2 Kings 6

Ira na e keni dae

Peroveta oreana taudia ese Elisaia e hamaoroa, eto, A itaia, emu hereḡu henunai a nohomu gabuna na maraḡi herea. Mani Ioridane sinavaina aiala, ta ta au ta ta baia abi, bena emai noho gabuna ta baia karaia unuseni ai. Ia na e haere, eto, Aola. Bena idia ta eto, Mani emu kara oi danu emu hesiai taudia ida baitala. Ia na e haere, eto, Baitala. Taunabunai ia na idia ida ela. Ioridane ai e kau, bena idia ese au haida e hagaridia. Bena tau ta ese au ta e hagaria negana ai na ena ira kwarana na ranu ai e moru. Bena e boi lolo, eto, Biagugu e, ihabaigu, na abia torehai. Dirava ena tau eto, Edeseni ai e moru? Ia ese gabu na e haheitalaia; bena Elisaia ese auau ta e utua, una gabu ai e tahoa dobi, bena auri na e hakenia dae. Ia eto, Avabia isi, Taunabunai, ia na e dau lao, e abia.

Elisaia ese Suria taudia imadia amo e roho mauri

Nega ta, Suria pavapavana ese Israel e tuari heniava negana ai, ia na ena hesiai taudia ida e henega bou, gabu ta ladana e hatoa, eto, Una gabu ai baina taruha. A Dirava ena tau ese hereva na Israel pavapavana dekena e siaia lao, eto, Una gabu na basio rakaia hanai, badina be Suria taudia na unu a be laomu. 10 Bena Israel pavapavana ese haida e siaidia lao, Dirava ena tau ese e hamaorolaia gabuna baela. Unuhetomana ia ese vaevae e sisiba heniava, bena e roho mauri, dia nega tamona eiava nega rua hona.

11 Suria pavapavana lalona e hekwarahiva ina ḡau dainai, bena ia ese ena hesiai taudia e boiridia, e gwau henidia, eto, Basio hamaorogu ita bogaragidai daika ese Israel pavapavana e duruamu a? 12 Bena ena hesiai taudia ta eto, Egu lohia bona egu pavapava e, ta lasi; to Elisaia, peroveta tauna Israel ai e nohomu, ia ese emu mahuta daiutuna lalonai o gwauraimu herevadia na Israel pavapavana e hamaorolaiamu. 13 Ia eto, Aola, ba itaia ia be edeseni ai; bena haida na ia idabai-taona baina siaidia lao. Haida ese e hamaoroa, eto, A kamonai, tauna na Dotan ai. 14 Taunabunai, ia ese hosi bona kariota bona tuari oreana badana ta e siaidia. Idia na hanuaboi ai ela, hanua e koua heḡeḡe.

15 Dirava ena tau ena hesiai tauna na daba matana ai e tore isi, e raka lasi, e itaia, tuari oreana ta mai hosidia bona mai kariotadia ida, ese hanua vada e koua heḡeḡe. Hesiai tauna eto, Biagugu e, madi ihabaida! Ede baita kara toma? 16 Elisaia eto, Basio gari; badina be ita e bamodamu taudia na hutuma, a idia e bamodiamu taudia na dia hoho. 17 Bena Elisaia e ḡuriḡuri, eto, Iehova e, na noimumu, ia matana a hapapa, baine itaia helaoreana. Taunabunai, Iehova ese una eregabe tauna matana e hapapadia, bena e itaia, ororo na lahi hosidia bona kariotadia ai e honu, idia ese Elisaia e ḡeḡea ahu. 18 Bena Suria taudia na ia iabina totona e hekei diho negana ai, Elisaia ese Iehova e ḡuria, eto, Na noimumu, ina orea na matadia a huari kepulu. Taunabunai ia ese matadia e huari kepulu, Elisaia ena ḡuriḡuri heḡereḡerena. 19 Bena Elisaia ese e hereva henidia, eto, Dalana na dia inai, bona hanuana na dia inai; murigu amo a raka, bena baina hakaumui lao, o tahuamu tauna dekenai. Bena ia ese e hakaudia lao, ela bona Samaria.

20 Samaria ai e raka vareai, bena maoromaoro Elisaia eto, Iehova e, ini taunimanima matadia ba hapapadia, do bae ita. Taunabunai Iehova ese idia matadia e hapapadia, bena e itaia, idia na Samaria bogaraginai. 21 Israel pavapavana ese e itadia, bena ia ese Elisaia e hamaoroa, eto, Tamagu e, aina aladia mase eiava? 22 Ia na e haere, eto, Basio aladia mase. Emu dare bona emu peva amo boma abidia mauri taudia na boma aladia mase a? Aniani bona ranu na vairadiai ba dabara, bae aniani bona ranu bae inu, bena biagudia dekena baela. 23 Taunabunai, ia ese aria badana e dabaraia adia; bena e aniani bona e inuinu vaitani murinai ia ese e siaidia, bena biagudia dekena ela. Suria taudia ese Israel tanona asie daea lou.

Samaria e koua heḡeḡe

24 Una murinai Ben-hadad, Suna pavapavana, ese ena tuari oreana idoinai e haboua, e dae ela, Samaria e koua heḡeḡe. 25 Bena doe bada e vara Samaria ai, vada e koua heḡeḡe dainai; ela bona doniki kwarana ta e hoia, davana nasilver sekeledia taurahani-ahui,
“Sekele taurahani-ahui”. Readia K20 heḡereḡerena, ita eda moni ai. “Sekele ima”. Readia K1.25 heḡereḡerena, ita eda moni ai.
bona pune taḡena kebere ta davana nasilver sekeledia ima.
26 Nega ta Israel pavapavana na magu latana amo e raka hanaiva ai, hahine ta ese e boi henia, eto, Egu lohia bona egu pavapava, a durugu. 27 Ia eto, Bema Iehova ese basine durumu, lau na ede amo baina durumu? Uit ikwadilaina gabuna amo eiava vine itaolaina gabuna amo a? 28 Bena hanua pavapavana ese hahine na e nanadaia, eto, Emu hekwakwanai be dahaka? Hahine na e haere, eto, Ina hahine ese e hamaorogu, eto “Natumu a heni, hari dina ai baita ania, bena kerukeru lau natugu baita ania”. 29 Taunabunai, lau natugu a nadua, bena a ania. Daba-rerena ai lau ese na hamaoroa, nato “Natumu a heni, baita ania”; a ia ese natuna e hunia. 30 Hanua pavapavana ese hahine ena hereva e kamonai; bena maḡu latana amo rakana ai ia ese ena dabua e dare; bena taunimanima ese e itaia, ena dabua henunai na puse dabuana vada e hahedokilai. 31 Bena ia eto, Hari dina ai Elisaia Safata kwarana na pagana ai bema mia, Dirava ese bema hadikagu, bona ma bema hadikagu bada.

32 Elisaia na ena ruma ai e helaiva, bona tau-badadia na ia ida hehelai. Hanua pavapavana ese tau ta ia vairana amo vada e siaia lao; a hari gwaukau tauna do se kau ai, Elisaia ese unu tau-badadia e hamaorodia, eto, O itaiamu, una roroma tauna vada e hesiai, lau kwaragu iabi-ohona totona. Gwaukau tauna bainema negana ai, iduara na ba koua kunuka-kunuka, ia ba laoa ahu. Biaguna aena regedia na ia murina amo se maimu a? 33 Dounu e hereva henidiava ai, hanua pavapavana na ia dekenai e kau, eto, Ina hehvarahi na Iehova ena amo. Iehova ma baina naria anina be dahaka?

Copyright information for `MEU