Esther 2

Hanua pavapavana ese Eseta e adavaia

Unu ḡau muridiai, King Ahasuero lalona ma e keru, bena ia ese Vasati e helalolaia une, bona ena kara bona hari hahedua herevana ia latanai e gwauraia na e helalolai. Bena hanua pavapavana ena hesiai taudia eto, Rami-hebou ulatodia matamatadia mai hairaidia bae tahudia, hanua pavapavana ena. Hanua pavapavana ese heitatao taudia baine duanaidia, ena basileia iboudiai lalodiai; bena idia ese rami-hebou ulatodia matamatadia mai hairaidia iboudiai na bae haboudia, Susa bae siaidia mai; bena hanua pavapavana ena hesiai tauna Hegai, hanua pavapavana adavana edia ruma ireguna tauna, ese una ruma ai do baine naridia, bona dahudahu muramuradia baine henidia. Bena edena hane-ulato na hanua pavapavana ese baine ura henia bada be pavapava hahinena dagina baine abia, Vasati gabuna ai. Hanua pavapavana ese ina hereva e moalelaia, bena unu e kara toma.

Hanua badana Susa ai, Iuda tauna ta e nohova, ladana na Morodekai lairi, Simei Kisa tubuna, Beniamina tauna. Morodekai na abi-mauri taudia ida Ierusalem amo e laohaia, Nebukadnesara, Babulono pavapavana, ese Iekonia, Iuda pavapavana, na e abia mauri bona e laohaia negana ai. Hari Morodekai ese Hadasa (ladana ta be Eseta), tamana lahaina natuna, vada e ubua, badina be tamana bona sinana vada e mase. Ia na hane namo mai hairaina; bena tamana bona sinana e mase negana ai, Morodekai ese e abia, ia natuna ai e halaoa. Taunabunai, hanua pavapavana ena hahedua herevana bona ena haheḡani e gwauraia hedinarai, bena ulato momo na hanua badana Susa ai e haboudia, Hegai ena hereḡu ai, negana ai Eseta danu e abia, hanua pavapavana ena ruma ai e atoa, Hegai, hahine inaridia tauna, ena hereḡu ai. Bena hari hane-ulato ese una tau lalona e hamoalea; bena ia ese hane-ulato na e lalo namo henia, bona dahudahu muramuradia e henia haraḡa. Ana aniani danu e henia, bona hesiai kekenidia hahitu, hanua pavapavana ena ruma kekenidia bogaragidia amo e abidia hidi, na e henia. Bena ia bona ena hesiai kekenidia na gabu namo-hereana e henidia, hahine edia ruma ai. 10 Eseta na ena iduhu bona ena bese se hahedinaraidia, badina be Morodekai ese vada e haḡania ia na basine gwauraidia hedinarai. 11 A dina iboudiai Morodekai ese hahine edia ruma maḡuna vairanai e rakava, baine diba Eseta na edeheto bona ena noho na edeheto totona.

12 Ini ulato na hahine taravatudia henunai e nohova ela bona hua gwauta-rua e ore; una na ihahairaidia negana korikorina, hua tauratoi muro dehorona amo bona hua tauratoi muramura mai bonadia bona hahine edia dehoro haida amo. Bena ulato ta ta edia nega e kau, King Ahasuero dekenai bae raka vareai, negadia ai na 13 hanua pavapavana dekenai baine raka vareai hane-ulatona ena ura ḡauna na e henia, hanua pavapavana adavana edia ruma amo baine laohaia, bainela pavapava ena ruma ai. 14 Adorahi ai ela, bena daba ai ma e lou, hahine edia ruma iharuana ela, Saasagasa, hanua pavapavana ese e adavadia hahinedia inaridia tauna, ena hereḡu ai e nohova. Ia na hanua pavapavana dekenai basinema raka vareai lou, a hanua pavapavana ese bema ura henia, ia ese ladana bema hatoa, bena bema boiria.

15 Eseta, Morodekai tamana lahaina Abihaili natuna, Morodekai ese e natua kekenina, ena nega e kau, hanua pavapavana dekenai baine raka vareai; bena ia ese ḡau ta se gwauraia, hanua pavapavana ena hesiai tauna Hegai, hahine e naridiava tauna, ena lalo-hadai ḡauna mo. E itaia taudia iboudiai ese Eseta e lalo namo heniava. 16 King Ahasuero ena lohia laḡanina ihahituna ai, hua ihagwautana, ladana Tebete, lalonai, Eseta na King Ahasuero dekenai e hakaua vareai, hanua pavapavana ena ruma ai. 17 Bena hanua pavapavana ese Eseta e ura henia bada, hahine oredia iboudiai e ura henidia maragi; bona ulato iboudiai bogaragidia amo ia sibona ese hanua pavapavana ena harihari bona ena hahenamo e abidia badabada. Taunabunai, ia ese havava ḡauna na ia kwarana ai e atoa, bona pavapava hahinena ai e halaoa, Vasati ibolona. 18 Bena hanua pavapavana ese aria badana e karaia, ena lohia bona ena hesiai taudia iboudiai adia; una na Eseta ena aria. Bona basileia iboudiai edia laḡa-ani e henidia, bona harihari ḡaudia e heni hagauhagau, pavapava ena harihari-bada heḡereḡerena.

Morodekai ese hanua pavapavana iala-masena e laoa ahu

19 Ulato na hahine edia ruma iharuana ai e haboudia negana ai, Morodekai na hanua pavapavana ena ruma ikoukouna ai e helaiva. 20 Eseta ese ena iduhu bona ena bese do se gwaurai hedinarai, Morodekai ena haheḡani heḡereḡerena; badina be Eseta ese dounu Morodekai e kamonai henia, gunaguna ia dekenai e nohova negana ai e kamonai heniava heḡereḡerena. 21 Bena unu dinadia ai, Morodekai na hanua pavapavana ena ikoukou ai e helaiva ai, Bigitana bona Terese, hanua pavapavana ena raka-vareaina e gimaiava taudia, na e badu, King Ahasuero na bae dabaia tao eto. 22 Ina na Morodekai e diba, bena ia ese Queen Eseta e hadibaia, bena Eseta ese hanua pavapavana e hamaoroa, Morodekai ladana ai. 23 Hereva na e tahua, e davaria vada e momokani; bena unu tatau raruosi na tau-dae auna ai e matadia. Bena sivarai na Sisiga Bukana ai e torea, hanua pavapavana vairanai.

Copyright information for `MEU