1 Samuel 10

Samuel ese Saulo e horoa

Bena Samuel ese dehoro kavabu ta e abia, Saulo kwarana ai e seia, bena e harahua, eto, Iehova ese vada e horomu, ena bese Israel ba halohiaia ani? Iehova ena bese taudia do ba halohiadia, idia inaidia e noho heḡeḡemu taudia imadia amo ba hamauridia. Iehova ese vada e horomu. ena bese ba halohiaia, toana binai: hari dina ai, ba rakatanigu murinai, tatau rarua ida ba hedavari Rahela ena gara gabuna ai, Selesa ai. Beniamina tanona ai; bena idia ese bae hereva henimu, baeto, Itahudia ola donikidia na vada e davaridia, harihari tamamu na doniki se lalodiamu, a oi daimu ai lalona e hekwarahimu, e tomu “Ede baina kara toma natugu dainai?” Unu amo ma baola, ela bonaoak auna Taboro ai; unuseni ai tatau tatoi, Dirava dekena e laomu Betele ai taudia, ida ba hedavari. Ta be nani natudia toi e huamu; ihararuana na flaoa igabu toi e huamu; ihatatoina na vine ranuna kopi ta e huaiamu. Idia ese bae hahenamo henimu, bona flaoa igabu rua bae henimu; imadia amo do bavabi. Una murinai Dirava ena ororo ai ba kau, ladana na Gibea; unuseni ai Filistia taudia edia tuari oreana ta e nohomu. Una hanua ba raka henia kahi negana ai na peroveta oreana ta ida ba hedavari: idia na atai gabuna amo bae diho, bae peroveta, mai hatai-hatai ḡaudia, ruirui tarekodia, ivilikou bona gitara oreana na idia vairadiai. Bena Iehova ena lauma ese baine rohemu badabada, bena idia ida ba peroveta, ma tau idauna ta ai baola. Ini toa na emu ai bae kau negana ai, imamu ese baine davaria ḡaukarana na ba karaia, badina be Dirava na oi ida. Bena lau vairagu ai ba raka, Gilgal baola: bena lau baina vasi, ḡole-oho bouboudia bona herohemaino bouboudia baina hahelaḡadia. Dina hitu ba narigu, ela bona lau na baina vasi, ede ba kara toma na baina hadibamu.

Saulo ese Samuel e rakatania, bena Dirava ese lalona e hakerehaia; bena unu toa iboudiai e hedinarai una dina ai. 10 Gibea ororona ai e kau negana ai, peroveta oreana ta ia ida e hedavari; bena Dirava ena lauma ese e rohea badabada, bena idia bogaragidiai e peroveta. 11 Gunaguna dibadia ia taudia ese e itaia, peroveta taudia ida e perovetava, bena e henanadai heheni, eto, Kisa natuna na edeheto? Saulo danu peroveta tauna ta a? 12 Bena una gabu tauna ta e haere, eto, Be, tamadia be daika? Taunabunai una hereva be edia lada-isi herevana ai ela, eto “Saulo danu peroveta tauna ta a?” 13 E peroveta vaitani, bena atai gabuna ai e kau.

14 Saulo tamana lahaina ese ia bona ena hesiai tauna e nanadaidia, eto, Ede ola? Saulo eto, Doniki itahudia ala, a asia davaridia negana ai, ai na Samuel dekena ala. 15 Saulo tamana lahaina eto, Mani a hamaorogu, Samuel na dahaka e hamaoromui. 16 Saulo ese tama-lahaina e haere henia, eto, E hadibamai, doniki vada e davaridia. A hari basileia herevana Samuel ese e gwauraia na herevana ta se hamaorolaia.

Hebou ese Saulo e abia dae

17 Una negana ai Samuel ese taunimanima e boiridia, Iehova vairanai bae hebou Mispa ai. 18 Ia ese Israel taudia e hamaorodia, eto, Iehova, Israel Diravana, na ini e gwau tomamu: Lau ese Israel besena na Aigupto amo na hakaua lasi; Aigupto taudia imadia amo bona e hahisimuiva basileiadia iboudiai imadia amo na hamaurimui. 19 A umui na hari dina ai emui Dirava, emui dika iboudiai bona emui lalo-hisihisi iboudiai amo e hamaurimuimu Diravana, vada o dadaraia, vada oto “Lasi, emai pavapava ta hari ba henimai”. Taunabunai, Iehova vairanai ba hedinarai, emui iduhu ta ta amo, bona emui daha ta ta amo.

20 Bena Samuel ese Israel iduhudia iboudiai e boiridia, bae raka kahira; bena mari ese Beniamina iduhuna e duanaia. 21 Bena Beniamina iduhuna taudia e boiridia, dogoro ta ta amo bae raka kahira; bena mari ese Matri dogorona e duanaia. Bena Matri dogorona taudia e boiridia, tatau ta ta amo bae raka kahira; bena mari ese Saulo Kisa e duanaia. A e tahua negana ai na asie davaria. 22 Taunabunai, idia ese Iehova e nanadaia, eto, Tauna na ema eiava? Iehova eto, A itaia, ia na kohu lalodiai e komumu. 23 Bena idia na e heau lao, e hakaua lasi; bena taunimanima bogaragidiai e gini negana ai ena lata ese iboudiai edia lata e hereadia; ia paḡana na idia kwaradia ida heḡereḡere. 24 Bena Samuel ese taunimanima iboudiai e hamaorodia, eto, Iehova vada e abia hidi tauna o itaiamu a? Taunimanima iboudiai bogaragidiai ia na asi idaina. Bena hebou taudia iboudiai e lolo, eto Pavapava na baine mauri daudau.

25 Bena Samuel ese basileia taravatudia na hebou taudia e hamaorolaidia, bona buka ta ai danu e toredia; buka na Iehova vairanai e atoa. Bena Samuel ese hebou taudia na e hakarohodia, ta ta ena ruma ena ruma baela. 26 Saulo danu ena ruma ela, Gibea ai, boga-auka taudia hahidaosi danu, Dirava ese lalodia vada e ha-uradia taudia, na ia ida ela. 27 A asi lalodia taudia haida eto, Ina tau ese ede baine hamaurida toma? Bena e dadaraia, bona herahia ḡauna ta asie henia. A ia na se hereva.

Copyright information for `MEU