2 Kings 21

Manase, Iuda pavapavana

Manase e lohia matama negana ai ena mauri laḡanidia na gwauta-rua; ena lohia laḡanidia na imahai-ima Ierusalem ai. Sinana ladana na Hefisiba. Ia na Iehova vairanai e kara havara, Iehova ese Israel taudia vairadiai e luludia lasi besedia edia kara dika-hereadia heḡereḡeredia. Badina be atai gabudia ia tamana Hesekia ese e habuadia tari na ia ese ma e haginidia lou; bona ihaboulaina patadia e haginidia Baal ena, bona kaivakuku ta e karaia, Israel pavapavana Ahaba ese e karaia heḡereḡerena; bona guba hisiudia iboudiai e toma henidia diho bona isiaidia e lao heni. Iehova ena dubu ai danu ia ese ihaboulaina patadia haida e haginidia; dubuna bunai Iehova ese vada e herevalaia, eto “Ierusalem ai lau ladagu baina atoa”. Ia ese ihaboulaina patadia e haginidia, guba hisiudia iboudiai edia, Iehova ena dubu maḡuna ruaosi lalodiai. Ia ese danu natuna na haḡole-oho boubouna ḡauna ai e halaoa, bona mari bona bagu-haoro karadia e kara, bona rohe taudia bona mea taudia na e daidaidia. Iehova vairanai e kara havara-havara, bona e habadua. Hari kaivakuku e karaia, ladana Asera, na dubu ai e haginia; dubuna bunai Iehova ese David bona David natuna Solomon e herevalai henidia, eto “Ina dubu ai bona Ierusalem, Israel iduhudia iboudiai lalodia amo vada na abia hidi hanuana, lalonai lau ladagu baina atoa ela bona hanaihanai; bona Israel taudia na senedia na henidia tanona murimurinai basina haloaloadia lou; ḡau tamona na henidia haheḡanina idoinai bona egu hesiai tauna Mose ese e henidia taravatuna idoinai bae badina namonamo”. A idia na asie kamonai; bena Manase ese e dibaḡanidia dainai Iehova ese Israel taudia vairadiai e habuadia tari besedia edia kara dika na idia edia ese e hereadia.

10 Bena Iehova na peroveta taudia, ena hesiai taudia, ududia amo e hereva, eto, 11 Manase, Iuda pavapavana, na ini kara dika-hereadia vada e kara, bona Amoro taudia, ia e gunalaia taudia, edia kara dika ia ese vada e hereadia, bona ena kaivakuku amo Iuda taudia vada e hakaradia dika; 12 una dainai Iehova, Israel Diravana, na ini e gwau tomamu: A itaia, lau ese Ierusalem bona Iuda latadiai dika badana baina havaraia, bena bae kamonai taudia na taiadia bae heḡara-heḡara. 13 Bena Ierusalem daenai Samaria ena hahetoho varona bona Ahaba iduhuna ena gini-maoro varona baina veridia; bena Ierusalem na baina dahua, nau e dahuamu na heto, e dahuamu bena e karuhia hebubumu. 14 Lau dihigu orena baina negedia daure, inaidia imadia ai baina atodia; bena inaidia iboudiai adia hirua bona dinadia ai bae hahelao. 15 Badina be idia na lau vairagu ai vada e kara dika, bona vada e habadugu, senedia na Aigupto amo e raka lasi dinana ema bona hari dina.

16 Ina danu, Manase ese asi edia kerere taudia hutuma raradia e hahebubu ela bona Ierusalem vada e hahonua, duduna ela bona duduna; bona Iuda taudia na kara dika amo e hakaradia dika, bena Iehova vairanai ma e kara dika.

17 Manase ena kara oredia, e kara karadia iboudiai, bona ena kara dikadia, sivaraidia na Iuda Pavapavadia Sisigadia Bukana ai vada e hetore, ani? 18 Bena Manase na tubu tama dekediai e mahuta; iena ruma uma-umana lalonai, Usa ena uma-uma ai, e guria. Bena natuna Amon na ia gabuna ai e lohia.

Amon, Iuda pavapavana

19 Amon e lohia matama negana ai, ena mauri laḡanidia na ruahui-rua; laḡani rua hona e lohia, Ierusalem ai. Sinana ladana na Mesulemete, Harusu tau lotoba natuna. 20 Ia na Iehova vairanai e kara havarava, tamana Manase e kara havarava heḡereḡerena. 21 Tamana ese e rakalaiva daladia iboudiai na ia ese danu e rakalaiva, bona tamana ese isiaidia e lao heniva kaivakukudia na ia ese danu isiaidia e lao heniva bona e toma henidia dihova. 22 Ia ese Iehova, senena edia Dirava e rakatania, bona Iehova ena dala ai se raka. 23 Amon ena hesiai taudia ese ia ihadikana dalana e henegalaia, bena idia ese hanua pavapavana na ena ruma ai e alaia mase. 24 A una tano taudia ese King Arnon ihadikana e henegalala taudia iboudiai na e aladia mase; bena idia ese ia natuna Iosia na hanua pavapavana ai e halaoa, ia gabuna ai. 25 Amon ena kara oredia sivaraidia na Iuda Pavapavadia Sisigadia Bukana ai vada e hetore, ani? 26 Bena ena gara ai e guria, Usa ena uma-uma ai; bena natuna Iosia na ia gabuna ai e lohia.

Copyright information for `MEU