2 Chronicles 15

King Asa ena kara

Dirava ena lauma ese Asaria Odede e rohea, bena ia na e raka lasi Asa ihedavari-henina totona. E hereva henia, eto, Asa e, bona Iuda bona Beniamina idoinai, a kamonai henigu! Umui na Iehova enai o taomu ai, ia na umui ida. Boma tahua, do ba davaria, a boma rakatania, ia ese baine rakatanimui. Nega daudau Israel na asi edia Dirava korikori, asi edia hahedibadiba hahelaḡa tauna, bona asi edia taravatu. A edia hisihisi lalodiai Iehova, Israel Diravana, e hagerea bona e tahua negana ai, idia ese ia e davaria. Unu negadia ai, e raka lasi tauna bona e raka vareai tauna na asi edia maino, badina be hahedika badadia ese tano idau-idau taudia iboudiai e hahisihisidiava. Idia na e makohi rohoroho, bese ta bese ta hanua ta hanua ta e heala-ala heheni; badina be Dirava ese hisi idau-idau amo e hahisidia. A umui na ba boga auka. Imamui basie manoka, badina be emui ḡaukara anina bae halou henimui.

Asa ese Asaria Odede ena peroveta herevadia e kamonai negana ai, e boga auka, bona kaivakuku dikadia na Iuda bona Beniamina tanodia idoidiai bona Efraim ororo-hanuadia, ia ese vada e abi ḡaudia, amo e abidia oho. Iehova ena ihaboulaina patana danu, Iehova ena dubu dehena vairanai e miava ḡauna, na ma e larebaia lou. Bena ia ese Iuda bona Beniamina taudia iboudiai e haboudia, bona Efraim bona Manase bona Simeon taudia, idia bogaragidiai e noho hedoava taudia, danu; badina be hutuma bada ese e itaia, Iehova, ena Dirava, na ia ida, bena idia ese Israel e rakatania, ia dekena ela. 10 Asa ena lohia laḡanina ihagwauta-imana huana ihatoina lalonai, idia na Ierusalem ai e hebou. 11 Una dina ai idia ese boubou gaudia na Iehova vairanai e hahelaḡadia, hari tuari ai e abi gaudia lalodia amo, boromakau mamaruanedia sinahu-hitu bona mamoe daha-hitu. 12 Bena e gwau hamata, Iehova, senedia edia Dirava, na bae tahua, mai lalodia bona mai laumadia idoidiai ida eto; 13 bona daika Iehova, Israel Diravana, basine tahua, ia na bae alaia mase, eregabe eiava iahu, tau eiava hahine. 14 Iehova e gwau henia hamata mai gao badadia bona mai lolodia ida, bona mai auri kibidia bona doa kibidia reḡedia ida. 15 Bena Iuda idoinai na una gwauhamata e moalelaia; badina be mai lalodia idoidiai ida vada e gwau hamata, bona mai edia ura idoinai vada e tahua; bena idia ese ia e davaria, bona Iehova ese laḡa-ani e henidia, kaha iboudiai ai.

16 King Asa ese danu ia sinana Maaka ena pavapava dagina e abia oho, badina be ia ese kaivakuku dikana ta e karaia, Asera ena. Asa ese ena kaivakuku e utua gari, e hapatapataia, bena Kidron sinavaina badibadinai e gabua. 17 A atai gabudia helaḡadia na Israel amo asie abidia oho. Ḡau tamona, Asa na asi ena lalo-hadai kerere, ena dina iboudiai. 18 Bena tamana ena herahia ḡaudia helagadia bona ia sibona ena herahia ḡaudia helaḡadia,silver bonagold ḡaudia idau-idau, ia ese Iehova ena dubu ai e vareailaidia. 19 Tuari na se vara lou, ela bona Asa ena lohia laḡanina ihatoiahui-imana ai.

Copyright information for `MEU