Galatians 2

Iuda taudia edia taravatu

Laḡani gwauta-hani e ore murinai Ierusalem nala; Banaba bona Tito ese e bamogu. Lalogu ai e hedinarai herevana dainai nala. Haridia namodia taudia ida sibomai a hebouva, bena lau ese sivarai namo bese idau-idau taudia bogaragidiai na harorolaiamu herevana na hamaorolaidia, egu ḡaukara na karaiava bona na karaiamu bema asi anina na garina. Bamogu ta, Tito, na Helene tauna, to iperitomena asie haḡanilaia.

Varavara koikoidia haida e vareai hehuni, emai ura-kwalimu Keriso Iesu ena amo bae hasinadoa, bena bae ḡuimai lou eto. To ai na asia manoka, bona hora ta ai asia kamonai henidia, lasi ona lasi vaitani; sivarai namo ena hereva momokani dekemui ai bae mia helaoreana.

A haridia namodia taudia (edia dagi na herevana, asina laloamu; Dirava ese taunimanima toadia se lalomu) ḡau matamatana ta asie henigu. A sivarai namo Petro e henia, e peritomedia taudia baine harorolai henidia, heḡereḡerena sivarai namo lau e henigu, asie peritomedia taudia baina harorolai henidia. Badina be Petro na peritome taudia edia aposetolo ai e halaoa Tauna ese lau danu bese idau-idau taudia edia aposetolo ai e halaogu. Taunabunai, Iakobo bona Petro bona Ioane (idia be ekalesia duna e gwauraidiava taudia) vada dibadia harihari-bada lau danu vada e henigu. Bena idia ese lau bona Banaba imamai e abi, hetura toana; ai raruosi bese idau-idau taudia dekedia baiala eto, a idia be peritome taudia dekedia baela; 10 ḡau tamona, ogoḡami taudia baia lalodia eto. Karana bina vada na goadalaiamu.

11 A Pelro na Antioka ela negana ai, lau ese na gwau henia, badina be ia na e kerere. 12 Badina be haida Iakobo ena amo do asiela negana ai, ia na idau bese taudia ida e aniani hebouva; a idia ela negana ai, ia e raka muri, idau bese taudia edia amo e raka oho, peritome taudia garidia. 13 Iuda taudia oredia danu ia ida unu e koikoi tomava; bona Banaba danu edia koikoi ese e hahekwakwanaia.

14 A lau ese na itadia, idia na asie raka maoromaoro, bona sivarai namo ena hereva asie badinaia, bena Petro na gwau henia, idia iboudiai vairadiai, nato “Oi na tau luda, a idau bese taudia heḡereḡeredia o nohomu, dia Iuda taudia heḡereḡeredia; matona, idau bese taudia o haḡanidiamu, Iuda taudia heḡereḡeredia bae noho o tomu”.

15 Ai be Iuda taumai korikori, dia kara dika taudia idau bese amo; 16 a ai dibamai tau ta taravatu ibadinana dainai maorona basie gwauraia, a Iesu Keriso ikamonai-henina mo dainai. Taunabunai, ita ese Keriso Iesu ta kamonai henia, bena maoroda bae gwaurai, Keriso ikamonai-henina dainai, dia taravatu ibadinana dainai; badina be taravatu ibadinana dainai tau ta maorona basie gwauraia.

17 A ita na Keriso dainai maoroda igwauraidia ta tahuamu negana ai ta kara dikamu, unu amo Keriso na kara dika ikahalaina tauna ai e laomu a? Lasi ona lasi vaitani. 18 Badina be na kurea dobi ḡauna bama haginia lou, lau na kara havara taugu ai bama lao. 19 Badina be taravatu dainai vada na mase taravatu enai, Dirava enai baina mauri helaoreana. 20 Lau na Keriso ida vada e hasataurogu; ḡau tamona, na maurimu, a dia lau, to Keriso hari lau lalogu ai e maurimu. Bona egu mauri, tau-anigu ai na maurimu, na Dirava Natuna na abidadama heniamu dainai na maurimu. Ia ese e ura henigu bona sibona e heni, lau daigu ai. 21 Dirava ena harihari-bada na asina dadaraiamu; badina be kara maoromaoro na taravatu amo bema vara, Keriso ena mase bema asi anina.

Copyright information for `MEU