1 Samuel 22

Nob e habuaia tari

David na unu amo e raka oho, Adulama kohuana ai e komu. Tadikakana bona tamana ena ruma taudia iboudiai ese harina e kamonai, bena unu ela ia dekenai. Bena lalo-hisihisi taudia bona maiedia abi-torehai taudia bona maumau taudia iboudiai na ia dekenai e hebou; bena ia ese e biagudia. Ienai e hebou taudia na sinahu hani sisivana.

David na unu amo ma ela, Mispe ela, Moab tanona ai. Bena ia ese Moab pavapavana e noia, eto, Mani emu kara tamagu bona sinagu na oi dekemu ai bae noho, ela bona baina diba Dirava ese ede baine karagu toma. Bena ia ese Moab pavapavana dekenai e rakatanidia; idia ese ia dekenai e nohova, David na ena komu gabuna ai e nohova negana idoinai lalonai. Bena peroveta tauna ta, ladana Gad, ese David e hamaoroa, eto, Komu gabuna ai basio noho; ba raka oho, Iuda tanona baola. Taunabunai David na e raka oho, uda ladana Herete ela.

Saulo ese harina e kamonai, David mai bamona ida vada e davaridia. Una negana ai, Saulo na Gibea ai, atai gabuna enatamarisk auna henunai e helai; ena io na imana ai, bona ena hesiai taudia na e ginia heḡeḡe. Bena Saulo ese ena hesiai taudia, e ginia heḡeḡe taudia, e hamaorodia, eto, Beniamina taumui e, a hakala! Iese natuna na umui ta ta uma bona vine imeadia baine henimui a? Iboumui ai daha biagudia bona sinahu biagudia ai baine halaomui a? Una dainai taogu itorena daladia vada o tahu a? Natugu na Iese natuna ida e hegwauhamata heheni negana ai, tau ta ese se hadibagu; umui ta ese se bogagu hisi, se hamaorogu natugu ese egu hesiai tauna lalona vada e ania, baine inai henigu bona baine bani henigu, hari dina ai e karaiamu heḡereḡerena. Doeg, tau Edom, na Saulo ena hesiai taudia badibadidiai e gini, bena ia na e haere, eto, Lau ese Iese natuna na itaia, ia na Nob ema, Ahimelek Ahitubu dekenai; 10 bena Ahimelek ese Iehova e nanadaia ia bagunai, bena aniani e henia, bona Goliata, tau Filistia, ena dare danu e henia.

11 Bena pavapava ese gwau-kau e siaia, hahelaḡa tauna Ahimelek Ahitubu bona tamana ena ruma taudia iboudiai, hahelaḡa taudia Nob ai, e boiridia. Iboudiai na pavapava dekena ema. 12 Bena Saulo eto, Ahitubu natuna e, a kamonai. Tauna na e haere, eto, Egu lohia e, lau binai. 13 Bena Saulo ese e gwau henia, eto, Dahaka dainai taogu itorena dalana vada o tahua, oi bona hari Iese natuna? Aniani bona dare o henia, bona Dirava o nanadaia ia bagunai; una dainai ia vada e tore isi, lau ihadikagu totona, bona vada e bani henigu, hari dina ai e karaiamu heḡereḡerena.

14 Ahimelek ese pavapava e haere henia, eto, Emu hesiai taudia bogaragidiai daika ese e abidadama henimumu, David ese e abidadama henimumu heḡereḡerena. Ia na oi ravamu bona emu gima oreana biaguna; emu ruma taudia ese danu e matauraiamu, ani? 15 Nega gini-gunana binai ia bagunai Dirava na nanadaia a? Lasi vaitani. Oi pavapava taumu be emu hesiai tauna na unu basio helalolaigu toma, bona tamagu ena ruma taumai iboumai ai unu basio helalolaimai toma. Badina be lau binai emu hesiai taugu be ina sivarai na asi dibagu, hereva badadia eiava hereva maraḡidia na asi dibagu.

16 Pavapava na eto, Ahimelek e, momokani oi na ba mase, bona tamamu ena ruma taudia iboudiai do bae mase. 17 Bena pavapava ese ena hegima taudia, e ginidia heḡeḡe taudia, na e haḡanidia, eto, Iehova ena hahelaḡa taudia na bavaladia mase, badina be idia ese David e duruamu; idia na dibadia ia vada e heau, to asie hadibagu. A pavapava ena hesiai taudia na lalodia asie heḡereḡere imadia bae toi roro, Iehova ena hahelaḡa taudia ialadia totona. 18 Bena pavapava ese Doeg e hamaoroa, eto, Oi ese hahelaḡa taudia bavaladia. Bena Doeg, tau Edom, ese hahelaḡa taudia e aladia matama; una dina ai ia ese hahedoki helaḡadia, dabua aukadia ḡaudia, e dokidia taudia taurahani-ahui ima e aladia mase. 19 Nob danu, hahelaḡa taudiaedia hanua, ia ese dare amo e habuaia tari: tatau, hahine, memero kekeni, rata e inu memerodia danu, bona boromakau bona doniki bona mamoe, iboudiai na ia ese dare amo e aladia ore.

20 A Ahimelek Ahitubu natuna tamona mo, ladana na Abiatara, e roho maun, David murina amo e heau. 21 Bena Abiatara ese David na sivarai e hamaorolaia, Saulo ese Iehova ena hahelaḡa taudia vada e aladia mase. 22 Bena David ese Abiatara e hamaoroa, eto, Una dina ai Doeg, tau Edom, na unuseni ai, bena lalogu e parara ia na Saulo do baine hamaoroa. Lauegu kara dainai tamamu ena ruma taudia iboudiai vada e mase ore. 23 Lau dekegu ai ba noho, basio gari; badina be lauegu mauri iabi-ohona e tahuamu tauna ese oiemu mauri danu iabi-ohona e tahuamu. A lau ida ba noho, vada ba mauri.

Copyright information for `MEU