Deuteronomy 11

Taunabunai, Iehova, emui Dirava, ba ura henia bona ba kamonai henia; ena hahedua bona ena taravatu bona ena haheḡani ba badinadia nega iboudiai. Hari dina ai ba laloa namonamo: badina be ini hereva na dia natumui, ḡau ta asi dibadia bona ḡau ta asie itaia, asina herevalai henidiamu. Iehova, emui Dirava, ena mata-hakani, bona ena siahu, bona imana mai goadana ida e toia roro, ba haerodia. Ena toa bona ena hoa karadia, Aigupto ai e kara, Farao, Aigupto pavapavana, bona ena tano idoinai, ede e karadia toma danu ba haeroa. Aigupto ena tuari oreadia danu, mai edia hosi bona mai edia kariota, Davara Kakakakana abatana amo e habubunidia, umui e havamui negana ai; Iehova ese ma e habuadia tari ema bona hari dina. Ba laloa danu ede e karamui toma tano ḡaḡaena ai, ema bona ina gabu ai o kau.

Ma ba laloa, Datan mai tadina Abiram, Eliab Ruben natuna, ede e karadia toma: tano ese e hadonodia, idia bona edia ruma taudia bona edia kalaga bona edia mauri ḡaudia iboudiai, Israel taudia iboudiai bogaragidiai. Siahu karadia iboudiai Iehova ese vada e kara, umui ese matamui amo vada o ita.

Taunabunai, hari dina ai vada na haḡanilaimui haheḡanidia ba badinadia; bena ba goada, ba raka vareai, iabina totona ba hanai tanona vada bavabia; emui mauri dinadia bae hoho danu, Iehova ese senemui e gwaurai henidia hamata tanona ai. Una tano na idia mai garadia ida bae abia eto; ia na rata bona bada-ranuna e arumu tanona. 10 Badina be iabina totona ba rakavareai tanona na dia o rakatania tanona Aigupto bamona. Unuseni ai emui uhe o hado, bena aemui amo ihapariparidia ola, aniani avadia umadia na heheto. 11 A iabina totona ba raka hanai tanona na ororo bona koura tanona, guba medudia ese e haparipariamu tanona, 12 Iehova, emui Dirava, ese e reḡuamu tanona. Iehova, emui Dirava, ese e haḡereamu, nega iboudiai, laḡani matamana ela bona laḡani dokona.

13 Hari dina ai na haḡanilaimuimu haheḡanidia boma badinadia, Iehova, emui Dirava, boma ura henia, bona isiaina boma lao heni mai lalomui idoidiai bona mai laumamui idoidiai, 14 ia ese medu baine henimui ena nega korikori ai, medu gunadia bona medu gabedia, tano ihapariparina; bena emui uit bona emui vine ranuna bona emui dehoro ba haboudia. 15 Rei matamata danu baine henimui, emui seri adia; bavaniani, bogamui bae kunu. 16 Nahuamui ba toho, sibomui lalomui ba hekoi bena ba raka siri, dirava idaudia isiaidia ba lao heni bona ba toma henidia diho, na garina. 17 Unu boma kara toma, Iehova ena badu emui ai baine vara; bena ia ese guba baine koua, medu na basine diho bona tano anidia na basie vara; bena tano namona, Iehova ese e henimuimu tanona, lalona amo ba boio haraḡa.

18 Taunabunai, ini egu hereva na lalomui ai bona laumamui ai ba dogodia tao; idia na toa ai baela, imamui ai bona bagumui ai. 19 Natumui ba hadibalaidia, ruma ai o helaimu negadia ai, bona dala ai o rakamu negadia; ai, bona o hekuremu negadia ai, bona o tore isimu negadia ai, do ba herevalaidia. 20 Emui iduara ihua-ihuadia kahana kahana audia ai ba tore,bona emui ikoukou ai danu ba tore; 21 bena emui mauri dinadia bona natumui edia mauri dinadia bae hoho, Iehova ese senemui e gwaurai henidia hamata tanona ai, guba na tanobada daenai baine mia negana idoinai. 22 Badina be na haḡanilaimuimu haheḡanidia iboudiai boma badinadia namonamo, Iehova emui Dirava boma ura henia bona ena dala iboudiai lalodiai boma raka bona enai boma tao, 23 bena Iehova ese ini bese iboudiai na umui vairamui ai baine luludia Iasi, bena bese badadia, umui e hereamui besedia, gabudia do bavabi. 24 Aemui bae moi tao gabudia na bavabi, emui. Emui tano bavabia, tano ḡaḡaena amo ela bona Lebanon, bona Eufrate sinavaina amo ela bona Davara Badana. 25 Tau ta ese basine laomui ahu diba; Iehova ese gari baine havaraia, ba lao henia tanona Ialonai; iboudiai na umui garimui bae gari, ia ese e gwau henimui hamata heḡereḡerena.

26 O itaia, hari dina ai lau na hahenamo bona heuduguirai umui vairamui ai na atodiamu: 27 hahenamo be Iehova, emui Dirava, ena haheḡani, hari dina ai na haḡanilaimuimu ḡaudia, ba badinadia davana; 28 heuduguirai be Iehova emui Dirava ena haheḡani basio badinadia, a hari dina ai na haḡanilaimuimu dalana amo ba raka siri bona dirava idaudia, asi dibamui diravadia, muridiai ba raka na davana.

29 Bena Iehova, emui Dirava, ese bavabia emui tano ai ba halaoa tanona Ialonai baine hakaumui vareai negana ai, umui ese hahenamo na Gerisim ororona ai bavatoa, bona heuduguirai na Ebal ororona ai bavatoa. 30 Idia na Ioridane sinavaina unukahana ai, lahara kahana ai, dina e dihomu kahana ai, Kanaan taudia Araba ai e nohomu edia tano ai. Una tano na hevaira henina ai, More au helaḡana badinai.

31 Badina be umui ese Ioridane sinavaina ba hanaia, ba raka vareai, Iehova, emui Dirava, ese e henimuimu tanona bavabia, emui tano. Bena bavabia bona ba noholaia negana ai, 32 nahuamui ba toho, taravatu bona haheḡani iboudiai, hari ina dina ai na henimuimu ḡaudia, na ba badinadia.

Copyright information for `MEU