Exodus 21

Hesiai Taravatudia

Ba henidia taravatudia bini. Heberu tauna ta ba hoia, emu hesiai tauna ai ba halaoa, ia na laḡani tauratoi isiaimu baine lao heni, bena ihahituna ai ba kahua nege, asi davana. Sibona emu ai baine raka vareai, sibona ma baine raka lasi; a mai adavana ida bae raka vareai, mai adavana ida ma bae raka lasi. A biaguna ese hahine ta baine henia, baine adavaia, bena natuna mamaruanedia eiava hahinedia na una hahine ena amo baine abidia, una hahine mai natuna ida na biaguna ena; hesiai tauna na sibona baine raka lasi. A hesiai tauna baine hereva hedinarai, baineto “Baigugu bona adavagu bona adavagu bonanatugu na ura henidiamu; una dainai lau basina raka lasi”, hari biaguna ese una tau na Dirava vairanai baine hakaua lasi, iduara ai eiava iduara auna ai taiana matuna baine daia uru; bena una tau ese biaguna isiaina baine lao heni ela bona mase.

Tau ta ese natuna kekenina baine hoia, hesiai ai bainela, biaguna be basine kahua nege hesiai taudia mamaruanedia e kahudia negemu heḡereḡerena. Bema biaguna ese baine adavaia bena basine ura henia, hahine varavarana ese ma bae davalaia bena bae abia lou. Basine hoia diba idau taudia ediai, badina be ia ese vada e dadaraia. A bema natuna maruanena baine henia, ia ese ravana korikori ai baine halaoa. 10 Bema hahine ta ma baine abia, ia ese hahine gunana ana aniani bona ena dabua ihenina basine hamaraḡi, bona basine hadihoa. 11 A ini ḡau ai baine hadabua, ia na baine kahua nege, asi davana.

Ala-ala Taravatudia

12 Ta ese tau ta baine alaia mase, ia danu bae alaia mase. 13 To bema iala-masena basine haeroa guna, a Dirava ese ia imana ai baine atoa, lau na gabu ta baina gwaurai henimu, ia baine heau mauri gabuna. 14 A tau ta ese iala-masena baine haeroa guna, bena baine alaia mase, egu ihaboulaina patana amo bavabia siri, vada baine mase.

15 Tamana eiava sinana baine botaia tauna na bae alaia mase.

?
16 Ta ese tau ta baine henaoa, bena baine hoia, eiava ia imana ai bae davaria, vada bae alaia mase.

17 Tamana eiava sinana baine uduguiraia tauna na bae alaia mase.

18 Taunimanima bae heatu, bena ese e heatu heniamu tauna na nadi amo baine hodoa, eiava imana amo baine botaia, a una tau na basine mase, baine hekure mo; 19 murinai ma baine tore isi, itotohi amo baine loaloa, hari e haberoa tauna na basine kerere; ḡau tamona, ena hekure dinadia davadia baine henia, bona ena muramura dalana baine lailaia ela bona baine namo vaitani.

20 Tau ta ese ena hesiai tauna eiava hahinena baine dadabaia, bena imana ai baine mase, ena kerere davana bae henia. 21 A una hesiai tauna eiava hahinena do baine mauri, dina ta eiava dina rua, biaguna na basine kerere, badina be una hesiai rauna eiava hahinena na ena moni davana.

22 Tatau edia heatu ai rogorogo hahinena ta bae haberoa, bena hahine baine mara dika, natuna baine dika to ia be baine namo, adavana ese e haberoa tauna baine habadelaia, bena hahemaoro taudia bae hereva, moni hida ia ese hahine adavana baine henia. 23 A hahine danu baine dika, mauri davana na mauri baine henia, 24 eiava mata davana na mara, eiava ise davana na ise, eiava ia davana na ima, eiava ae davana na ae, 25 eiava heara davana na heara, eiava bero davana na bero, eiava hedadaba davana na hedadaba.

26 Tau ta ese ena hesiai tauna eiava ena hesiai hahinena matana baine haberoa, bena baine kepulu, ia na baine kahua nege, matana davana. 27 Eiava uduna baine botaia bena isena ta baine heraḡa, ia na baine kahua nege, isena davana.

28 Boromakau ta ese tau ta eiava hahine ta baine doaia mase, una boromakau na bae hodoa mase bona hidiona na basie ania; a biaguna be asi ena kerere. 29 To, bema una boromakau be nega haida unu vada e kara toma, nega gunadia ai, bona biaguna be mai dibana; bena biaguna basine koua kunuka-kunuka dainai tau ta eiava hahine ta ma baine doaia mase, boromakau na bae hodoa mase, bona biaguna danu bae alaia mase. 30 A dava bae gwauraia negana ai una dava baine henia, ena mauri ibodohilaina. 31 Bema tau ta natuna maruanena eiava natuna hahinena na boromakau ese baine doaia mase, unu bae karaia toma. 32 A bema tau ta ena hesiai tauna eiava ena hesiai hahinena na boromakau ese baine doaia mase, boromakau biaguna ese una hesiai tauna eiava hahinena biaguna na davana baine henia,silver ena metaupound ta mai kahana heḡereḡerena, bona boromakau danu bae hodoa mase.

33 Tau ta ese guri ta hekehona ai baine rakatania, eiava guri baine ḡeia, bena basine koua ahu, bena boromakau ta eiava doniki ta una guri lalonai baine moru dobi, 34 guri biaguna ese davana baine karaia; ia ese boromakau eiava doniki biaguna moni baine henia, a mase ḡauna na iena.

35 Tau ta ena boromakau ese tau ta ena boromakau baine alaia mase, mauri ḡauna na bae hoia, bena raruosi ese davana bae haria; mase ḡauna danu bae haria. 36 Bema biaguna mai dibana una boromakau na vaia unu vada e kara toma, to basine koua kunuka-kunuka, ia ese davana do baine karaia, boromakau ta boromakau ta davana, bona mase ḡauna be iena.

Copyright information for `MEU