2 Kings 22

Iosia, Iuda pavapavana

Iosia e lohia matama negana ai, ena mauri laḡanidia na taurahani. Ena lohia laḡanidia Ierusalem ai na toiahui-ta. Sinana ladana be ledida; ia na Adaia tau Boskata natuna. Ia na Iehova vairanai e kara maoromaoro, senena David ena dala idoinai e rakalaia, se raka siri, idiba kahana ai eiava lauri kahana ai.

Taravatu Bukana e davaria

King Iosia ena lohia laḡanina ihagwauta-taurahanina ai, ia ese Safana, toretore tauna, Asalia Mesulama natuna, na e siaia lao, Iehova ena dubu ai; eto, Hahelaḡa tauna badana Hilkia dekena baola, taunimanima ese Iehova ena dubu ai vada e vareailai monidia, iduara inarina taudia ese idia edia amo vada e abi ḡaudia, na ia ese baine hagau; bena ḡaukara taudia Iehova ena dubu e itaia taomu na baine henidia. Bena idia ese Iehova ena dubu ai dubu ihanamo-louna ḡaukaradia e karamu taudia baine henidia; unu na kamuta taudia bona ruma ihaginidia taudia bona nadi iḡaukaralaidia taudia. Una moni amo danu au bona e ḡei nadidia bae hoi, dubu ibanilaina. A unu imadia ai bae ato monidia igaukaralaidia daladia na basie nanadailaidia, badina be idia ese e ḡaukaralai momokanimu.

Bena hahelaḡa tauna badana Hilkia ese toretore tauna Safana e hereva henia, eto, Taravatu bukana na vada na davaria, Iehova ena dubu ai. Bena Hilkia ese una buka na Safana e henia; bena ia ese e duahia. Bena toretore tauna Safana na hanua pavapavana dekena ema, e hamaoroa, eto, Emu hesiai taudia na dubu ai e davaria monina idoinai vada e bubua diho, bona Iehova ena dubu ḡaukarana e itaia taomu taudia imadia ai vada e atoa. 10 Bena toretore tauna Safana ese hanua pavapavana ma e hamaoroa, eto, Hahelaḡa tauna Hilkia ese buka ta e henigu. Bena Safana ese hanua pavapavana vairanai e duahia hedinarai.

11 Hanua pavapavana ese taravatu bukana herevadia e kamonai negana ai, ena dabua e dare. 12 Bena hanua pavapavana ese hahelaḡa tauna Hilkia, bona Ahikama Safana, bona Akaboro Mikaia, bona toretore tauna Safana, bona Asaia, hanua pavapavana ena hesiai tauna ta, na e haḡanidia, eto, 13 Aola, Iehova ba nanadaia, lau daigu ai bona taunimanima daidiai, bona Iuda idoinai dainai, hari e davaria bukana herevadia ba henanadailai; badina be Iehova ena badu vada e vara bona e haḡaraḡaraia herea ita latadai, badina be tamada ese ina buka herevadia asie badinadia, bona ia lalonai ita herevada e tore ḡaudia iboudiai na asie kara.

14 Taunabunai, hahelaḡa tauna Hilkia, bona Ahikama bona Akaboro bona Safana bona Asaia, na peroveta hahinena Hulda, Salumu Tikva adavana, dekena ela. Una Salumu na Harahasa tubuna. Ia na pavapava ena dabua inaridia tauna. Hahine na Ierusalem kaha matamatana ai e nohova. Idia na ia ida e hereva-hereva. 15 Bena ia ese e hamaorodia, eto, Iehova, Israel Diravana, na ini e gwau tomamu: dekegu e siaimui mai tauna ba hamaoroa, baoto, 16 Iehova na ini e gwau tomamu: A itaia, lau na dika baina havaraia, ina gabu latanai bona inoholaina taudia latadiai, Iuda pavapavana ese vada e duahia bukana herevadia iboudiai heḡereḡeredia ai. 17 Badina be lau vada e rakatanigu, bona idau dirava vairadiai muramura mai bonadia vada e gabu; imadia ḡaukaradia iboudiai amo vada e habadugu. Taunabunai, egu badu baine ḡaraḡara ina gabu latanai, bona ta ese basine habodoa. 18 A Iuda pavapavana ese Iehova inanadaina totona vada e siaimui mai; taunabunai ini ba hamaoroa toma, baoto, Iehova, Israel Diravana, na ini e gwau tomamu: Badina be vada o kamonai herevadia daidiai 19 o helalo kerehai bona Iehova vairanai o hahemanau; bona ina gabu mai inoholaina taudia ida ihadikalaidia herevadia na gwaurai, gabudia bae ḡagae bona heuduguirai gaudia ai baela nato, negana ai na emu dabua o dare bona vairagu ai o tai; una dainai (Iehova na e tomamu) lau ese danu name kamonai henimu. 20 Taunabunai, tubu tama ida baina haheboumui, gara bae laohaimu mai mainomu ida; a dika idoinai baina mailaia ina gabu latanai na oi matamu ese basie itaia. Bena idia ese una hereva na hanua pavapavana dekena e loulaia lao.

Copyright information for `MEU