2 Thessalonians 2

Lohiabada ma bainema

Varavaramai e, ai a noimuimu, eda Lohiabada Iesu Keriso ma bainema bena ia ida baita hebou dainai lalomui na basie haraḡa-haraḡa; bona, ena be lauma ta eiava hereva ta eiava revareva ta, ai emai na heto, baineto “Lohiabada ena dina vada be gini daemu”, to kudoumui na basie hetaha. Ta ese ḡau ta ai basine koimui; badina be una dina na basine gini dae ela bona raka-muri baine vara, bona dika tauna, hahemase natuna, baine hedinarai guna. Ia ese dirava ai e halaodiamu bona e toma heni dihomu ḡaudia iboudiai e inai henidiamu, bona e hereadiamu e tomu; Dirava ena helai gabuna helaḡana ai e helaimu, sibona Dirava ai e hahelaomu.

Asio helalo unemu a, ta noho hebouva negadia ai ini ḡau na hamaorolaimuiva? Harihari ia iruna tauna dibamui; baine rua ela bona ena nega korikori ai baine hedinarai. Badina be dika na e ḡaukara hehunimu; basine hedinarai ela bona iruna tauna baine heabi oho. Una negana ai hari dika tauna baine hedinarai; bena Lohiabada ese baine hahoho henia, baine alaia mase; ia maina diaridiarina ese baine ha-orea. Hari dika tauna na Satana ena siahu ai bainema, mai siahu koikoidia, mai toa koikoidia mai hoa karadia koikoidia ida. 10 Bona ia ese ena kara gagevagagevadia amo mase dalana ai e rakamu taudia baine koidia; badina be hereva momokani iura-henina ese bema hamauridia, to asie ura henia. 11 Badina binai Dirava ese lalodia baine haduhu, hereva koikoi bae abia dae helaoreana. 12 Bena hereva momokani asie abia dae a kara dika e moalelai taudia na baine hahemaoro henidia.

Ba gini tutuka-tutuka

13 Varavaramai e, Lohiabada ena lalokau taumui e, ai ese nega idoidiai Dirava a hanamoamu umui daimui ai. Badina be Dirava ese matamana amo e abimui hidi, Lauma ena hahelaḡa bona hereva momokani iabi-daena daidiai mauri bavabia. 14 Una dainai emai sivarai namo amo e boirimui, iseda Lohiabada Iesu Keriso hairaina bavabia helaoreana. 15 Taunabunai, varavaramai e, ba gini tutuka-tutuka; udumai amo eiava emai revareva ai a hadibamui herevadia na ba kahu tao tarika-tarika.

16 Eda Lohiabada Iesu Keriso bona Tamada Dirava, e lalokau henidamu bona ena harihari-bada ai mia-hanaihanai tauhalona bona helaro-namona vada e henida Diravana, ese 17 lalomui bae hakeru, bona kara namodia bona hereva namodia iboudiai lalodiai bae hagoadamui.

Copyright information for `MEU