2 Chronicles 34

Iosia e lohia matama

A Iosia e lohia matama negana ai, ena mauri laḡanidia na taurahani. Ena lohia laḡanidia Ierusalem ai na toiahui-ta. Ia na Iehova vairanai e kara maoromaoro, senena David ena dala idoinai e rakalaia, se raka siri, idiba kahana ai eiava lauri kahana ai. Badina be ena lohia laḡanina ihataurahanina ai, ia do merona ai, ia ese senena David ena Dirava e tahua matama; bena laḡani ihagwauta-ruana ai ia ese Iuda bona Ierusalem e haḡoevadia matama, atai gabudia bona Asera ena au-tubua bona kaivakuku, e havevedia auridia amo e kara gaudia, na e abidia oho. Idia ese Baal edia ihaboulaina patadia na ia vairanai e gigidia dobi. Ia ese danu muramura mai bonadia patadia, idia daediai e giniva gaudia, na e utudia; bona Asera ena au-tubua bona e havevedia auridia amo e kara kaivakukudia na e hamakohidia patapata, ḡahu ai e halaodia; bena gahu na unu ḡau e boudia taudia edia gara latadiai e ḡiḡia rohoroho. Hahelaḡa taudia turiadia danu edia ihaboulaina patadia latadiai e haḡoledia oho; una kara amo ia ese Iuda bona Ierusalem e haḡoevadia. Manase bona Efraim bona Simeon hanuadia ai, ela bona Napatali, bona edia hanua gunadia heḡeḡe:madaidia ai danu, ia ese ihaboulaina patadia e ḡiḡidia dobi, bona Asera ena au-tubua bona kaivakuku na gahu ai e halaodia, bona muramura mai bonadia patadia e utudia, Israel tanona idoinai. Bena ia na Ierusalem e lou lao.

Taravatu Bukana e davana

Ena lohia laḡanina ihagwauta-taurahanina ai, tano bona dubu vada e haḡoevadia murinai, ia ese Safana, Asalia natuna, bona Maaseia, hanua lohiana, bona loa Ioahasa, toretore tauna, na e siaidia lao, Iehova, ena Dirava, ena dubu bae bania. Idia na Hilkia, hahelaḡa tauna badana, dekenai e kau; bena Dirava ena dubu ai e vareailai monidia, Levi taudia, raka-vareaina inarina taudia, ese Manase bona Efraim taudia, bona Israel taudia kwabukwabudia, bona Iuda bona Beniamina taudia iboudiai, bona Ierusalem inoholaina taudia, edia amo e abi ḡaudia, na e henia. 10 Idia ese Iehova ena dubu itataona taudia e henidia, bena Iehova ena dubu e ḡaukaralaiava taudia ese dubu ibanina ai bona ihanamo-louna ai e heni; 11 kamuta taudia bona ruma-hagini taudia e henidia, e gei nadidia bona kapa-kapa audia bona lava bae hoidia, Iuda pavapavadia ese e matadia rea dainai vada e dika rumadia ihanamo-loudia totona. 12 Unu tatau ese ḡaukara e karaia mai momokanidia ida. Idia itataodia taudia e atodia na Iahata bona Obadia, Levi taudia Merari besena amo, bona Sekaria bona Mesularna, Kohat besena taudia; idia ese e itadia tao. Levi taudia iboudiai na hatai-hatai ḡaudia ihataidia mai dibadia taudia; 13 idia ese kohu-hua taudia e itadia tao, bona hesiai ḡaukaradia idau-idau e kara taudia iboudiai e biagudia. Levi taudia haida na itorena taudia bona heitatao taudia bona ikoukou igimadia taudia.

14 Hari Iehova ena dubu ai e vareailaia monina e abia lasi negana lalonai, hahelaḡa tauna Hilkia ese Iehova ena taravatu bukana, Mose ena amo e heni ḡauna, na e davaria. 15 Bena Hilkia ese toretore tauna Safana e hamaoroa, aeto, Lau ese taravatu bukana vada na davaria, Iehova ena dubu ai; bena Hilkia ese buka na Safana e henia. 16 Safana ese buka na hanua pavapavana dekena e laohaia. Ia ese hanua pavapavana e hamaoroa, eto, Emu hesiai taudia o henidia ḡaukaradia iboudiai na e karamu; 17 Iehova ena dubu ai e davaria monina na vada e vaia, heitatao taudia bona ḡaukara taudia imadia ai vada e atoa. 18 Bena toretore tauna Safana ese hanua pavapavana ma e hamaoroa, eto, Hahelaga tauna Hilkia ese buka ta vada e henigu. Bena Safana ese hanua pavapavana vairanai e duahia.

