Ezekiel 30

Aigupto ihabua-tarina

Iehova ena hereva na egu ai e kau, eto, Taunimanima natuna e, a peroveta, baoto, Ḡaubada Iehova ini e gwau tomamu:

A tai lolololo, aoto
“Dina madi ihabaina!”
Badina be una dina vada e kahikahimu,
Iehova ena dina vada e kahikahimu;
ia na ori momo dinana,
bese idau-idau ihabua-taridia dinana.
Dare ta na Aigupto latanai baine kau,
Ialo-hisihisi bada-herea na Etiopia ai baine vara,
bae aladia mase taudia na Aigupto ai bae hekida diho,
bona taḡana bae huaia lao,
bona ena abdiholo bae heḡiḡi dobi, negana ai.
Etiopia bona Put bona Lud bona Arabia idoinai bona Libia taudia, bona idia ida e ḡaukara heboumu taudia, na idia ida dare ai bae mase.

Iehova na ini e gwau tomamu:
Aigupto e duruamu taudia na bae hekida diho,
bona ena hekokoroku taudia na bae moru;
Migdol amo ela bona Suene
idia na dare ai bae mase, ia lalonai,
Ḡaubada Iehova na e herevamu.
Ia na baine vahu, vada e vahu tanodia bogaragidiai,
ena hanua danu, vada e heḡiḡi dobi hanuadia bogaragidiai.
Bena Aigupto baina ha-araia
bona iduruna taudia iboudiai bae darere negana ai,
idia na bae diba lau na Iehova.
Una dina ai gwaukau taudia na mai heaudia ida lauegu amo baela, Etiopia taudia bae hahebolorudia; bena lalo-hisihisi bada-herea na latadiai bae kau, Aigupto ihabua-tarina dinana ai; badina be, a itaia, dinana be e maimu.

10 Ḡaubada Iehova na ini e gwau tomamu:
Aigupto tagana baina ha-orea,
Nebukadresara, Babulono pavapavana, imana amo.
11 Ia mai ena orea taudia, hahegari bada-herea oreana bese idau-idau bogaragidiai,
tano ihabua-tarina totona baina havareaidia;
bena edia dare bae veridia lasi, Aigupto ihadikana,
tano na hirua amo bae hahonudia.
12 Lau ese Nilo sinavaina baina hakororoa,
tano na baina hoia, kara dika taudia ediai;
tano mai anina idoinai baina havahuradia,
idau taudia imadia amo.
Lau Iehova vada na hereva.

13 Ḡaubada Iehova na ini e gwau tomamu:
Kaivakuku baina habuadia tari
bona dirava laulaudia baina ha-oredia Memefisi ai;
Aigupto tanona ai pavapava ta basine noho lou,
unu amo gari baina havaraia Aigupto tanona ai.
14 Pataro na baina havahua,
Soan na baina doua,
bona hahemaoro karadia na
Tebe latanai baina kara.
15 Pelusio, Aigupto ena gabu aukana, latanai
egu badu ḡaraḡara na baina bubua dobi,
bona Tebe ena hutuma baina negedia daure.
16 Aigupto baina doua,
Pelusio na baine hisihisi bada herea;
Tebe na bae hamaurua,
maḡuna na bae heḡiḡi dobi.
17 Ono bona Pibesete edia eregabe taudia na dare ai bae mase,
bona hahinedia na iḡuidia ai bae laohaidia.
18 Tehafenehe ai dina na baine dibura,
Aigupto ena siahu unuseni ai baina hadarerea negana ai;
ena siahu, e heaḡilaiamu ḡauna, na baine ore,
ori ta ese baine ḡovaia ahu;
bona natuna hahinedia na iḡuidia ai bae laohaidia.
19 Unuhetomana lau ese hahemaoro karadia baina kara Aigupto latanai,
bena idia na bae diba lau na Iehova.
20 Laḡani ihagwauta-tana huana gini gunana dinana ihahituna ai, Iehova ena hereva na egu ai e kau, eto, 21 Taunimanima natuna e, Farao, Aigupto pavapavana, imana vada na hakwaidua; a itaia, ihanamona totona ikumi dabuana amo bema kumia, bena bema auka, dare iḡaukaralaina heḡereḡerena, a ta ese se kumia. 22 Taunabunai Ḡaubada Iehova na ini e gwau tomamu: A itaia, lau ese Farao, Aigupto pavapavana, na inai heniamu, ia imana ruaosi baina hakwaidudia, mai goadana ḡauna bona e kwaidu guna ḡauna; bena dare na imana amo baina hamorua. 23 Aigupto taudia baina hakarohodia bese idau-idau bogaragidiai, baina hakarohodia rohoroho tano idau-idau lalodiai. 24 Babulono pavapavana imana baina ha-aukadia, bona egu dare na ia imana ai baina atoa; a Farao imana na baina hakwaidudia, bena ia na ia vairanai baine ḡanaḡana, mase berona e davaria tauna na heto. 25 Babulono pavapavana imana baina hagoadadia, a Farao imana na bae hedabarai; bena idia na bae diba lau na Iehova. Egu dare na Babulono pavapavana imana ai baina atoa negana ai, ia ese Aigupto tanona baine dudui henia; 26 bena Aigupto taudia baina hakarohodia bese idau-idau bogaragidiai, baina hakarohodia rohoroho tano idau-idau lalodiai. Bena idia na bae diba lau na Iehova.

Copyright information for `MEU