1 Thessalonians 5

Lohiabada ma bainema

Varavaramai e, nega bona laḡani herevadia na basia torelai henimui; badina be umui dibamui Lohiabada ena dina na bainema, henao tauna hanuaboi ai e maimu na heto. Idia baeto “Maino” bona “Namo” negana ai, hebuatari ese baine lasidia tao, hekamonai ese rogorogo hahinena e lasia taomu na heto; bena basie roho mauri diba.

To, varavaramai e, umui na dia dibura taumui; una dina ese basine lasimui tao, henao tauna na heto. Umui iboumui ai diari memeromui, dina memeromui: ita na dia hanuaboi ena, dia dibura ena. Benaini, basita mahuta, haida e mahutamu na heto; a matada baita hapapa nega iboudiai, baita haheauka. Mahuta taudia be hanuaboi ai e mahutamu, bona kekero taudia be hanuaboi ai e kekeromu. A ita, dina tauda, baita haheauka; kemeda ai kamonai bona lalokau baita hadabualai, bona hahemauri helarona na kwarada ḡauna ai baita halaoa. Badina be Dirava ena ura ita edai na dia badu; ena ura be hahemauri baita abia, eda Lohiabada Iesu Keriso bagunai 10 Ia na ita daidai e mase, bena nogada ai eiava mahutada ai ia ida baita noho hebou. 11 Taunabunai, ba hahealo heheni, ba hahegoada heheni, ina harihari o karamu heḡereḡerena.

Sisiba herevadia

12 Varavaramai e, a noimuimu, bogaragimui ai e ḡaukaramu bona Lohiabada ladana ai e reḡumuimu bona e sisiba henimuimu taudia na ba hakala henidia. 13 Bona edia ḡaukara dainai emui lalokau ai bavabidia dae. Ba hedaro boubou.

14 Varavaramai e, a haḡanimuimu: noho kava taudia ba sisiba henidia, lalo-hesiku taudia ba hagoadadia, manoka taudia ba imudadia, taunimanima iboudiai ba haheauka henidia. 15 Ta ese dika na dika basine davalaia. Namo ba gavaia, bamomui edia bona taunimanima iboudiai edia. 16 Nega idoinai ba moale. 17 Ḡuriguri basio hadokoa. 18 Ḡau iboudiai daidiai Dirava ba hanamoa; badina be una na Dirava ena ura emui, Keriso Iesu bagunai. 19 Lauma na basio habodoa. 20 Peroveta herevadia basio dadarai. 21 Ḡau iboudiai ba diba toho: ḡau namona ba kahua tarika-tarika; 22 ḡau dikana ena amo ba raka oho.

Hahetoni herevadia

23 Maino Diravilla ese idoimui ai baine hahelaḡamui ḡuḡuru. Lalomui bona laumamui bona taumui ia ese baine dogodia tao, asi bebeka-bebekamui ba noho, ela bona eda Lohiabada Iesu Keriso bainema 24 E boirimuimu Tauna na momokani; ia ese baine karaia.

25 Varavaramai e, ai daimai ai ba ḡuriḡuri. 26 Varavara iboudiai na haherahu helaḡana amo ba hanamodia. 27 Lohiabada ladana ai na haḡanimuimu, ina revareva na varavara iboudiai vairadiai ba duahia.

28 Eda Lohiabada Iesu Keriso ena harihari-bada na emui ai baine mia.

Copyright information for `MEU