Ezekiel 20

Dirava ena kara Israel ena

Laḡani ihahituna huana iha-imana dinana ihagwautana ai, Israel tau-badadia haida na ema, Iehova enai bae henanadai totona; bena idia na lau vairagu ai e helai.

Bena Iehova ena hereva na egu ai e kau, eto: Taunimanima natuna e, Israel tau-badadia ba hamaorodia, baoto, Ḡaubada Iehova na ini e gwau tomamu: Lau inanadaigu oma a? Ḡaubada Iehova na e tomu, Lau na maurimu heḡereḡerena, umui ese lau basio nanadaigu. Oi ese ba hahemaoro henidia a? Taunimanima natuna e, oi ese ba hahemaoro henidia a? Benaini, senedia edia kara dika-rohorohodia ba hadibalaidia, ba hamaorodia, baoto, Ḡaubada Iehova na ini e gwau tomamu: Israel na abia hidi dinana ai, Iakob vevena na gwau henidia hamata. Aigupto tanona ai na hahedinarai henidia, bena na gwau henidia hamata, nato, Lau na Iehova, emui Dirava. Una dina ai na gwau henidia hamata, nato, Aigupto tanona amo baina hakaudia lasi, idia daidiai vada na lalo davari tanona ta, rata bona bada-ranuna e arumu tanona, tano herea-daena, tano iboudiai e hereadiamu ḡauna, lalonai baina hakaudia vareai. Bena na hamaorodia, nato, Ibouboumui ai, ḡau dika-rohorohodia, matamui ese e moalelaimu ḡaudia, na ba negedia daure, Aigupto kaivakukudia ediai basio hahemiro. Lau na Iehova, emui Dirava. A idia ese e daḡedaḡe henigu, asie kamonai henigu; ḡau dika-rohorohodia, matadia ese e moalelaiva ḡaudia, na dia iboudiai ese asie negedia daure, bona Aigupto kaivakukudia asie rakatanidia.

Bena na laloa, nato, egu badu ḡaraḡara na latadiai baina bubua dobi bona egu badu na idia ihadikadia ai baina ha-orea, Aigupto tanona ai.
A lau ladagu bagunai na ḡaukarava, bogaragidiai e nohova bona vairadiai Aigupto tanona amo ihakau-lasidia ai na hahedinarai henidia besedia vairadiai lau ladagu na basine miro totona. 10 Taunabunai, lau ese Aigupto tanona amo na hakaudia lasi, bena tano ḡaḡaena ai na hakaudia vareai. 11 Egu taravatu na henidia, bona egu hahedua herevadia ibadinadia ai taunimanima bae mauri ḡaudia na na hamaorolaidia. 12 Ina danu, egu dina helaḡadia na henidia, toa ai baela, lau bona Idia padamai ai, idia na bae diba lau Iehova ese na hahelagadiamu helaoreana. 13 A Israel besena ese e daḡedaḡe henigu, tano ḡaḡaena ai; egu taravatu lalodiai asie raka, a egu hahedua herevadia, ibadinadia ai taunimanima bae mauri ḡaudia, na e dadaraidia, bona egu dina helaḡadia na e hamirodia herea.

Bena na laloa, nato, egu badu ḡaraḡara na latadiai baina bubua dobi, tano ḡaḡaena ai, bona baina ha-orea vaitani.
14 A lau ladagu bagunai na ḡaukarava, vairadiai na hakaudia lasi besedia vairadiai lau ladagu basine miro helaoreana. 15 Ina danu, tano ḡaḡaena ai na gwau henidia hamata, baina henidia nato tanona, rata bona bada-ranuna e arumu tanona, tano herea-daena, tano iboudiai e hereadiamu ḡauna, lalonai basina hakaudia vareai; 16 badina be egu hahedua herevadia e dadaraidia, bona egu taravatu lalodiai asie raka, bona egu dina helaḡadia e hamirodia; badina be lalodia ese edia kaivakuku e lalo tao. 17 Ḡau tamona, matagu ese e bogadia hisi; asina habuadia tari eiava asina ha-oredia vaitani, tano ḡaḡaena ai.

