2 Kings 23

Iuda taudia edia Gwauhamata

Hanua pavapavana na e hesiai, bena Iuda bona Ierusalem tau-badadia iboudiai na ia dekenai e hebou. Bena hanua pavapavana na Iehova ena dubu ai e dae kau, bona Iuda taudia iboudiai bona Ierusalem inoholaina taudia iboudiai, bona hahelaḡa taudia bona peroveta taudia, taunimanima iboudiai kikina-badana danu ia ida; bena ia ese taravatu bukana, Iehova ena dubu ai e davaria ḡauna, herevadia iboudiai idia vairadiai e duahi hedinarai. Bena hanua pavapavana na au-tubua badibadinai e gini, Iehova vairanai e gwau hamata, Iehova ena dala ai baine raka, bona ena haheḡani bona ena hahediba herevadia bona ena taravatu baine badinadia mai lalona idoinai bona mai laumana idoinai ida, bona taravatu herevadia una buka lalonai e hetore na karadia do baine kara. Bena taunimanima iboudiai na ia ida e gwau hamata hebou.

King Iosia ena kara

Bena hanua pavapavana ena hahelaḡa tauna badana Hilkia, bona hahelaḡa taudia ia henunai, bona dubu iduarana inarina taudia, na e haḡanidia, dubu kohudia iboudiai, Baal ena eiava Asera ena eiava guba hisiudia iboudiai edia e kara ḡaudia, na Iehova ena dubu lalona amo bae lasilaidia; bena ia ese Ierusalem murimurinai e gabudia, Kidron badina tanodia ai; bena kahudia na Betele e laohai. Dirava koikoidia edia hahelaḡa taudia, Iuda pavapavadia ese vada e haginidia Iuda hanuadia bona Ierusalem heḡeḡe-madai ai atai gabudia ai muramura mai bonadia bae gabu totona taudia, na ia ese e hadokodia; bona muramura mai bonadia e gabu Baal ena, bona dina bona hua bona noho-bou hisiudia bona guba hisiudia iboudiai edia, taudia danu. Ia ese au-tubua ladana Asera na Iehova ena dubu lalona amo e abia, e laohaia Ierusalem murimurinai, ela bona Kidron sinavaina. Kidron sinavaina badibadinai ia ese e gabua, e kwadia dimura-dimura, bena kahuna na hanua taudia garadia ai e negea. Kara bodaga ikarana amo e toma dihova taudia e hanohodiava rumadia, Iehova ena dubu lalonai, na ia ese e hagari; unu ruma lalodiai hahine ese Asera ena dabua e hatu. Hahelaḡa taudia iboudiai Iuda hanuadia amo e hakaudia lasi, bona atai gabudia, hahelaḡa taudia ese muramura mai bonadia e gabuva gabudia, na ia ese e hamirodia, Geba amo ela bona Bere-sieba. Ikoukou ai gabu helaḡadia danu, Iosua, hanua lohiana, ena ikoukou raka-vareaina badinai e miava, hanua ikoukouna lauri kahana ai, ia ese e ḡiḡidia dobi. Ḡau tamona, atai gabudia edia hahelaḡa taudia ese Iehova ena ihaboulaina patana Ierusalem ai asie dara henia dae, a tadikakadia bogaragidiai se hatubua flaoana e aniva.

10 Ia ese danu Tofete, Hinom natuna edia koura ai, e hamiroa, tau ta ese natuna maruanena eiava natuna hahinena na lahi ai basine haḡoledia oho Molek ena helaoreana. 11 Hosi laulaudia danu, Iuda pavapavadia ese e hahelaḡadia dina ena, bona Iehova ena dubu raka-vareaina ai, hesiai tauna Natana-melek ena daiutu badibadinai, dubu murimurinai e atodia, na ia ese ma e abidia oho; bona dina ena kariota danu e gabudia. 12 Bona ihaboulaina patadia, Ahasa ena atai-daiutuna guhina latanai Iuda pavapavadia ese e kara ḡaudia, bona ihaboulaina patadia Manase ese Iehova ena dubu maḡudia ruaosi lalodiai e larebadia, na ia ese e haheḡiḡidia dobi, e hamakohidia dimura-dimura, bena ḡahudia na Kidron sinavaina ai e negedia.

13 Hanua pavapavana ese danu atai gabudia Ierusalem mairiveina kahana ai, bodaga ororona diho kahana ai, na e hamirodia. Unu atai gabudia na Solomon, Israel pavapavana, ese e larebadia, Astaroto, Sidono taudia edia dirava dikana, bona Kemoso, Moab taudia edia dirava dikana, bona Milkom, Amono taudia edia dirava dikana, edia. 14 Ia ese danu nadi au-tubuadia e hamakohidia bona au au-tubuadia e utudia, bena gabudia na mase taudia turiadia amo e hahonudia.

15 Ihaboulaina patana Betele ai, atai gabuna Ieroboam Nebata, Israel e hakaraia dika tauna, ese e haginia ḡauna, una danu ia ese e haheḡiḡia dobi; nadidia na e hamakohi dimura-dimura, ḡahu ai e halaodia; Asera ena au-tubua danu e gabua. 16 Iosia e roha kerehai, bena gara haida e itadia ororo ai; bena e hesiai, turia na gara amo e abidia; ihaboulaina patana latanai e hagoledia oho; unu amo e hamiroa, Iehova ena hereva, Dirava ena tau uduna amo e gwauraia, lalonai unu ḡau e gwaurai guna heḡereḡerena. 17 Bena ia eto, Una be dahaka pupuna na itaiamu unuseni a? Hanua taudia ese e hamaoroa, eto, Una na Dirava ena tau garana; ia na Iuda amo ema, bona Betele ihaboulaina patana ihadikana karadia oi ese vada o kara na ia ese e gwaurai guna. 18 Ia eto, Baine mia, tau ta ese ia turiana basine abidia oho. Taunabunai ia turiana, bona peroveta tauna ta Samaria amo ema tauna turiana, asie daudia toho.

