2 Thessalonians 3

Sisiba herevadia

Varavaramai e, orena binai: ai daimai ai ba ḡuriḡuri, bena Lohiabada ena hereva na baine pere rohoroho, bena hutuma ese bae imodaia, umui ese o imodaiamu heḡereḡerena; bona ura kerere bona ura dika taudia imadia amo baine hamaurimai. Badina be haida mo mai edia abidadama. A Lohiabada na vada momokani; bena ia ese baine haginimui tutuka-tutuka, dika amo baine hamaurimui. Ai ese Lohiabada lalonai a abidadama henimuimu, a halḡanimui karadia o karamu bona ba kara. Lohiabada ese lalomui baine hakaudia, Dirava ena uraheni ai bona Keriso ena haheauka ai.

Varavaramai e, Lohiabada Iesu Keriso ladana ai a haḡanimuimu, e raka havara-havaramu taudia bona emai hahediba herevadia asie badinamu taudia edia amo ba raka oho. Umui dibamui ai ba haḡoimai hari namo; badina be ai na padamui ai asia kara havara-havarava, bona tau ta ana aniani asia ani kavava; dina hanuaboi a ḡaukarava, a hekwarahiva, umui baia hametaumui na garina. Unu a kara tomava, badina he dia asi emai siahudainai, a umui ese ba haḡoimai helaoreana. 10 Dekemui ai a nohova negana ai danu ina haheḡani a henimui, ato “Ta basine ḡaukara, ia na basine aniani”.

11 Haida haridia ame kamonai, bogaragimui ai e raka havara-havaramu, asie ḡaukaramu; unu na gado-dae gado-dae taudia. 12 Unu e kara tomamu taudia na Lohiabada Iesu Keriso ladana ai a haḡanidiamu bona a sisiba henidiamu, bae ḡaukara manaumanau, sibodia adia malamala bae ani.

13 Varavaramai e, kara namo ikarana ai basio hesiku. 14 Tau ta ese ina revareva ai a tore herevadia basine abi dae, ia toana ba itaia, bona bavatoa tabe, bena kopina baine hemarai. 15 To basio inai henia; ba sisiba henia, tadimui na heto. 16 Bena Maino Lohiana ese ena maino baine henimui, nega idoidiai bona gabu iboudiai. Lohiabada ese iboumui ai baine bamomui.

17 Ina hahenamo herevana na lau, Paulo, sibogu imagu amo na toreamu. Egu revareva iboudiai toadia na ini na tore tomamu.

18 Iseda Lohiabada Iesu Keriso ena harihari-bada na iboumui ai emui ai baine mia.

Copyright information for `MEU