Ezekiel 39

Taunimanima natuna e, Gog latanai ba peroveta, baoto, Ḡaubada Iehova na ini e gwau tomamu: Gog e, Mesek bona Tubal lohiadia badana, lau ese na inai henimumu; lau ese baina haginimu kerehai bona baina lulumu lao, mirigini kahana gabu daudaudia amo baina mailaimu, baina hakaumu, Israel ororodia ituari-henidia ai; bena emu peva na imamu laurina amo baina pataia oho, bona emu diba na imamu idibana amo baina hamorudia. Bena Israel ororodia ba hekida diho, oi bona emu hutuma idoinai bona e bamomumu besedia; bena lau ese baina abimui, kasiri-ani manudia idau-idau bona uda bolomadia adia ai baina halaomui; tano paka ai do ba hekida diho, badina be lau, Ḡaubada Iehova, vada na hereva. Lau ese lahi baina siaia lao, Magog latanai, bona kone tanodia ai e noho namonamomu taudia latadiai; bena idia bae diba lau na Iehova.

Bena lau ladagu helaḡana baina hahedibalaia, egu bese Israel bogaraginai; baina gwaudia tao, lau ladagu helaḡana basie hamiroa lou; bena bese idau-idau na bae diba, lau na Iehova, Helaḡa Diravana Israel ai. Ḡaubada Iehova na e tomu, A itaia, ia na e maimu, vada be kaumu. Lau ese vada na herevalaia dinana bunai.

Bena Israel hanuadia e noholaidiamu taudia na bae raka lasi, tuari ḡaudia na Iahi ai bae haboudia, bae doudia; kesi bona keme auridia, peva bona diba, kareva bona io. Lahi audia ai bae halaodia ela bona laḡani hitu bae ore; 10 taunabunai idia ese au na tano paka ai basie abi eiava uda ai basie utu, badina be edia lahi na unu tuari ḡaudia amo bae raku; edia ḡau e dadi taudia ediai ḡau ma bae dadi, bona edia kohu e abi oho taudia ediai kohu ma bae abi oho. Ḡaubada Iehova na e herevamu.

11 Una dina ai lau ese Gog na gara gabuna ta baina henia Israel ai, koura ta ladana na “Laolao taudia edia Koura”, Tadi Gohuna mairiveina kahana ai. Laolao taudia edia dala na baine helao ahu, badina be unuseni ai Gog bona ena hutuma idoinai na bae guridia; ladana bae hatoa Hamono-gog Kourana. 12 Hua hitu lalodiai Israel besena taudia ese bae guridia, tano ihaḡoevana totona. 13 Tano taudia iboudiai ese bae guridia; bena idia haridia bae namo, lau ese hairaigu baina hahedinaraia dinana ai. Ḡaubada Iehova na e herevamu. 14 Tatau haida bae gwauraidia hidi, idia ese tano bae rakaia hanai loulou bona tano kopina ai miadia taudia bae guridia totona; unu amo tano bae haḡoevaia. Hua hitu bae ore ai do bae hetahu. 15 Bena tano iraka-hanaina ai idia ta ese tau ta turiana baine davaria negana ai, ia ese toa ta baine holoa una turia badibadinai, ela bona mase iguridia taudia ese Hamono-gog Kourana ai bae ḡuria. 16 (Hanua ta ladana Hamona na unuseni ai danu.) Tano na unu bae haḡoevaia toma.

17 Taunimanima natuna e, Ḡaubada Iehova ese ini e hereva henimu tomamu: Manu idau-idau bona uda boromadia iboudiai na ba hereva henidia, baoto, Ba hegogo bena baoma; kaha iboudiai amo ba hebou, boubou ariana lau ese na hegaegaelaiamu amui na bavania, boubou ariana badana Israel ororodia ai; vamu bame ani bona rara bame inu. 18 Goada-herea taudia hidiodia bavani, bona tanobada lohiadia raradia ba inu; mamoe mamaruanedia bona mamoe natudia bona nani bona boromakau mamaruanedia danu, iboudiai na Basan ubu-ubu boromadia. 19 Digara bavania, ela bona bogamui bae kunuka-kunuka, bona rara ba inua, ela bona ba kekero, hari boubou ariana, amui na heḡaeḡaelaiamu ḡauna, lalonai. 20 Egu dabara ai, hosi bona hosi-gui taudia amo, goada-herea taudia bona tuari taudia idau-idau amo, bogamui do bae kunu. Ḡaubada Iehova na e herevamu.

21 Lau hairaigu na bese idau-idau bogaragidiai baina hahedinaraia; bena bese iboudiai ese egu hahemaoro karana bona imagu, latadiai na atoa ḡauna, bae itadia. 22 Israel besena na una dina amo bae diba, lau na Iehova, edia Dirava. 23 Bena bese idau-idau na bae diba, Israel besena na iḡui gabuna ai ela, edia kara havara dainai; badina be edia kara amo e koigu dikadika dainai lau ese vairagu na edia amo na hunia, bona adia inai taudia imadia ai na atodia, bena iboudiai na dare ai e mase. 24 Edia miro bona edia kerere heḡereḡeredia ai na kara henidia, bona vairagu na edia amo na hunia.

25 Taunabunai, Ḡaubada Iehova na ini e gwau tomaunu: Harihari Iakob ena noho-namo baina havaraia lou, bona Israel besena idoinai baina bogaia hisi; bona lau ladagu helaḡana vageḡena baina vageḡe. 26 Bena bese idauidau bogaragidia amo baina loulaidia, bona inaidia edia tano hidaosi amo baina haboudia, bona idia edia amo egu helaḡa na bese momo vairadiai baina hamomokania negana ai, idia ese edia hemarai bae laloa boio, bona edia kara koikoi, lau e koilaigu karadia, edia tano ai e noho namonamova bona haida ese asie hagaridiava negadia ai e karava karadia, danu bae lalo boio. 28 Bena idia bae diba, lau na Iehova, edia Dirava; badina be gabu daudau ai na hanohodia, bese idau-idau bogaragidiai, bena ma na gogodia lou, edia tano korikori ai. Lau ese idia ta na bese idau-idau bogaragidiai basina rakataia lou; 29 bona vairagu na edia amo basina hunia lou; egu Lauma ese Israel besena baine rohea. Ḡaubada Iehova na e herevamu.

Copyright information for `MEU