1 Kings 4

King Solomon ena noho

A King Solomon na Israel idoinai pavapavana. Ia iduruna taudia badadia bini: Asaria Sadok na hahelaḡa tauna; Elihorefe Sisa bona Ahia Sisa na toretore taudia; Iehosafat Ahilud na e tore pepadia inaridia tau. Benaia Iehoiada na tuari oreana biaguna; Sadok bona Abiatara na hahelaga taudia; Asaria Natan ese hanua pavapavana ena hesiai taudia e biagudiava. Sabud Natan na hahelaḡa tauna bona hanua pavapavana turana; Ahisara ese hanua pavapavana ena ruma e itaia taova; bona Adoniram Abda ese e haḡaukaradiava taudia e biagudiava.

Solomon na mai ena heitatao taudia gwauta-rarua: idia ese Israel idoinai e lohiaia, bona hanua pavapavana bona ena ruma taudia adia e henidia; ta ta hua ta ta ai adia e henidia, laḡani ta lalonai. Ladadia bini: Ben-huru, Efraim ororodia ai; Ben-dekere, Maka bona Saalbim bona Bete-semese bona Elono-bete-hanana kahadia ai; 10 Ben-hesed, Aruboto ai, (Soko bona Hefere tanona idoinai na iena); 11 Ben-abinadab, Nafata-doro idoinai lalonai, (ia ese Solomon natuna hane-ulatona Tafata e adavaia); 12 Baana Ahilud, Taanak ai bona Megido ai bona Bete-seana idoinai lalonai, (una na Saretan badibadinai, Iesrele henunai, bona Bete-seana amo ela bona Abele-mehola, ela bona lokomeama unukahana); 13 Ben-gebere, Ramoto-gilead ai, (ia na Iairi Manase ena hanua hidaosi Gilead ai, bona Aragob tanona Basan ai, e abidia, hanua badadia tauratoi-ahui mai maḡudia bona mai auri labora-laboradia); 14 Ahinadab Ido, Mahanaim ai; 15 Ahimasa, Napatali ai, (ia ese Solomon natuna hane-ulatona Basemata e adavaia); 16 Baana Husai, Asere ai bona Bealoto ai; 17 Iehosafat Parua, Isakara ai; 18 Simei Elaha, Beniamina ai; 19 Gebere Uri, Gilead tanona ai, (Amoro taudia edia pavapava Sihon bona Basan pavapavana Og edia tano bunai). Bona heitatao tauna ta danu na Iuda tanona ai.

20 Iuda taudia bona Israel taudia na hutuma herea, kone mirina na heto; e anianiva, e inuinuva, e moaleva. 21 Solomon ese basileia iboudiai e halohiadia, Eufrate sinavaina amo ela bona Filistia taudia edia tano bona Aigupto tanona hetoana; idia ese heaiva monina e mailaia, bona Solomon isiaina e lao heniva, ena mauri dinadia iboudiai lalodiai.

22 Solomon ena ruma anianina dina ta lalonai na flaoa kurokurona koro
“Koro” na Heberu taudia edia hahetoho ḡauna badana ta 10 efa = 1 koro.
toi-ahui, bona flaoa mia-kurona koro tauratoi-ahui,
23 bona boromakau mamaruanedia mai digaradia gwauta, bona boromakau rei gabudia amo ruahui, bona mamoe sinahu-ta, bona dia badadia bona uda nanidia bona dia maraḡidia bona kokoroku mai digaradia. 24 Badina be Eufrate sinavaina lahara kahana tanona idoinai, Tifsa amo ela bona Gasa, ia ese e lohiaia, bona Eufrate sinavaina lahara kahana pavapavadia iboudiai ia ese e biagudia; bena e heḡeḡemadai tanodia iboudiai vada e maino. 25 Iuda taudia bona Israel taudia na e noho namonamova, Dan amo ela bona Bere-sieba, ta ta ena vine auna ena vine auna henudiai bona ena suke auna ena suke auna henudiai, Solomon ena mauri dinadia iboudiai lalodiai. 26 Solomon na mai ena kariota hosidia danu, ta ta mai rumadia, iboudiai na gerebu hani;
Gerebu hani = 40,000. Gerebu-ta daha-rua = 12,000.
bona ena hosi-gui taudia na gerebu-ta daha-rua.
27 Hari heitatao taudia ese King Solomon ana, bona King Solomon ena pata ai adia e abiva taudia adia, e heni, ta ta hua ta ta amo; ḡau ta ai asie hadabudiava. 28 Bali bona rei kakoro danu, kariota hosidia bona gui hosidia adia bona edia, na e gwaurai gabudia e laohai, ta ta e haḡanidia heḡereḡerena.

29 Bena Dirava ese aonega bona lalo-parara bada-herea na Solomon e henia, bona lalo-hadai dobudia momo danu, kone mirina na heto. 30 Taunabunai, Solomon ena aonega ese mairiveina kahana taudia iboudiai edia aonega bona Aigupto aonegana idoinai e hereadiava. 31 Badina be ia ese taunimanima iboudiai na aonega ai e hereadiava; Etana tau Esraha, bona Maholo natuna tatoiosi, Hemana bona Kalakolo bona Darada, edia aonega danu. Bena ia harina e piua, hegegemadai besedia iboudiai lalodiai. 32 Ia ese danu lada-isi herevadia daha toi e gwauraidia; bona ena ane na daha-ta dikoana ima. 33 Au danu ia ese e herevalaidiava, Lebanon sida audia amo ela bona husopo avana nadi-maḡudia nadidia padadiai e tubumu ḡauna; boroma idau-idau bona manu bona e raumu ḡaudia bona gwarume danu ia ese e herevalaidiava. 34 Bena bese iboudiai amo taunimanima na Solomon ena aonega ikamonaina totona ema, bona tanobada pavapavadia, ena aonega harina vada e kamonai taudia, edia amo danu.

Copyright information for `MEU