18 Bena tano ḡaḡaena ai idia natudia na hamaorodia, nato, Tamamui edia taravatu lalodiai basio raka, eiava edia hahedua herevadia basio badinadia, eiava edia kaivakuku itomadiho-henidia ai sibomui basio hahemiro. 19 Lau Iehova na emui Dirava; lauegu taravatu lalodiai ba raka, bona egu hahedua herevadia ba badinadia namonamo; 20 bona egu dina helaḡadia ba matauraidia, bena toa ai baela, lau bona umui padadai, bona ba diba lau Iehova na emui Dirava. 21 A idia natudia ese e daḡedaḡe henigu; egu taravatu lalodiai asie raka, bona egu hahedua herevadia; ibadinadia ai taunimanima bae mauri ḡaudia, asie badinadia namonamo, egu dina helaḡadia danu e hamirodia.

Bena na laloa nato, egu badu ḡaraḡara na latadiai baina bubua dobi, bona egu badu na idia ihadikadia ai baina ha-orea, tano ḡaḡaena ai.
22 A imagu na na rua, bona ladagu bagunai na ḡaukara, vairadiai na hakaudia lasi besedia vairadiai lau ladagu basine miro helaoreana. 23 Ina danu, tano ḡaḡaena ai na gwau henidia hamata, nato, bese idau-idau bogaragidiai baina hakarohodia bona tano idau-idau ai baina hakarohodia rohoroho; 24 badina be idia ese egu hahedua herevadia asie badinadia, bona egu taravatu e dadaraidia, bona egu dina helaḡadia e hamirodia, bona tamadia edia kaivakuku e haḡeredia. 25 Ina danu, taravatu dikadia bona hahedua herevadia, ibadinadia ai mauri basie davaria ḡaudia, na henidia; 26 bona sibodia edia herahia ḡaudia amo na hamirodia; badina be na koidia, natudia roboadia iboudiai na ḡole-oho boubou ḡaudia ai bae halaodia, baina hagaridia totona. Unu na kara toma, idia na bae diba lau na Iehova helaoreana.

27 Taunabunai, taunimanima natuna e, Israel besena taudia ba hereva henidia, baoto, Ḡaubada Iehova na ini e gwau tomamu: Ina kara ai danu senemui ese e uduguiraigu, e kara koikoi henigu dainai. 28 Badina be na gwau hamatalaia baina henidia nato tanona lalonai na hakaudia vareai negana ai, idia ese ororo latana ta eiava rauna urumona auna e itaia negadia iboudiai na edia boubou ḡaudia na unuseni ai e hahelaḡadia, bona edia herahia karadia amo danu e habadugu. Unuseni ai taunimanima lalodia ihanamodia bonadia e hadaedia, bona unuseni ai danu edia inuinu bouboudia ududia ahudia e bubu nege. 29 (Na hamaorodia, nato, Atai gabuna o lao heniamu be edena? Taunabunai, ia ladana e hatoamu Bama,
“Bama” anina na “atai gabuna”.
ema bona ina dina.)
30 Taunabunai, Israel besena ba hamaoroa, baoto, Ḡaubada Iehova na ini e gwau tomamu: Senemui heḡereḡeredia ai ba hahemiro, bona edia ḡau dika-rohorohodia igavadia ai ba raka siri, a? 31 Emui herahia ḡaudia o henimu, bona natumui mamaruanedia na ḡole-oho boubou ḡaudia ai o halaodiamu, negadia ai na umui na sibomui o hahemiromu, emui kaivakuku iboudiai ida, ema bona ina dina. Israel besena e, ba nanadaigu a? Ḡaubada Iehova na e tomu: Lau na maurimu heḡereḡerena, umui na basio nanadaigu.

32 Emui lalo-hadai anina na nega ta ai basine vara; o laloamu, o tomu “Bese idau-idau, tano idau-idau besedia, heḡereḡeredia ai baia hahelao, au bona nadi baia toma henidia diho”.

