1 Peter 1

Lau Petro, Iesu Keriso ena aposetolo taugu, ese e abimui hidi taumui, Ponto ai bona Galatia ai bona Kapadokia ai bona Asia ai bona Bitunia ai o noho hedoa-hedoamu, na tore henimuimu. Ita Tamada Dirava ese e abimui hidi guna, bena Lauma Helaḡa ese e hahelaḡamui, Iesu Keriso ba kamonai henia bena ia rarana ese baine nevarimui helaoreana. Hariharibada bona maino emui ai bae bada.

Heimodai

Dirava, iseda Lohiabada Iesu Keriso Tamana, aita imodaia. Iena hebogahisi na bada herea dainai, ia ese vada e havarada lou, mauri helarona ai, Iesu Keriso mase amo e tore isi lou dainai. Ahumui do bavabia, baine mia hanaihanai, asi bebeka-bebekana, basine marai, guba ai vada e atoa heḡaeḡae umui emui. Abidadama dainai Dirava ena siahu ese e gimamuimu, ela bona vada e seua hahemaurina, nega gabena ai baine hedinarai ḡauna, bavabia. Una dainai, ena be ina nega sina ai hedibaḡani momodaidiai daramui e dokomu, to ba moale. Emui abidadama e tohoamu, gold lahi ai e tohoamu na heto. Ena namo ese gold ena namo e hereaiamu; ia na ihanamolaimui bona iheatolaimui bona imatauraimui ḡauna ai bainela, Iesu Keriso baine hedinarai dinana ai. Ena be nega ta asio itaia, to o ura heniamu; ena be asio itaiamu, to o abidadama heniamu bona o moalelaiamu; emui moale na asi igwauraina dalana, o moale hisi daemu. Emui abidadama huahuana do bavabia, laumamui ihamauridia benai.

10 Peroveta taudia, Dirava ena harihari-bada emui ai baine kau e gwauraia guna taudia, ese hari hahemauri e henanadailaia bona e tahua malaka-malaka. 11 Keriso ena lauma lalodia ai e nohova; Keriso baine ani hisidia bona murinai baine abi hairaidia e hadibalaidiava; bena idia ese negana bona toana e tahuva. 12 E hadibadia danu, unu ḡau e ḡaukaralaidia na dia idia edia, to umui emui; bona harihari sivarai namo e harorolai henimui taudia ese vada e gwaurai, Lauma Helaḡa guba amo vada e siaia diho dainai. Unu ḡau aneru ese itana urana e uramu e tomamu.

Ba helaḡa

13 Lalomui ba haḡoeva, ba haheauka. Iesu Keriso baine hedinarai negana ai emui ai baine kau hariharina ba laroa mai lalomui idoidiai. 14 Kamonai memeromui ai baola. O diburava negadia ai o ḡahusiva ḡaudia na basio haḡoidia; 15 a e boirimui Tauna vada e helaḡa heḡereḡerena, umui danu ba helaḡa, emui kara idoidiai lalodiai. 16 Badina be vada e torea, Umui na ba helaḡa, badina be lau name helaḡa. 17 Taunimanima e hahemaoro henidiamu negadia ai na oromadia se lalomu, a ta ta ena ḡaukara ena ḡaukara daidiai e hahemaoro henidiamu, Diravana o hahaneamu, Tamamui o gwauraiamu; benaini, ina emui noho-hedoa negana ai ba noho mai garimui ida. 18 Bona ba diba, senemui edia kara asi anidia amo e hamaurimui davana na dia baine pata ḡauna ta, dia silver, dia gold, 19 a rara herea-daena, mamoe natuna asi bebeka-bebekana bona asi toutouna rarana na heto, Keriso rarana benai. 20 Tanobada do se havaraia negana ai e abia heḡaeḡae, a ini dina gabedia ai vada eme hedinarai, umui daimui ai. 21 Ia bagunai Dirava o abidadama heniamu; Dirava ese mase amo e hatorea isi bona hairaina e henia; taunabunai emui abidadama bona emui helaro na Dirava enai mimia.

22 Hereva momokani vada o kamonai dainai laumamui vada o haḡoevadia bona varavarada o lalokau henidia momokanimu; benaini, ba heura heheni mai lalomui idoidiai. 23 Vada o vara matamata, dia baine pata ḡauna ena amo, a Mauri bona Noho-hanaihanai Diravana ena hereva dainai. 24 Badina be

Taunimanima iboudiai na rei na heto,
Idia hairaidia na rei huahuadia na heheto;
Rei e maraimu, bona huahuana e hehuhumu,
25 A Lohiabada ena hereva do baine hesiriu hanaihanai.
Sivarai namo vada e harorolai henimui herevana benai.

Copyright information for `MEU