2 Chronicles 32

Senakerib ese Iuda e tuari henia

Unu ḡau bona unu heabidadama karadia muridia i, Senakerib, Asuria pavapavana, ema, Iuda e daea. Ia na hanua mai maḡudia vairadiai e taruha, e laloa baine ḡaunaidia eto. Hesekia e diba Senakerib vada ema Ierusalem baine tuari henia negana ai, ia na ena heitatao taudia bona ena goada taudia ida e henega bou, ranu gabudia hanua badana murimurinai na bae tahunidia eto; bena idia ese ia e durua. Taunimanima hutuma bada e hebou, bena ranu gabudia Iboudiai, bona sinavai maragina, tano e ha-arua hanai ḡauna, na e tahunidia; eto, Anina be dahaka Asuria pavapavadia baema, ranu momo bae davari? Ia na mai boga-aukana ida e ḡaukara matama, vada e hegigi dobi maḡuna idoinai ma e haginia lou, bona latanai kohoro e haginidia. Bena una maḡu murimurinai ia ese maḡu ta ma e larebaia; bona Milo kohorona e ha-aukaia, David ena hanua lalonai. Ia ese danu tuari ḡaudia bona kesi momo herea e karadia. Ia ese tuari lohiadia e duanaidia, idia ese taunimanima bae biagudia. Hanua ikoukouna ariarana ai e haboudia, bena ena hereva amo e hagoadadia, eto, Ba goada, ba boga auka. Basio gari bona kudoumui basie hetaha, Asuria pavapavana bona hutuma bada ia ida ema vairadiai; badina be ita edai na ta herea-dae, ia enai e hereaiamu. Ienai be taunimanima imana mo; a ita edai be Iehova, eda Dirava. Ia ese baine duruda, bona eda tuari baine tuarilaia. Bena taunimanima lalodia ma e goada, Hesekia, Iuda pavapavana, ena hereva daidiai.

Senakerib, Asuria pavapavana, mai ena tuari oreana idoinai, ese Lakisi e daia ahuva; bena una murinai ia ese ena hesiai taudia na Ierusalem e siaidia lao, Hesekia, Iuda pavapavana, bona Iuda taudia iboudiai Ierusalem ai e hebouva, dekediai; eto, 10 Senakerib, Asuria pavapavana, na ini e gwau tomamu: Dahaka ai o hetao kaumu dainai Ierusalem o ha-aukaiamu? 11 Hesekia ese se koimuimu a? Ia ese baine kahumui nege, doe bona ranu mase ese bae hamasemui; badina be ia ese vada e koimuimu, e tomu “Iehova, eda Dirava, ese Asuria pavapavana imana amo baine hamaurida”. 12 Ina Hesekia ese ena atai gabudia bona ena ihaboulaina patadia vada e abidia oho, bona Iuda bona Ierusalem vada e haḡanidia, eto “Ihaboulaina patana tamona mo vairanai ba toma diho bona latanai emui boubou ḡaudia ba hagoledia oho”, ani? 13 Umui asi dibamui a, lau bona lau senegu ese idau tano taudia iboudiai ede vada a kara henidia toma? Unu tano basileiadia edia dirava ese edia tano na lau imagu amo vada e hamauridia diba a? 14 Unu senegu ese e habuadia tari vaitani basileiadia edia dirava iboudiai bogaragidia amo daika ese ena bese na lau imagu amo vada e hamauria diba, matona, umui emui Dirava ese lau imagu amo baine hamaurimui diba a? 15 Taunabunai, harihari Hesekia ese unu basine dibaḡanimui eiava basine koimui toma. Basio kamonai henia, badina be bese ta eiava basileia ta diravana ese ena orea taudia na lau imagu amo eiava lau senegu imadia amo se hamauridia diba. Benaini, umui emui Dirava ese lau imagu amo basine hamaurimui diba.

