Acts 6

Aposetolo idurudia taudia e abidia hidi

Unu dinadia ai, Iesu ibadinana taudia e hahutumava, bena Helene gado ai e herevava taudia ese Heberu gado ai e herevava taudia na e maumauraidia matama, badina be edia hahine vadodia na dina iboudiai aniani iharina ai e dabu loulouva.

Bena aposetolo ese Iesu ibadinana taudia hutuma e haboudia, eto, Ai ese Dirava ena hereva iharorolaina baia hadokoa aniani iharina totona na dia namo. Taunabunai, varavaramai e, umui na taumui hahitu avabidia hidi, haridia namodia taudia, Lauma bona aonega ai e honumu taudia; bena ina ḡaukara baia henidia. A ai ese nega idoinai ḡuriḡuri bona haroro baia goadalai.

Ina hereva na iboudiai ese e abia dae, bena haida e gwauraidia hidi: Stefano, abidadama bada bona Lauma Helaḡa ese e rohea tauna; bona Filipo; bona Prokoro; bona Nikanoro; bona Timona; bona Pamena; bona Nikolao, ia na tau Antioka, Iuda tauna ai e halaoa. Unu hahituosi na idia ese aposetolo vairadiai e haginidia. Bena aposetolo na e ḡuriḡuri guna, bena imadia latadiai e ato kau.

Bena Dirava ena hereva e piua rohorohova, bona Iesu ibadinana taudia Ierusalem ai e hahutumadiava; bona hahelaḡa taudia hutuma ese danu e abiabiraia.

Stefano e dabaia tao

Stefano na harihari-bada ai bona siahu ai e honu, bena ia ese hoa karadia bona toa badadia taunimanima vairadiai e karava. Bena e ruhadia nege oreana edia dubu taudia haida, bona Kurene bona Alesandrea bona Kilikia bona Asia taudia haida, ese Stefano ida e hepapahuahu. 10 To idia na asi siahudia bae gwaua tubu, badina be ena hereva na aonega ai bona Lauma ai e hahonua. 11 Una dainai idia ese haida lalodia e ani, baeto “Ai na ena hereva dikadia a kamonai, Mose bona Dirava e hadikalaidia”. 12 Unu amo idia ese hanua taudia bona heitatao taudia bona itorena taudia e haherou-heroudia; bena ia dekena e heau lao, vada e dabaia tao, kaunsil taudia vairadiai e laohaia.

13 Bena idia ese hahebade koikoi taudia e haginidia tore. Idia eto, Ina tau ese ina gabu helaḡana bona taravatu ihadikalaidia herevadia na se hadokomu. 14 Ai ese danu ena hereva a kamonai, eto “Iesu, tau Nasaret, ese ina gabu baine rohoa, bona Mose ese e henida karadia danu baine ha-idau”. 15 Bena kaunsil gabuna ai e helaiva taudia iboudiai ese e raraia tao, vairana e itaia, aneru ta vairana na heto.

Copyright information for `MEU