Deuteronomy 18

Hahelaḡa taudia Levi iduhuna amo bona Levi taudia iboudiai na asi ahudia bona asi edia tano Israel ai. Ahudia na ḡole-oho bouboudiabona boubou idau-idau taunimanima ese e mailaidiamu, Iehova ena. Asi ahudia edia bese taudia bogaragidiai: Iehova na idia ahudia, e gwau henidia hamata heḡereḡerena. Hahelaḡa taudia ahudia na boubou ḡaudia, boromakau eiava mamoe e mailaidiamu taudia edia amo bae abi. Ḡaudia bini: larolarona, bona vahana ruaosi, bona boukana, hahelaḡa tauna bae henia. Ini danu ba henia: emu uma anidia roboadia, bona emu vine ranuna bona emu dehoro roboadia, bona emu mamoe huina roboana. Badina be Iehova, emui Dirava, ese vada e abia hidi, emui iduhu iboudiai lalodia amo, baine gini, hahelaḡa karadia baine kara Iehova ladana ai, ia bona ia garana ela bona hanaihanai.

Levi tauna ta, ena ura korikori dainai ena noho hanuana Israel ai bema rakatania, Iehova baine abia hidi gabuna bema lao henia, ia ese hahelaḡa karadia baine kara Iehova ena Dirava ladana ai, varavarana Levi taudia Iehova vairanai hahelaḡa karadia unuseni ai e karamu heḡereḡerena. Bona idia ida ana baine abia, iboudiai ahudia bae heḡereḡere, a ahuna ena hanua amo baine abia na ma idau.

Iehova, emui Dirava, baine henimui tanona ai ba raka vareai negana ai, unu bese edia kara bodagadia na basio kara. 10 Ta ese natuna maruanena eiava natuna hahinena na lahi ai basine haḡolea oho. Ta ese babalau eiava mari eiava rohe karadia basine kara, eiava mea ḡaudia basine abi, 11 eiava basine vada, eiava lauma basine nanadaidia, eiava kara hehunidia basine kara, eiava mase taudia basine hahanedia. 12 Badina be unu kara bodagadia e karamu taudia na Iehova ese e dadaraidiamu; bona unu kara bodagadia daidiai Iehova ese umui vairamui amo e luludia lasimu. 13 Umui na asi bebeka-bebekamui ba gini Iehova, emui Dirava, vairanai. 14 Badinabe hari gabudia bavabidia besedia ese rohe taudia bona mari taudia e kamonai henidiamu; a umui be Iehova, emui Dirava, ese vada e gwaumui tao, basio karaia e tomu.

15 Iehova, emui Dirava, ese peroveta tauna ta, lau heḡereḡeregu, emui bese bogaragina amo baine abia hidi; bena ia erena ba kamonai: 16 Horeb ai, hebou badana dinana ai, Iehova, emui Dirava, o noia heḡereḡerena, oto “Mani emu kara Iehova, emai Dirava, erena basia kamonai lou, bona ina lahi badana basia itaia lou, baia mase garina”. 17 Bena Iehova ese e hereva henigu, eto, Edia hereva iboudiai na mamaoro-mamaoro: 18 lau na ediabese bogaragina amo peroveta tauna ta baina abia hidi, oi heḡereḡeremu; lauegu hereva na ia uduna amo baina gwaurai, bena lau ese baina haḡanilaia herevadia na ia ese baine gwaurai henidia. 19 Bena daika ese lauegu hereva, ia ese lau ladagu ai baine gwaurai, na basine abi dae, lau ese davana baina henia. 20 A peroveta tauna ta ese lau asina haḡanilaia herevana ta lau ladagu ai baine gwauraia, eiava dirava idaudia ladadia ai baine hereva, una peroveta tauna na baine mase. 21 Readia oi lalomu ai baoto “Iehova ese se gwauraia herevana na ede baia diba toma?” 22 Benaini; peroveta tauna ta ese hereva ta Iehova ladana ai baine gwauraia, bena una hereva na basine momokani bona anina basine vara, una na Iehova ese se gwauraia herevana. Peroveta tauna na sibona ena hekokoroku ai vada e hereva; ia garina basio gari.

Copyright information for `MEU