Ezekiel 13

Peroveta taudia koikoidia irevadia

Iehova ena hereva na egu ai e kau, eto, Taunimanima natuna e, Israel ena peroveta taudia latadiai ba peroveta; sibodia edia lalo-hadai e perovetalaimu taudia na ba peroveta henidia, baoto, Iehova ena hereva ba kamonai. Ḡaubada Iehova na ini e gwau tomamu: Peroveta taudia kavakavadia, sibodia lalodia e badinamu a ḡau ta asie itaia taudia, madi ihabaidia! Israel e, emu peroveta taudia na uda sisiadia na heheto, e heḡiḡi dobi rumadia ai e nohomu. Magu vada e gwadadia mauru gabudia asio lao henidia, Israel besena maḡuna asio larebaia, Iehova ena dina ai tuari ai baine auka totona. Vada e hereva koikoi bona vada e bagu haoro koikoi. Iehova ese se siaidia negadia al, idia na eto “Iehova ini e gwau tomamu”, bena idia banava eto ia ese edia hereva baine hamomokania. Ena be lau asina hereva to umui oto “Iehova ini e gwau tomamu” negadia iboudiai na o mata hanai koikoi bona o bagu haoro koikoi ani?

Taunabunai, Ḡaubada Iehova na ini e gwau tomamu: Hereva asi anidia vada o gwaurai bona mata-hanai koikoidia vada o ita dainai, Ḡaubada Iehova na e tomu, A itaia, lau ese na inai henimuimu. E mata hanai koikoimu bona e bagu haoro koikoimu peroveta taudia na lau imagu ese baine laodia ahu; egu orea taudia ida basie henega bou, bona Israel besena taudia ladadia itoredia ai idia ladadia basie hetore, bona Israel tanona ai basie raka vareai; bena umui na ba diba lau na Ḡaubada Iehova. 10 Oibe, badina be egu orea taudia vada e koidia, eto “Maino”, maino na lasi negadia ai; bona badina be taunimanima ese haba e haginiamu negadia ai, ini peroveta taudia ese ahu amo e dahuamu; 11 una dainai ahu amo haba e dahuamu taudia na ba hamaorodia, una haba na baine heḡiḡi dobi. Medu bada-herea baine diho, medu-hetari badadia bae moru, lai-gubana baine toa; 12 bena haba baine heḡiḡi dobi negana ai, haida ese bae nanadaimu, baeto “O dahulaia ahuna be edeseni ai?” ani? 13 Taunabunai Ḡaubada Iehova na ini e gwau tomamu: Lau ese egu badu ḡaraḡara ai lai-gubana baina hatoaia; bona egu badu ai medu bada-hereana baina hadihoa, bona medu-hetari badadia baina hamorudia, badu ḡaraḡara ai bae habuadia tari. 14 Umui ese ahu amo o dahua habana na lau ese baina ḡiḡia dobi tano ai, bena ia badina bae hedinarai. Baine heḡiḡi dobi negana ai, umui ese ia bogaraginai ba mase; bena ba diba lau na Iehova. 15 Egu badu ḡaraḡara na unu baina bubua ore toma, haba latanai, bona ahu amo e dahua taudia latadiai; bena baina hamaoromu, bainato, Haba na lasihia, ahu amo e dahua taudia danu lasihidia; 16 Israel ena peroveta taudia bunu, Ierusalem latanai e peroveta bona mata-hanai ai maino e itaia, maino na lasi negana ai. Ḡaubada Iehova na e herevamu.

17 Taunimanima natuna e, oi danu vairamu ba ha-aukaia emu bese taudia natudia hahinedia, sibodia edia lalo-hadai e perovetalaimu hahinedia, ediai. Idia latadiai ba peroveta, 18 baoto, Ḡaubada Iehova na ini e g vau tomamu: Taunimanima laumadia idoadia totona mea ganadia na ima ganaganadia iboudiai ai e turidia, bona heḡova-ahu mukodia, taunimanima kikina-badana kwaradia igovalaidia, e karamu, hahinedia madi ihabaidia! gu orea taudia laumadia ba idoadia bona ma haida danu laumadia ba hamauridia, umui sibomui emui namo ihabadana a? 19 Egu orea taudia bogaragidiai lau ladagu vada o hamiroa, bali taidia bona flaoa atagadia iabidia ai, basiema mase taudia na o aladia masemu, bona basiema mauri taudia na o hamauridiamu, emui koikoi amo; egu orea taudia, koikoi e abi daemu taudia, na o koidia.

20 Taunabunai, Ḡaubada Iehova na ini e gwau tomamu: A itaia, emui mea ganadia, taunimanima laumadia o idoalaidiamu ḡaudia, na na inai henidiamu; imamui amo baina daredia oho, bona o idoadiamu laumadia na baina kahudia nege, manu na heheto. 21 Emui heḡova ahu mukodia danu baina daredia oho, bona egu bese taudia na imamui amo baina rauadia, bena egu orea taudia na imamui ai basie noho, umui damumui ai basiela. Bena ba diba lau na Iehova. 22 Badina be emui koikoi amo kara maoromaoro tauna lalona vada o hamanokaia, ena be lau ese lalona asina hamanokaia; bona kara dika tauna lalona vada o hagoadaia, ena dala dikana amo basine raka siri, ena mauri basine rauaia; 23 taunabunai, ina murinai umui na basio mata hanai koikoi lou, bona bagu haoro karadia basio kara lou; egu orea taudia na umui imamui amo baina harohodia mauri. Bena vada ba diba lau na Iehova.

Copyright information for `MEU