatania vaitani. 11 A harihari na tore henimuimu, na tomu, ita varavarada ta bema heudahanai tauna, eiava mata-ḡaniḡani tauna, eiava kaivakuku itomadiho-henina tauna, eiava ere dika tauna, eiava kekero muramurana inuna tauna, eiava dadidadi tauna, umui na ia ida basio hetura bona ia ida basio aniani hebou. 12 Badina be murimuri tauna baina hahemaoro henia na dia lauegu ḡaukara; a umui emui ḡaukara be ekalesia lalonai e nohomu taudia na ba hahemaoro henidia, ani? 13 Dirava ese murimuri taudia e hahemaoro henidiamu. Umui hari kara dika tauna murimuri ai bavatoa lasi.

Copyright information for `MEU