Exodus 22

Henao Taravatudia

Tau ta ese boromakau ta eiava mamoe ta baine henaoa, bena baine alaia eiava baine hoia, ia na davana do baine karaia: boromakau ta davana boromakau ima baine heni, eiava mamoe ta davana mamoe hani baine heni. Davana na unu baine karaia toma; a imana bema tuna, ia bema hoia, davana ihaḡuḡuruna. Henao taudia na ruma ihamakohina ai bae davaria, bena bae botaia mase, ia rarana na asi davana; a bema daba e rere murinai bae botaia mase, rarana na mai davana. E henaoa boromakauna eiava donikina eiava mamoena na henao tauna dekenai bae davaria, ia na davana baine henia nega harua.

Tau ta ese boromakau baine hakaua vareai idau tauna ena uma ai eiava ena vine imeana ai, eiava baine kahua nege bena sibona baine vareai, ia na ena boromakau ese e hadika ḡaudia davadia na ena uma ḡaudia bona ena vine anidia hereadia amo do baine heni.

Lahi ese ava ḡiniḡini amo baine hanai, uit e utua ḡauna eiava uit dounu uma ai e tubumu ḡauna baine araia ore, lahi e haraia tauna ese davadia do baine heni.

Tau ta ese ena moni eiava ena kohu ia dekena tauna baine henia, baine naria totona, bena ta ese baine henaoa, henao tauna bae davaria negana ai, ia na davana baine heni nega harua. Bema henao tauna basie davaria, ruma biaguna na hahemaoro gabuna bainela. Dirava vairanai baine gwau hamata, ia na dekena tauna ena kohu se daua toho.

Boromakau eiava doniki eiava mamoe eiava dabua bae heailai, bena tau ta baineto “Ḡauna binai egu”, kaha ruaosi na Dirava vairanai bae hahemaoro; bena hahemaoro ai baine kerere tauna ese davana nega harua ia dekena tauna baine henia.

10 Tau ta ese ena doniki eiava ena boromakau eiava ena mamoe eiava ena mauri ḡauna ta ia dekena tauna baine henia, baine naria totona, bena baine mase, eiava baine bero, eiava ta ese baine lulua oho, a tau ta una kara basine itaia, 11 ia be Iehova vairanai baine gwau hamata, ia ese dekena tauna ena ḡau se daua toho, bena ḡau biaguna ese ena gwau-hamata baine abia dae, ena ḡau davana basine abia. 12 A ta ese iena amo bema henaoa, ia ese davana na biaguna bema henia. 13 A uda boromadia ese bae koria, ia ese baine hahedinaraia, bena davana basine karaia.

14 Tau ta ese dekena tauna ena ḡau ta baine abia torehai, bena baine bero eiava baine mase, biaguna murinai, ia ese davana baine henia. 15 A bema biaguna vairanai, ia ese davana basine henia. Bema hoi-asi ḡauna, davana be vada e henia, basine henia lou.

16 Tau ta be hane-ulato rami-hebou, asi imaohenina, ida bae eno bou, ia ese baine adavaia, bona davana baine heni. 17 A tamana ese baine rua, ia ese davana doi baine heni, bema adavaia heḡereḡerena.

18 Babalau hahinena na basio bogaia hisi, vada baine mase.

?
19 Mauri ḡauna idauna ta ida baine eno bou tauna sa bae alaia mase.

20 Ihaboulaina karana baine karaia, dia Iehova ena to idau dirava ta ena, tauna na baine havahuraia vaitani.

21 Noho-hedoa tauna basio hadikaia bona basio hahisia, badina be umui danu Aigupto tanona ai o noho hedoava. 22 Vabu eiava ihareha basio hahisia; 23 boma hahisidia bena bema tai henigu, lau na momokani edia tai baina tai baina kamonai, 24 bena egu badu baine siahu, bena dare amo baina alamui mase: adavamui bae vabu bona natumui bae ihareha.

25 Egu orea taudia ogoḡamidia haida emu ai bae abi torehai, basio kara henidia abi-torehai taudia na heheto, bona heato-kau monina na ediai basio tahua. 26 Dekemu tauna ena dabua bavabia, ena abi-torehai toana, dina do basine diho ai ba henia lou; 27 badina be una na ena hetaru ḡauna bona ena hahedoki: ede baine mahuta toma? Ia ese baine tai henigu, bena baina hakala henia, badina be lau na mai egu hebogahisi.

28 Dirava basio maumauraia, bona emu bese lohiana ta basio uduguiraia.

29 Taboro negana ai, ihaboulaina karadia ai basio halahe: emu uma anidia bona emu vine anidia ba heni momo. Natumu roboana lau ba henigu; 30 emu boromakau bona emu mamoe danu unuheto. Dina hitu natuna roboana na sinana dekenai baine noho; dina ihataurahanina ai lau ba henigu.

31 Umui na hehelaḡa: taunabunai uda boromadia ese e alaia mase ḡauna na basio ania; sisia ba henidia.

Copyright information for `MEU