19 Samaria hanuadia edia atai gabudia helaḡadia iboudiai danu, Israel pavapavadia ese e kara bena unu amo Iehova e habadua ḡaudia, na Iosia ese e abidia oho; Betele ai e kara karadia iboudiai heḡereḡeredia na idia danu e kara henidia. 20 Bona unu atai gabudia edia hahelaḡa taudia na ihaboulaina patadia latadiai e aladia mase, bena mase taudia turiadia na latadiai e haḡoledia oho. Bena ia na Ierusalem e lou lao.

21 Bena hanua pavapavana ese taunimanima iboudiai e haḡanidia, eto, Iehova, emui Dirava, ena lagau-hanai ariana ba karaia, ina taravatu bukana ai e hetore heḡereḡerena. 22 Badina be una lagau-hanai ariana na asie karaiava, hahemaoro taudia ese Israel besena e hahemaoro heniava negana amo ema bona Israel pavapavadia bona Iuda pavapavadia edia dina iboudiai lalodiai. 23 A King Iosia ena lohia laḡanina ihagwauta-taurahanina ai, ina lagau-hanai ariana na Ierusalem ai e karaia, Iehova ena.

24 Iosia ese rohe taudia bona mea taudia bona laulau helaḡadia bona kaivakuku, bona kara dika-hereadia iboudiai Iuda ai bona Ierusalem ai e heitava, na e atodia tabe, taravatu herevadia, hahelaḡa tauna Hilkia ese Iehova ena dubu ai e davaria bukana ai e hetore gaudia, iboudiai anidia ihavaradia helaoreana. 25 Nega gunadia ai asi pavapava ta ia heḡereḡerena, Iehova e lou henia mai lalona idoinai, mai laumana idoinai, bona mai goadana idoinai ida, Mose ena taravatu idoinai heḡereḡerena; bona ia murinai danu asi pavapava ta e tore isi, ia heḡereḡerena.

26 A Iehova na ena badu-garaḡara siahuna amo se raka oho. Ena badu dounu e haḡaraḡaraiava Iuda enai, Manase ese e habadua loulouva dainai. 27 Iehova eto, Lau ese Iuda danu lau vairagu amo baina abia oho, Israel na abia oho heḡereḡerena; bona ina hanua, na abia hidi hanuana, Ierusalem, bona ina dubu, na herevalaia nato “Lau ladagu na unuseni ai baine mia” dubuna, na baina negedia daure.

28 Iosia ena kara oredia, e kara karadia iboudiai, sivaraidia na Iuda Pavapavadia Sisigadia Bukana ai vada e hetore, ani? 29 Iena nega ai Farao Neko, Aigupto pavapavana, na Asuria pavapavana dekena ela, Eufrate sinavaina ai. Bena King Iosia na ia ihedavari-henina ela. Bena Farao Neko ese e itaia negana ai e alaia mase, Megido ai. 30 Bena ena hesiai taudia ese kariota ta amo masena ai e laohaia, Megido amo ela bona Ierusalem; bena iena gara korikori ai e guria. Bena Iuda taudia ese Iehoahasa, Iosia natuna, e abia, e horoa, pavapava ai e halaoa, tamana gabuna ai.

Iehoahasa, Iuda pavapavana

31 Iehoahasa e lohia matama negana ai, ena mauri laḡanidia na ruahui-toi; ia na hua toi hona Ierusalem ai e lohia. Sinana ladana na Hamutala; ia na leremia, tau Libna, natuna. 32 Iehoahasa na Iehova vairanai e kara havara, senena edia kara iboudiai heḡereḡeredia ma e kara. 33 Bena Farao Neko ese e ḡuia, Ribla ai, Hamat tanona ai, Ierusalem ai basine lohia helaoreana; bona heaiva monina na tano taudia ediai e gwauraia,silver talent sinahu-ta bonagold talent ta.
Readia K92,000 sisivana, ita edia moni ai.
34 Bena Farao Neko ese Eliakim, Iosia natuna, e abia, pavapava ai e halaoa, tamana Iosia gabuna ai, bona lada matamatana e henia, Iehoiakim eto. A Iehoahasa na e hakaua ela Aigupto; bena unuseni ai e mase. 35 Bena Iehoiakim esesilver bonagold na Farao e henia, a tano taudia edia amotax e abia, Farao ena haheḡani heḡereḡerena ai moni baine henia totona. Silver bonagold na tano taudia edia amo e abi, ta ta ena taḡa ena taga e hahetohoa heḡereḡerena, Farao Neko baine henia totona.

Iehoiakim, Iuda pavapavana

36 Iehoiakim e lohia matama negana ai, ena mauri laḡanidia na ruahui-ima; ena lohia laḡanidia Ierusalem ai na gwauta-ta. Sinana ladana na Sebida; ia na Pedaia, tau Rumaha, natuna. 37 Ia na Iehova vairanai e kara havara, senena edia kara iboudiai heḡereḡeredia ma e kara.

Copyright information for `MEU