19 Hanua pavapavana ese taravatu herevadia e kamonai negana ai, ena dabua e dare. 20 Bena hanua pavapavana ese Hilkia, bona Ahikama Safana, bona Abdon Mika, bona toretore tauna Safana, bona Asaia, hanua pavapavana ena hesiai tauna, na e haḡanidia, eto, 21 Aola, Iehova ba nanadaia, lau daigu ai bona Israel bona Iuda kwabukwabudia daidiai, hari e davaria bukana herevadia ba henanadailai; badina be Iehova ena badu ḡaraḡara na ita latadai vada e hadihoa; badina be tamada ese Iehova ena hereva asie badinaia, bona ina buka lalonai e tore ḡaudia iboudiai na asie kara.

22 Taunabunai, Hilkia bona hanua pavapavana ese vada e siaidia taudia na peroveta hahinena Hulda, Salumu Tokohata adavana, dekena ela. Una Salumu na Hasra tubuna. Ia na pavapava ena dabua inaridia tauna. Hahine na Ierusalem kaha matamatana ai e nohova. Bena idia ese unu hereva e hamaorolaia. 23 Bena ia ese e hamaorodia, eto, Iehova, Israel Diravana, na ini e gwau tomamu: dekegu e siaimui mai tauna ba hamaoroa, baoto, 24 Iehova na ini e gwau tomamu: A itaia, lau na dika baina havaraia, ina gabu latanai bona inoholaina taudia latadiai, heuduguirai herevadia iboudiai, Iuda pavapavana vairanai e duahia bukana lalonai e hetore ḡaudia, heḡereḡeredia ai. 25 Badina be lau vada e rakatanigu, bona idau dirava vairadiai muramura mai bonadia vada e gabu; imadia gaukaradia iboudiai amo vada e habadugu. Taunabunai, egu badu baine diho ina gabu latanai, bona ta ese basine habodoa diba. 26 A Iuda pavapavana ese Iehova inanadaina totona vada e siaimui mai; taunabunai ini ba hamaoroa toma, baoto, Iehova, Israel Diravana, na ini e gwau tomamu: Badina be vada o kamonai herevadia daidiai 27 o helalo kerehai, bona Dirava ena hereva, ina gabu mai inoholaina taudia ida ihadikalaidia ḡaudia, o kamonai negana ai na vairagu ai o hahemanau, bona emu dabua vada o dare bona vairagu ai vada o tai; una dainai (Iehova na e tomamu) lau ese danu vada na kamonai henimu. 28 A itaia, lau ese tubu tama ida baina haheboumui, gara bae laohaimu mai mainomu ida; a dika iboudiai ina gabu mai inoholaina taudia ida latadiai baina mailai na oi matamu ese basie ita. Bena idia ese una hereva na hanua pavapavana dekena e loulaia lao.

29 Bena hanua pavapavana na e hesiai, Iuda bona Ierusalem tau-badadia iboudiai e haboudia. 30 Bena hanua pavapavana na Iehova ena dubu ai e dae kau, bona Iuda taudia iboudiai bona Ierusalem inoholaina taudia iboudiai, bona hahelaḡa taudia bona Levi taudia, taunimanima iboudiai kikina-badana danu ia ida; bena ia ese taravatu bukana, Iehova ena dubu ai e davaria ḡauna, herevadia iboudiai na idia vairadiai e duahi hedinarai. 31 Bena hanua pavapavana na ena gabu ai e gini, Iehova vairanai e gwau hamata, Iehova ena dala ai baine raka, bona ena haheḡani bona ena hahediba herevadia bona ena taravatu baine badinadia mai lalona idoinai bona mai laumana idoinai ida, bona taravatu herevadia una buka lalonai e hetore na karadia do baine kara. 32 Bena Ierusalem bona Beniamina taudia na e haduadia idia danu unu bae gwau hamata toma. Bena Ierusalem inoholaina taudia na Dirava, senedia edia Dirava, ena taravatu heḡereḡerena ai e kara. 33 Bena Iosia ese kara dika-hereadia iboudiai na Israel taudia edia tano idoinai lalona amo e abidia oho; bona Israel ai e nohova taudia iboudiai na e haduadia, Iehova, edia Dirava, isiaina bae lao heni. Iena nega ai idia na Iehova, senedia edia Dirava, ena dala amo asie raka siri.

Copyright information for `MEU