Deuteronomy 24

Tau ta baine headava, gabeai adavana basine ura henia, hahine ena kara mirona ta dainai, ia ese hekoho revarevana baine torea, baine henia; bena baine hadihoa. Hahine na baine diho; bena baine ura negana ai ia na bainela, tau ta ma baine adavaia. A adavana ihararuana basinema ura henia, bena hekoho revarevana baine henia bona baine hadihoa, eiava hari adavana ihararuana bema mase, ia adavana gunana, e hadihoa guna tauna, basine abia lou diba; vada e miro ienai. Una na kara mirona Iehova enai; Iehova, emu Dirava, ese baine henimu emu tano ai ba halaoa tanona na basio hamiroa.

Headava matamata tauna na tuari basinela, bona ḡaukara ta basio henia. Ena ruma ai baine noho, adavana baine hamoalea, ela bona laḡani ta baine ore.

Asi tauna ta ese uit iririlaina nadidia, henu nadina eiava atai nadina, baine abia, abitorehai toana; badina be unu bema kara toma, una tau ena mauri badina bema abia oho.

Tau ta ese bamona, Israel tauna ta, baine dabaia tao, ena hesiai tauna ai baine halaoa eiava baine hoia, ia na henao tauna; bae alaia mase. Unu amo kara dika unuhetomana na bogaragimui amo ba negea daure.

Nahuamu ba tohoa, lepra garina. Hahelaḡa taudia Levi oreana amo ese bae hadibalaimui karadia iboudiai ba kara; lau ese idia vada na haḡanidia heḡereḡerena, umui danu unu ba kara toma. Aigupto amo o raka lasi negana ai Iehova, emu Dirava, na dala ai Miriama ede e karaia toma vada ba laloa tao.

10 Dekemu tauna na ḡau ta ba henia torehai negana ai, ena ruma ai basio dae kau, ena abitorehai toana iabina. 11 Murimuri ai ba gini, ela bona abitorehai tauna baine raka lasi, ena abitorehai toana baine henimu. 12 Bema ogoḡami tauna, ena abitorehai toana basio dogoa tao rani; 13 dina baine diho ai ba henia lou; bena ena hetaru ai baine mahuta, bona baine hanamomu. Una na kara maoromaoro oiemu ai, Iehova, emu Dirava, vairanai.

14 Emu hesiai tauna mai davana, Israel tauna eiava noho-hedoa tauna,bema ogoḡami, emu kara na basine auka ienai. 15 Dina ta ta amo davana ba henia; dina do basine diho vada ba henia. Badina be ia na e ogoḡamimu, bona davana iabina e uramu. Ia ese Iehova baine tai henia, oi baine habadelaimu, bena oi na ba kerere na garina.

16 Tama na basie aladia mase natudia daidiai, bona memero na basie aladia mase tamadia daidiai; a ta ta ena kara dika ena kara dika daidiai bae aladia mase.

17 Hahemaoro basio hagagevaia, idau tauna enai eiava ihareha enai. Vabu ena dabua na basio abia, abitorehai davana. 18 Ba laloa tao, oi na hesiai iḡuidia ai o nohova Aigupto ai, bena Iehova, emu Dirava, ese e hamaurimu. Badina bunai lau ese ini na haḡanimu toma.

19 Emu uma anina ba utua negana ai, iḡui ta boma reaia, basio lou henia, basio abia. Idau tauna eiava ihareha eiava vabu ese baine abia. Unu boma kara toma, Iehova, emu Dirava, ese baine hanamomu, oi imamu ḡaukaradia iboudiai lalodiai.

20 Emu olive audia huahuadia ba hamorudia negana ai, au rigidia na basio kwadidia nega harua. Orena na idau tauna bona ihareha bona vabu ese bae abi.

21 Emu vine imeana ai danu vine ba pada negana ai, tano ai bae moru ḡaudia na basio gogodia; idau tauna bona ihareha bona vabu ese bae gogo. 22 Ba laloa tao, oi na hesiai iḡuidia ai o nohova Aigupto ai; badina bunai lau ese ini na haḡanimu toma.

Copyright information for `MEU