Ezekiel 42

Bena ia ese e hakaugu lao, laloma maḡuna lalonai, mirigini kahana ai, ela bona dubu maḡuna bona mirigini kahana rumana e vaira henidia daiutudia. Hari mirigini kahana rumana ena lata na kiubit sinahu-ta bona ena lalaba na kiubit imahui. Laloma kahana maḡuna ena kiubit ruahui badibadidiai bona murimuri kahana maḡuna nadi-ariarana vairanai na dehe haida e hevaira heheniva, ere toiosi ai. Daiutu vairadiai, raka-hanai gabuna ta ese laloma kahana e lao heniava, ena lababa na kiubit gwauta bona ena lata na kiubit sinahu-ta; daiutu iduaradia na mirigini kahana ai. Atai daiutudia na taidia i'iora, badina be idia dehedia lababadia na taidia babada a henu bona bogaragi eredia dehedia lababadia na taidia mamaraḡi. Badina be idia na ere toi ai bona asi edia au-tubua, murimuri kahana maḡuna ena au-tubua heḡereḡeredia, una dainai atai daiutudia na taidia mamaraḡi a henu bona bogaragi eredia daiutudia na taidia babada. Murimuri ai na hehari maḡuna ta, ia bona hari daiutu padadia idoinai na heḡereḡere. Ia na murimuri kahana maḡuna e lao heniava, bona daiutu e vaira henidiava. Ena lata na kiubit imahui. Badina be murimuri kahana maḡuna daiutudia edia lata na kiubit imahui, a dubu e vaira heniava daiutudia edia lata na kiubit sinahu-ta. Ini daiutu henudiai na raka-vareai gabuna ta, mairiveina kahana ai, murimuri kahana maḡuna amo daiutu lalodiai e raka vareaiva gabuna ai. 10 Murimuri kahana maḡuna na unu amo e hematama.

Diho kahana ai danu, maḡu bona ruma hegaga-henina ai na daiutu haida,
11 bona raka-hanai gabuna ta na idia vairadiai. Idia na mirigini kahana daiutudia heḡereḡeredia, edia lata bona edia lababa na unu idia ida heheḡereḡere; edia raka lasi gabudia bona ihaginidia daladia bona iduara danu na unu idia ida heheḡereḡere. 12 Hari diho kahana daiutudia henudiai na raka-vareai gabuna ta, mairiveina kahana ai, unuseni ai raka-hanai gabuna ai e raka vareaimu. Idia vairadiai be hehari maḡuna ta.

13 Bena ia ese e hamaorogu, eto, Mirigini bona diho kahadia daiutudia, maḡu hevaira-hehenina ai, na daiutu helagadia; hahelaḡa taudia ese Iehova bae raka henia kahi negadia ai, herahia anianidia helaḡa-hereadia na unuseni ai bae ani; unuseni ai herahia anianidia helaḡa-hereadia bae atodia - naoa boubouna, bona kara dika bona kerere iabi-ohodia bouboudia ḡaudia; badina be una gabu na helaḡa. 14 Hahelaḡa taudia na gabu helaḡana ai bae raka vareai negadia ai, idia na unu amo basie raka lasi murimuri kahana maḡuna ai ela bona kara helaḡadia ikaradia totona e hahedokilai dabuadia na unuseni ai bae dokidia oho bona bae atodia guna, badina be unu dabua na hehelaga. Idia ese dabua idaudia bae dokilaidia guna, bena hanua taudia edia gabu bae raka henia kahi.

15 Ia ese dubu maḡuna laloma kahana e hahetohoa vaitani, bena mairiveina kahana e vaira henia ikoukouna amo e hakaugu lasi, bena dubu maḡuna murimurina kahana e hahetohoa heḡeḡe. 16 Mairiveina kahana na hahetoho sirihona amo e hahetohoa; ia na kiubit sinahu-ima, hahetoho sirihona ai. 17 Bena kahana ma ela, mirigini kahana e hahetohoa, kiubit sinahu-ima hahetoho sirihona ai. 18 Ma kahana ela, diho kahana e hahetohoa, kiubit sinahu-ima hahetoho sirihona ai. 19 Ma kahana ela, lahara kahana e hahetohoa, kiubit sinahu-ima hahetoho sirihona ai. 20 Ia ese kaha haniosi e hahetohodia. Magu ta ese e ḡegea ahu, ena lata na kiubit sinahu-ima bona ena lababa na kiubit sinahu-ima; una maḡu ese tano helaḡana bona tano uhuḡaina e kaharuadiava.

Copyright information for `MEU