Deuteronomy 5

Mose ena haroro iharuana

Mose ese Israel taudia iboudiai e haboudia, e haroro henidia, eto, Israel e, a kamonai: ini taravatu bona haheḡani hari dina ai baina gwauraidia hedinarai na ba kamonaidia, bona lalomai ai bavabidia dae, bona ba badinadia. Iehova eda Dirava ese taravatu e henida Horeb ai; tamada se henidia, to ita, doini ta mauri nohomu bona hari dina ai ina gabu ai ta heboumu tauda iboudai vada e henida. Iehova ida o hevaira heheni una ororo ai, bena lahi bogaragina amo e hereva henimui. A lau be Iehova bona umui padamui ai na gini una negana ai, Iehova ena hereva na gwaurai henimui; badina be umui na lahi garina o gariva dainai ororo ai asio dara dae. Ia eto,

Lau binai Iehova, emu Dirava: Aigupto taudia edia tano bona edia iḡui rumana amo na hakaumu lasi.

Idau dirava ta basio abia lau vairagu ai.

Laulau ta basio koroa, ḡau ta laulauna: guba ḡauna ta, eiava tanobada ḡauna ta, eiava tanobada henuna ḡauna ta, basio karaia. Basio toma henia diho, bona isiaina basio lao heni. Badina be lau Iehova emu Dirava na vaḡeḡe Diravana: e inai henigumu taudia edia kara dika davadia na natudia bona tubudia latadiai baina kara ela bona uru ihatoina bona ihahanina; 10 a lau e ura henigumu bona egu taravatu e badinamu taudia baina bogadia hisi ela bona uru daha.

11 Iehova emu Dirava ladana na basio hatoa kava hatoa kava; badina be Iehova ladana baine hatoa kava tauna na Iehova ese kara dika tauna ai baine halaoa;.

12 Dina Helaḡa ba badinaia bona ba hahelaḡaia, Iehova, emu Dirava, ese e haḡanimu heḡereḡerena. 13 Dina tauratoi lalodiai emu ḡaukara idoinai ba karaia, 14 a dina ihahituna na dina helaḡana, Iehova, emu Dirava, ena. Una dina ai basio ḡaukara, oi eiava natumu hahinena, eiava natumu hahinena, eiava emu hesiai tauna eiava emu hesiai hahinena, eiava emu boromakau eiava emu doniki eiava emu ubu-ubu ḡauna ta, eiava idau tauna emu ruma ai e noho hedoamu, emu hesiai tauna bona emu hesiai hahinena na oi ida bae laḡa ani helaoreana. 15 Ba laloa, oi na hesiai tauna Aigupto tanona ai, bena Iehova, emu Dirava, ese imana e toia roro mai siahuna ida, unu amo e hakaumu lasi; taunabunai, Iehova, emu Dirava, ese vada e haḡanimu, Dina Helaḡa ba badinaia.

16 Tamamu sinamu ba matauraidia, Iehova, emu Dirava, ese vada e haḡanimu heḡereḡerena; bena emu mauri dinadia bae hoho, bona emu noho baine namo, Iehova, emu Dirava, ese e henimu tanona ai.

17 Basio ala-ala.

18 Basio heuda hanai.

19 Basio henao.

20 Dekemu tauna basio habadelaia koikoi.

21 Dekemu tauna adavana basio ḡahusia; ena ruma danu, eiava ena uma, eiava ena hesiai tauna, eiava ena hesiai hahinena, eiava ena boromakau, eiava ena doniki, eiava ena kohu ta, basio ḡahusi.

22 Ini hereva na Iehova ese iboumui ai e gwaurai henimui, ororo ai o hebouva negana ai. Lahi bogaragina amo, bona ori bona dibura amo, e hereva henimui mai gao badana ida; una murinai hereva ta se gwauraia. A unu hereva na huro-nadidia palakadia rua ai e tore, bena e henigu. 23 Umuiese dibura bogaragina amo una gado o kamonaiva, bona ororo o itaia, lahi ese e araiava, bena o raka henigu kahi, iduhu lohiadia bona tau-badadia iboumui ai; 24 oto, O itaia, Iehova, eda Dirava, ese ia hairaina bona siahuna vada e haheitalaida; ia gadona danu lahi bogaragina amo vada ta kamonai. Hari dina ai tame diba Dirava ese taunimanima vada e hereva henidia, bona unu taunimanima na doini mamauri. 25 A baia mase ena namo be dahaka? Badina be ina lahi badana ese baine aramai ore. Iehova, eda Dirava, gadona ma baia kamonai lou, vada baia mase; 26 badina be tanobada idoinai taunimanima be daika, mauri Diravana gadona vada e kamonai, ita vada ta kamonai heḡereḡerena, Iahi bogaragina amo e hereva henia, bena vada e mauri? 27 Oi na ba raka kahi lao, Iehova, eda Dirava, ena hereva iboudiai ba kamonai; bena Iehova, eda Dirava, ese baine hamaoromu herevadia iboudiai ba hamaoromai. Ai na baia kamonai, bona karadia baia kara.

28 O hamaorolaigu herevadia na Iehova ese e kamonai. Bena Iehova ese e hereva henigu, eto, Ini taunimanima edia hereva vada na kamonai; edia hereva iboudiai na mamaoro-mamaoro. 29 Nega iboudiai unu bemalaloa toma bema namo; bena bema matauraigu bona egu haheḡani iboudiai bema badina, unu amo edia noho bema namo, bona natudia edia noho bema namo, ela bona hanaihanai. 30 Baola, ba haḡanidia, baoto “Emui kalaga ba lou heni”. 31 A oi be lau badibadigu ai ba gini, bena baina hamaorolaimu taravatudia bona haheḡanidia iboudiai o ese ba hadibalaidia; bena baina henidia tanona bae noholaia negana ai bae badinadia.

32 Taunabunai, nahuamui ba toho, Iehova emui Dirava ena haheḡani ba badinadia; basio raka siri, idiba kahana ai eiava lauri kahana ai. 33 Iehova emui Dirava ese vada e haḡanilaimui dalana ai ba raka; bena ba mauri, bona emui noho baine namo bona emui dina bae hoho, ba noholaia tanona lalonai.

Copyright information for `MEU