Exodus 1

Iosef garana

Israel natuna Aigupto ela taudia bini, idia na ta ta edia ruma taudia ida Iakob e bamoa ela. Ladadia bini: Ruben; Simeon; Levi; Iuda; Isakara; Sebulun; Beniamina; Dan; Napatali; Gad; Asere. Iakob garana iboudiai be taunimanima hitu-ahui, Iosef ese e gunalaidia Aigupto ai. Iosef e mase, tadikakana bona ena uru taudia iboudiai danu e mase. A Israel garana ese natudia momo e havaradia, besedia eha hutuma, una tano e hahonua.

Farao matamatana

Hanua pavapavana matamatana ta ese Aigupto e halohiaia; ia na asi dibana Iosef. Ia ese ena orea taudia e hamaorodia, eto, A itaia, ita na gagadoi, Israel besena taudia na hutuma; ita na mamanoka, idia na gogoada; 10 aita laloa namonamo, bae hutuma herea bena tuari negana ai bae tore isi, inaida bae durudia, bae tuari henida, bona eda tano bae toretania na garina. 11 Una dainai, ia ese heitatao taudia e haginidia, ḡaukara ai bae itadia tao, bena ḡaukara momo amo bae bahisidia. Bena idia ese hanua e hadai, Parao ena kohu ihaboudia, ladadia be Pitom bona Raamese. 12 Edia hekwarahi e habadaia loulou, to besedia ma eha hutuma, ela bona tano idoinai e hahonua davana. Bena Aigupto taudia ese Israel taudia garidia e gariva. 13 Taunabunai idia ese Israel taudia e inai henidiava, e hahekwarahidiava. 14 Edia noho na dika, ḡaukara metaudia daidiai: raro amo e kara nadidia bona ihakamo-taodia ḡaudia e karava, uma ai danu ḡaukara idau-idau e karava mai hekwarahidia ida. Hesiai karadia idoidiai ikaradia ai e hahekwarahidiava.

15 Bena Aigupto pavapavana ese Heberu edia hegwaroto hahinedia e hereva henidia: hahine ta ladana na Sifra, ma ta ladana na Pua. 16 Ia eto, Umui raruosi ese Heberu hahinedia ba hamaradia negadia ai ba itadia, idia bae mara, bema mero, bavalaia, a bema kekeni be baine mauri. 17 To hari hegwaroto hahinedia ese Dirava garina e gariva dainai idia ese Aigupto pavapavana ena hahedua herevana asie badinaiava, natudia mamaruanedia idia ese e hamauridiava. 18 Taunabunai, Aigupto pavapavana ese hagwaroto hahinedia e boiridia, e nanadaidia, Dahaka dainai ini vada o kara toma? Dahaka dainai natudia mamaruanedia vada o hamauridia? 19 Hari hegwaroto hahinedia ese Farao e haere henia, eto, BAdina be Heberu hahinedia na dia Aigupto hahinedia bamodia; idia na mai goadadia, bena hegwaroto hahinena do se gini daemu negana ai idia ese e mara gunamu. 20 Una dainai Dirava ese hari hegwaroto hahinedia e hanamodia, bona Heberu besena na eha hutumava bona e goada dikadikava. 21 Hari hegwaroto hahinedia ese Dirava e matauria dainai, ia ese natudia e henidia. 22 Bena Farao ese ena orea taudia iboudiai e haḡanidia, eto, Natudia mamaruanedia na sinavai ai ba negedia, a kekeni na bae mauri.

Copyright information for `MEU