33 Ḡaubada Iehova na e tomu: Lau na maurimu heḡereḡerena, momokani mai imagu goadana bona mai imagu itoi-rorona bona mai badu-hebubugu ida baina pavapavamui. 34 Bese idau-idau bogaragidia amo baina hakaumui lasit bona lalodiai vada o karoho rohoroho tanodia amo baina gogomui, mai imagu goadana bona mai imagu itoi-rorona bona mai badu-hebubugu ida. 35 Bena bese idau-idau edia tano ḡaḡaena ai baina hakaumui vareai; unuseni ai hevaira-hehenida ai baina hahemaoro henimui. 36 Aigupto tano-ḡaḡaena ai senemui na hahemaoro henidia heḡereḡerena ai umui danu baina hahemaoro henimui. Ḡaubada Iehova na e herevamu. 37 Itotohi henuna amo baina harakamui hanai, bona ta ta amo baina harakamui vareai. 38 Daḡedaḡe taudia bona egu taravatu e tata utumu taudia na umui bogaragimui amo baina negedia daure, e noholaiamu tanona amo baina hakaud a lasi, a Israel tanona lalonai basie raka vareai. Bena ba diba lau na Iehova.

39 A oi, Israel besena e, Ḡaubada Iehova na ini e gwau tomamu: Bema basio kamonai henigu, vada baola, ta ta ena kaivakuku ena kaivakuku isiaidia ba lao heni, harihati bona nega gabedia ai danu; a lau ladagu helaḡana na emui herahia ḡaudia eiava emui kaivakuku amo nega ta ai basio hamuoa lou.

40 Ḡaubada Iehova na e tomu: Badina be egu ororo helaḡana ai, Israel ororona dorina ai, unuseni ai Israel besena idoinai, ena taunimanima iboudiai, ese lau isiaigu bae lao heni una tano ai. Unuseni ai baina abidia dae; unuseni ai emui harihari ḡaudia bona emui herahia ḡaudia herea-daedia na emui ai baina gwaurai, bona emui boubou ḡaudia helaḡadia danu. 41 Bese idau-idau bogaragidia amo baina hakaumui lasi bona lalodiai o karoho rohoroho tanodia amo baina gogomui negana ai, lau ese baina abimui dae, bonana namo ḡauna na heto. Itelaḡagu na umui bogaragimui ai baina hahedinaraia, bese idau-idau vairadiai. 42 Bena Israel tanona, senemui na gwau henidia hamata baina henidia nato tanona, Ialonai baina hakaumui vareai negana ai, umui na ba diba lau na Iehova. 43 Unuseni ai emui dala bona sibomui o hahemirolai karadia iboudiai na ba lalodia une; bena sibomui ba hedadarai, emui kara dika iboudiai daidiai. 44 Bena lau ladagu bagunai baina kara henimui, dia emui dala dikadia eiava emui kara bodagadia heḡereḡeredia, negana ai umui ba diba lau na Iehova. Israel besena e, Ḡaubada Iehova na e herevamu.

45 Iehova ena hereva na egu ai e kau, eto, 46 Taunimanima natuna e, talaimu na diho kahana ba henia, diho kahana latanai ba haroro, bona diho kahana uda-tanona latanai ba peroveta. 47 Hari diho kahana udana ba hamaoroa, baoto, Iehova ena hereva ba kamonai. Ḡaubada Iehova na ini e gwau tomamu: A itaia, oi lalomu ai lahi ta baina ha-araia; bena una lahi ese au mauridia iboudiai bona au masedia iboudiai na baine aradia ore; ta ese lahi hururu-hururuna basine habodoa, bona vaira iboudiai, diho kahana amo ela bona mirigini kahana, na baine hodaridia. 48 Taunimanima iboudiai na bae diba lau Iehova ese na ha-araia; bena ta ese basine habodoa. 49 Bena lau nato, Ḡaubada Iehova e, idia ese e herevalaigumu, e tomu “Ia na sivarai heḡereḡeredia igwauraidia tauna ani?”

Copyright information for `MEU