Ezekiel 14

Kaivakuku e toma henidia dihomu taudia

A Bena Israel tau-badadia haida na dekegu ema, lau vairagu ai e helai. Bena Iehova ena hereva na egu ai e kau, eto, Taunimanima natuna e, ini tatau ese edia kaivakuku na lalodia ai vada e abidia dae, bona edia kara havara na hekwakwanai ḡauna ai vada e halaoa vairadiai; bae nanadailaigu herevadia baina kamonaidia eiava lasi? Taunabunai ba hereva henidia, baoto, Ḡaubada Iehova na ini e gwau tomamu: Israel besena tauna ta ese kaivakuku na lalona ai baine abidia dae, bona ena kara havara na hekwakwanai ḡauna ai baine halaoa vairanai, bena peroveta tauna dekena bainema, lau Iehova sibogu ese baina haere henia, ena kaivakuku na momo dainai; unu amo Israel besena taudia, edia kaivakuku daidiai vada e rakatanigu taudia, na lalodia baina abidia lou.

Taunabunai Israel besena taudia ba hamaorodia, baoto, Ḡaubada Iehova na ini e gwau tomamu: A helalo kerehai, emui kaivakuku bona emui kara dika-rohorohodia iboudiai amo ba mede daudau. Badina be Israel besena tauna ta, eiava idau tauna Israel ai e noho hedoamu ta, ese baine rakatanigu, ena kaivakuku na lalona ai baine abidia dae, bona ena kara havara na hekwakwanai ḡauna ai baine halaoa vairanai, bena peroveta tauna dekena bainema, peroveta tauna ese ia dainai baine nanadaigu totona, lau Iehova sibogu ese baina haere henia. Lau ese vairagu baina ha-aukaia una tau enai; toa bona udu gwaurai-gwaurai herevana ai baina halaoa, bona egu bese taudia bogaragidia amo baina negea daure; bena umui na ba diba, lau na Iehova. A peroveta tauna lalona bema hekwakwanai bena hereva ta bema gwauraia, anina be lau Iehova ese vada na koia; bena lau ese imagu baina toia roro ia ihadikana, bona egu bese Israel bogaragina amo baina habuaia tari. 10 Bena davadia bae hua; peroveta tauna davana bona henanadai tauna davana bae heḡereḡere; 11 unu amo Israel taudia na egu amo basie raka oho lou, bona edia kara havara iboudiai amo sibodia basie hahemiro lou, a egu bese ai baela, bona lau na edia Dirava ai bainala. Ḡaubada Iehova na e herevamu.

Dirava ena hahemaoro Ierusalem latanai

12 Iehova ena hereva na egu ai e kau, eto, 13 Taunimanima natuna e, tano ta ese ena hebeatai karadia amo baine kara dika henigu, bena lau ese imagu na ia ihadikana totona baina toia roro bona ena mauri anianina baina abia oho, bona doe na ia latanai baina siaia, bona taunimanima bona ubu-ubu ḡaudia ia lalonai baina hamasedia, negana ai, 14 ena be ini tatau tatoiosi, Noa bona Daniel bona Iobu, na ia lalonai bema noho, to edia kara maoromaoro amo idia sibodia mo edia mauri bema heraua. Ḡaubada Iehova na e herevamu. 15 Eiava uda boromadia na una tano ai bama harakadia hanai, bena idia ese bema havahua, ela bona tano ḡaḡaena ai bema hahelao, bena tau ta basinema rakaia hanai diba unu uda boromadia daidiai, negana ai, 16 ena be unu tatau tatoiosi na ia lalonai bema noho, to, lau na maurimu heḡereḡerena (Ḡaubada Iehova na e gwaumu), idia tatoiosi ese natudia mamaruanedia eiava hahinedia basiema hamauridia diba; idia tatoiosi sibodia mo edia mauri bema heraua, a tano na bema ḡaḡae. 17 Eiava dare na una tano latanai bama mailaia, bama toma “Dare na tano amo baine hanai”, bena taunimanima bona ubu-ubu ḡaudia ia lalonai bama hamasedia, negana ai, 18 ena be unu tatau tatoiosi na ia lalonai bema noho, to, lau na maurimu heḡereḡerena (Ḡaubada Iehova na e gwaumu), idia tatoiosi ese natudia mamaruanedia eiava hahinedia basiema hamauridia diba, a idia tatoiosi sibodia mo bema heraua. 19 Eiava dai-hanai gorerena na una tano latanai bama siaia, bona egu badu ḡaraḡara na ia latanai bama bubua, rara ihahebubuna ai, taunimanima bona ubu-ubu ḡaudia ihamasedia totona, negana ai, 20 ena be Noa bona Daniel bona Iobu na ia lalonai bema noho, to, lau na maurimu heḡereḡerena (Ḡaubada Iehova na e gwaumu), idia tatoiosi ese natudia mamaruanedia eiava hahinedia basiema hamauridia diba, a idia tatoiosi sibodia mo edia mauri bema heraua, edia kara maoromaoro daidiai.

21 Badina be Ḡaubada Iehova na ini e gwau tomamu: Matona, Ierusalem baina hahemaoro henia, egu hahehisi karadia haniosi, dare bona doe bona uda boromadia dikadia bona dai-hanai goreredia, na ia latanai baina siaidia taunimanima bona mauri ḡaudia ihamasedia totona, negana ai, ia na ede baine heto! 22 Ḡau tamona, ia lalonai haida na bema mauri, bena natudia mamaruanedia bona hahinedia bema hakaudia lasi, idia na dekemu ai bae raka lasi, bena edia dala bona edia kara ba ita negana ai taumu na baine lo, dika na Ierusalem latanai vada na mailaia dainai; oibe, kara iboudiai ia latanai vada na mailai daidiai. 23 Idia ese taumu bae haloa, edia dala bona edia kara ba ita negana ai; bona ba diba Ierusalem lalonai na kara karadia iboudiai na dia asi badina asina karadia. Ḡaubada Iehova na e herevamu.

Copyright information for `MEU