Ecclesiastes 1

Ini na Haroro Tauna ena hereva; ia be David natuna, Ierusalem pavapavana. Haroro Tauna na eto:

Asi anidia ḡaudia, asi anidia ḡaudia;
ḡau iboudiai be asi anidia.
Tau ta ena hekwarahi idoinai dina henunai e karaiamu
anina be dahaka?
Uru ta e lao bubunimu, ma uru ta e vara isimu;
a tanobada na e mia hanaihanaimu.
Dina e daemu, ma e dihomu;
bena ena dae gabuna ma e ḡava heniamu.
Lai ese diho kahana e toa heniamu,
bena e toa heḡeḡemu, mirigini kahana e toa heniamu;
e toa heḡeḡe-heḡeḡemu,
ena dala gunadia ai ma e toa loumu.
Sinavai iboudiai na davara ai e aru lasimu,
a davara na se honumu;
sinavai ese e aru henidia gunava gabudia
ma e aru henidia loumu.
Ḡau iboudiai na hekwarahi ai e honumu;
tau ta basine herevalaia diba.
Mata be basine itaia ore;
taia be basine kamonai ḡuḡuru.
E vara guna ḡauna ma baine vara lou;
e karaia guna karana ma bae karaia lou;
ḡau matamatana ta se miamu, dina henunai.
10 Ḡau be edena, bae herevalaia, baeto
“A itaia, ina na matamata”?
Lasi, nega gunadia ai e miava,
ita do asita vara negadia ai.
11 E vara guna ḡaudia na ta ese se lalodia taomu,
bona do bae vara ḡaudia na ta ese basine lalodia tao,
gabeai bae vara urudia lalodiai.
12 Lau, Haroro Tauna, ese Israel taudia na biagudia Ierusalem ai. 13 Bena guba henunai e karamu karadia iboudiai na tahudia, mai lalogu idoinai bona mai aonegagu ida. Dirava ese taunimanima natudia unu vada e hahekwarahidia tomamu. 14 Dina henunai e karamu karadia iboudiai vada na itadia; iboudiai na asi anidia, lai ianina na heto.

15 Ḡau gageva-gagevana na basie hamaoromaoroa diba,
bona lasihidia ḡaudia na basie duahidia diba.

16 Lalogu ai nato: Aonega badana vada na abia; egu aonega ese Ierusalem e biagua gunava taudia iboudiai edia aonega na e hereadiamu; oibe, lalogu ese aonega bona lalo-parara vada e dibadia bada. 17 Bena lalogu na hadaia, aonega baina dibaia, bona kavakava bona lebulebu baina dibadia. Bena lalogu vada e parara, ina danu lai ianina mo.

18 Badina be aonega bada lalonai lalo-hekwarahi danu bada;
bona lalo-parara e habadaiamu tauna ese lalo-hisihisi danu e habadaiamu.
Copyright information for `MEU