Amos 8

Mata-hanai ihahanina

Bena Ḡaubada Iehova ese ma e haheitalaigu, au huahua maḡedia bosea ta na itaia. Bena ia eto, Amos e, dahaka o itaiamu? Bena lau nato, Au huahua maḡedia bosea ta. Bena Iehova ese e hereva henigu, eto:

Egu bese Israel vada e maḡe, hahebua-tari enai;
nega ta ai basina lagaudia hanai lou;
dubu anedia na taitai ai bae hahelao una dina ai.
Ḡaubada Iehova na e herevamu.
Mase tau-anidia bae hoho,
gabu iboudiai murimuri ai bae tahodia lasi,
asi reḡereḡedia.

Hahedika vada e kahikahi Israel latanai

Umui, e dabumu taudia o moidia taomu
bona tano ena ogoḡami taudia o hamasediamu taumui,
ina na a kamonai!
Umui na o hereva hehenimu, o tomu:
Hua matamata ariana na edena nega ai baine ore,
bena aniani ḡaudia baita hoihoilai?
Bona dina helaḡa na edena nega ai baine ore,
bena uit baita hoihoilaia?
Bena efa baita hamaraḡia bona sekele baita habadaia,
bona hahetoho ḡaudia koikoidia amo taunimanima baita dibaḡanidia;
ogoḡami taudia nasilver amo baita hoidia,
bona e dabumu taudia na tamaka rua rua amo danu;
bona uit momona danu baita hoihoilaia.

Iakob ena heaḡi dainai Iehova vada e gwau hamata, eto:
Momokani edia kara ta basina laloa boio.
Una dainai tano baine heude-heude,
bona inoholaina taudia iboudiai bae tai,
idoinai baine dae, Nilo sinavaina na heto,
baine hegure-hegure, bena ma baiule diho,
Nilo, Aigupto sinavaina, na heto, ani?

Ḡaubada Iehova na e tomu: Una dina ai
dina tubua ai dina baina hadihoa,
bona dina diarina ai tanobada baina hadiburaia.
10 Emui aria na taitai ai baina halaodia,
bona emui ane iboudiai na rohe-ahu ai baina halaodia.
Koekoe iboudiai na puse dabuadia baina hariolaidia,
bona kwara iboudiai baina naudia.
Vara-edea merona itailaina heḡereḡerena ai baina halaoa,
bona dokona na dina iditana heḡereḡerena ai.

11 Ḡaubada Iehova na e tomu.
A itaia, nega na e maimu,
doe na tano latanai baina siaia.
Dia aniani ai eiava ranu ai basie dabu,
a Iehova ena hereva ikamonaidia ai hari.
12 Davara ta konena ela bona ma davara ta konena bae loa eva-eva,
mirigini kahana amo ela bona laurabada danu;
bae heau lao heau mai, Iehova ena hereva itahuna,
to basie davaria.

13 Una dina ai hane-ulato rami-hebou namo-hereadia bona uhau na
bae ranu mase, bae manori.
14 Asima, Samaria diravana, ladana ai e gwau hamatamu taudia
e tomu “Dan e, emu dirava e maurimu heḡereḡerena”,
bona “Bere-sieba dalana e maurimu heḡereḡerena”;
idia na bae keto,
bona nega ta ai basie tore isi lou.
Copyright information for `MEU