Ecclesiastes 11

Amu aniani na davara kopina ai ba negea,
badina be dina momo muridiai ma ba davaria.
Hahitu eiava taurahani ahudia ba henidia,
badina be asi dibamu dahaka hahedika ḡaudia na tanobada ai bae vara.
Dagadaga na ranu ai bema honu,
idia ese medu bema hadihoa tanobada latanai;
bona au na diho kahana eiava mirigini kahana bema gari henia,
ia na e gari heniamu gabuna ai bema mia.
Lai e nariamu tauna na uhe basine hado,
bona dagadaga e ita taomu tauna na basine geiḡei.

Lai ede e toa tomamu na asi dibamu; mero matamatana turiana na sinana bogana ai ede e vara tomamu danu asi dibamu; benaini, ḡau iboudiai ikaradia Diravana ena ḡaukara danu asi dibamu.

Daba ai emu uhe ba hado, bona adorahi ai danu basio hesiku; badina be asi dibamu ina baine namo eiava una baine namo, eiava ruaosi bae namo.

Diari be namo, bona matada ese dina e itaiamu na mai moalena.

Badina be tau ta ena mauri dinadia bema hoho, ia ese iboudiai baine moalelaidia; to, baine laloa, dibura dinadia bae hoho. E varamu ḡaudia iboudiai na asi anidia.

Eregabe taumu e, eregabemu ai ba moale, eregabemu dinadia ai lalomu ese baine hamoalemu; lalomu ena ura bona matamu ena ita-ita daladia ai ba raka. A ba diba, ini ḡau iboudiai daidiai Dirava ese baine hahemaoro henimu.

10 Lalo-hekwarahi na lalomu amo bavatoa lasi, bona hisihisi na taumu anina amo bavabia oho; badina be tauhau bona eregabe negadia na asi anidia.

Copyright information for `MEU