Ezekiel 11

Israel lohiadia igwau-henidia

Bena Lauma ese e haheabigu isi, Iehova ena dubu mairiveina kahana ikoukouna, mairiveina kahana e vaira henia ḡauna, e laohaigu. Hari ikoukou iduarana ai tatau ruahui-ima na itadia, bona idia bogaragidiai laasania Asuru bona Pelatia Benaia, bese lohiadia, na itadia. Bena ia ese e hamaorogu, eto, Taunimanima natuna e, kara havara e lalo hatamu, bena hahealo herevadia dikadia ina hanua lalonai taunimanima e hamaorolaidiamu taudia bini. Idia na e tomu, Ruma ihaginidia negana na do se kahikahi; ina hanua na vamu inadulaina urona, bona vamu na ita. Taunabunai, idia latadiai ba peroveta; taunimanimanatuna e, ba peroveta.

Bena Iehova ena Lauma ese e rohegu; bena ia ese e hamaorogu, eto, A hereva, agowa, Iehova ini e gwau tomamu: Israel besena e, umui na ene o laloa tomamu; badina be lalo-hadai dahaka dahaka lalomui ai e varamu na dibagu. Emui mase taudia vada o hahutumadia ina hanua ai, bona ariarana na vada e aladia taudia ai vada o hahonudia. Taunabunai, Ḡaubada Iehova na ini e gwau tomamu: Emui mase taudia, hanua bogaraginai vada o atodia, idia na vamu, bona ina hanua na inadulaidia urona; a umui na bogaragina amo bae hakaumui lasi.

Ḡaubada Iehova na e tomu, Dare garina vada o gari; bena lau ese dare na latamui ai baine mailaia. Ia bogaragina amo baina hakaumui lasi, bona idau taudia imadia ai baina atomui, bona hahemaoro karadia baina kara henimui. 10 Dare ese baine alamui, bona lau ese Israel tanona hetoana ai baina hahemaoro henimui; bena ba diba lau na Iehova. 11 Ina hanua na emui uro ai basinela, bona umui na vamu ai basiola ia lalonai. Israel tanona hetoana ai baina hahemaoro henimui, 12 bena ba diba lau na Iehova; badina be egu taravatu daladia ai asio raka, bona egu hahedua herevadia asio badinadia, a e ḡeḡemui dae besedia edia hahedua herevadia heḡereḡeredia ai vada o kara.

13 Bena lau na perovetava lalonai Pelatia Benaia e mase. Bena na goru diho, na lolo badabada, nato, Ḡaubada Iehova e, Israel kwabukwabudia ba ha-oredia vaitani a?

Nega matamatana do bainema

14 Iehova ena hereva na egu ai e kau, eto: 15 Taunimanima natuna e, tadikakamu, tadikakamu korikori, oi ida gabu daudau ai vada e hanohodia taudia, Israel besena idoinai, ena taunimanima iboudiai, na Ierusalem inoholaina taudia ese vada e herevalaidia, eto, Idia ese Iehova vada e rakatania, dauha vada ela; ina tano na ita vada e henida, baita ḡaunaia totona. 16 Taunabunai oi na baoto, Ḡaubada Iehova na ini e gwau tomamu: Ena be dauha na laohaidia, bese idau-idau bogaragidiai, ena be tano idau-idau lalodiai na hakarohodia rohoroho, to vada ela tanodia lalodiai lau na edia gabu helaḡana ina nega hekada hanai. 17 Taunabunai baoto, Ḡaubada Iehova na ini e gwau tomamu: Bese idau-idau bogaragidia, amo baina hahegogomui, bona tano idau-idau, lalodiai vada e hakarohomui tanodia, amo baina haheboumui, Israel tanona na baina henimui. 18 Bena unu baela negana ai, idia ese ḡau dika-hereadia iboudiai bona ena kara dika-rohorohodia iboudiai na iena amo bae abidia oho. 19 Bena lalodia na baina hatamonadia, bona lauma matamatana na idia lalodiai baina atoa; lalo-auka na idia lalodia amo baina abia oho, Ialo-manada baina henidia. 20 Bena egu taravatu daladia ai bae raka bona egu hahedua herevadia bae badinadia bona karadia bae kara, idia na lauegu bese taudia ai baela, bona lau na edia Dirava ai bainala. 21 A lalodia ese edia ḡau dika-hereadia bona edia kara dika-rohorohodia e ura henidiamu taudia be lau ese edia kara davadia na tubuadia ai baina haloudia. Ḡaubada Iehova na e herevamu.

22 Bena kerubi ese hanidia e idi roro, mai ava-keikeidia idia badibadidiai, bona Israel Diravana hairaina na idia daediai. 23 Bena Iehova hairaina na hanua bogaragina amo e dae, hanua mairiveina kahana ororona ai e miava. 24 Bena Lauma ese e haheabigu isi, bona Dirava ena Lauma mata-hanaina lalonai Kaldea e laohaigu, unuseni ai vada e hanohodia taudia dekediai. Bena hari mata-hanai, na itaia ḡauna, ese e rakatanigu. 25 Bena Iehova ese vada e haheitalaigu ḡaudia iboudiai na lau ese unuseni ai vada e hanohodia taudia na hamaorolaidia.

Copyright information for `MEU