Amos 6

Israel ihabua-tarina

Siona ai e noho namonamomu
bona Samaria ororona ai asi garidia e nohomu taudia,
bese gini-gunana ena tatau hereadia,
Israel taudia e lao henidiamu taudia,
madi, ihabaidia!
Ba raka lao, Kalne baola, ba itaia;
unu amo Hamat badana baola;
bena ba hekei diho,
Gata, Filistia taudia edia hanua, baola.
Idia ese ini basileia e hereadiamu a?
Eiava edia tano na bada, emui tano be maraḡi, a?
Umui dika dinana o atoa daudaumu
bona daḡedaḡe ena vara badina o veria kahimu taumui,
na nanadaimuimu.

Aivori patadia ai e hekuremu
bona edia laḡa-ani patadia ai e eno deremu taudia,
mamoe natudia seri amo
bona boromakau natudia ubu-ubu gabuna amo e animu taudia,
madi, ihabaidia!
Gitara e hataidiamu ai ane kavakavadia e abimu
bona David na heto hatai-hatai ḡaudia idaudia e karamu taudia,
madi, ihabaidia!
Vine ranuna na nau amo e inuamu,
bona dehoro namo-hereadia amo taudia e dahudiamu,
a Iosef ena dika asie lalo hisihisilaiamu taudia,
madi, ihabaidia!
Taunabunai dauhai ihanohodia negana ai idia na bae laohaidia guna,
bona e eno deremu taudia edia moale baine boio.

Ḡaubada Iehova na sibona ladana ai vada e gwau hamata;
Dirava, Iehova Sabaota, na e herevamu e tomu:
Iakob ena heaḡi na inai henia badamu,
ena gabu aukadia danu na inai henidiamu;
hanua na baina kahua nege,
bona ia lalona ḡaudia iboudiai.

Tatau gwauta ruma tamona ai bema noho, idia na bae mase. 10 Bena mase tauna varavarana, tau-anina baine hagolea oho tauna, ese baine abia isi, turiana na ruma lalona amo murimuri ai baine laohai totona, bona ruma laloma kahana ai e nohomu tauna baine nanadaia, baineto “Tau ta doene noho eiava?”, bena una tau baine haere, baineto “Lasi”, negana ai, ia ma baineto “Eremu! Iehova ladana na basita hatoa”.

11 Badina be, a itaia, Iehova na e haheḡanimu,
bena ruma badana na bae huaria patapata,
bona ruma maraḡina na bae huaria sisisisi.
12 Hosi be haga nadidia ai e heaumu a?
Davara na boromakau mamaruanedia amo e ruaiamu a?
A umui ese hahemaoro ḡoevaḡoeva na mase muramurana ai vada o halaoa,
bona kara maoromaoro huahuana na muramura iditana ai vada o halaoa.
13 Umui ese Lo-debara o moalelaiamu,
o tomu “Sibomai emai goada ai Karanaimi vada a abia emai”, ani?
14 Dirava, Iehova Sabaota, na e tomu:
Israel taumui e,
a itaia, lau ese bese ta baina hatorea isi
umui ihadikamui totona,
bena bae hahisihisimui, Hamat raka-vareaina amo
ela bona Araba dokana.
Copyright information for `MEU