16 Ena hesiai taudia ese hereva haida ma e gwaurai, Ḡaubada Iehova ihadikana bona ena hesiai tauna Hesekia ihadikana. 17 Bona revareva haida ia ese e tore, Iehova, Israel Diravana, iḡonagonalaina bona ihadikana herevadia e tore, eto “Tano haida basileiadia edia dirava ese edia orea taudia na lau imagu amo asie hamauridia heḡereḡerena, Hesekia ena Dirava ese ena orea taudia na lau imagu amo basine hamauridia”. 18 Unu hereva e lololai mai gao badadia ida, Ierusalem taudia maḡu ai e giniva na e hamaorolaidia, Iuda taudia edia gado ai. Edia ura be bae hagaridia bona laumadia bae hadauredia, hanua badana bae abia helaoreana. 19 Ierusalem Diravana e herevalaia, tanobada besedia edia dirava, taunimanima imadia ese e kara ḡaudia, e herevalaidia heḡereḡerena.

Iehova ese Hesekia e hamauria

20 Bena Hesekia, hanua pavapavana, bona Isaia, peroveta tauna, Amoso natuna, e ḡuriḡuri unu hereva daidiai, bona guba e tai henia. 21 Bena Iehova ese aneru ta e siaia, bena ia ese tuari taudia mai goadadia bona tuari lohiadia bona heitatao taudia Asuria pavapavana ena taruha lalonai na e aladia mase. Bena Asuria pavapavana na ena tano korikori ai e lou lao mai hemaraina ida. Bena ena dirava ena dubu ai e dae kau negana ai, ia natuna haida ese unuseni ai dare amo e alaia. 22 Taunabunai, Iehova ese Hesekia bona Ierusalem ai e nohova taudia na Senakerib, Asuria pavapavana, imana amo bona ana inai taudia iboudiai imadia amo e hamauridia. Ia ese laga-ani e henidia, kaha iboudiai. 23 Bena hutuma ese herahia gaudia na Ierusalem e laohaidia, Iehova ena, bona dava-bada ḡaudia, Hesekia, Iuda pavapavana, ena; taunabunai ia na e imodaia bese iboudiai vairadiai, una negana amo ela.

Hesekia e gorerea

24 Unu dinadia ai Hesekia na e gorerea, mokona e mase. Bena ia ese Iehova e ḡuria; bona Iehova ese e haere henia bona toa ta e henia. 25 A Hesekia ese ia ihanamona davana na se heni, badina be lalona na e hekokoroku. Taunabunai badu na ia latanai e kau, bona Iuda bona Ierusalem latadiai danu. 26 A Hesekia ese ena hekokoroku e negea, e hahemanau, ia bona Ierusalem taudia danu; una dainai Iehova ena badu na idia latadiai se kau, Hesekia ena nega ai.

Gwau-kau taudia Babulono amo

27 Hesekia ena taḡa na bada; imatauraina danu bada. Ia ese habou-habou rumadia e haginidia,silver bonagold bona dava-bada nadidia, bona aniani mamidia ihanamodia muramuradia, bona kesi, bona dava-bada kohudia idau-idau na unu ruma lalodiai e habou. 28 Roḡe danu e kara, lalodiai ia ese uit bona bali bona vine ranuna bona dehoro e haboudia. Boromakau rumadia danu e haginidia, ubu-ubu ḡaudia idau-idau edia, bona mamoe ikoulaidia maḡudia danu. 29 Ia ese danu ena hanua haida e hadaidia, bona mamoe seridia bona boromakau seridia momo herea e abidia; badina be Dirava ese ena taḡa e habadaia herea. 30 Hari Hesekia ese danu Gihon daena ranu e arumu gabudia e koudia ahu, bena ranu na e ha-arua diho, David ena hanua lahara kahana ai. Hesekia ese ena namo e habadaiava, ena ḡaukara iboudiai lalodiai. 31 Taunabunai, Babulono lohiadia ese edia gwaukau taudia na ia dekena e siaidia, una tano ai vada e hedinarai toana bae henanadailaia eto negana ai, Dirava ese e rakatania ḡaḡae, baine tohoa bona lalona idoinai baine dibaia helaoreana.

King Hesekia e mase

32 Hesekia ena kara oredia bona ena kara namodia sivaraidia na Isaia Amoso, peroveta tauna, ena mata-hanai ai e tore, Iuda bona Israel Pavapavadia Sisigadia Bukana ai. 33 Bena Hesekia na tubu tama dekediai e mahuta; idia ese David garana edia gara dae-laona ai e guria. Ena mase negana ai, Iuda idoinai bona Ierusalem taudia iboudiai ese ia e imodaia. Bona ia natuna Manase na ia gabuna ai e lohia.

Copyright information for `MEU