Genesis 18

Dirava ese Abraham ma e hahedinarai henia

Iehova ese Abraham enai ma e hedinarai lou, Mamare ena au Helaḡadia badidiai. Negana be dina tubua, bona ia na ena dabua kalagana iduarana ai e helaiva. Ia na e gaga isi, tatau tatoi e itadia, ia vairanai gigini; e itadia negana ai, ia na ena dabua kalagana iduarana amo e heau lasi, tano ai e goru diho, eto, Ḡauka e, boma lalo namo henigu, lau, emu hesiai tauna, basioma rakagu hanai. Mani ranu taina ae mailaia, aemui bae huri, bena ina au ikerukeruna ai lagamui bavani. Aniani taina danu mani aina mailaia, taumui ihagoadadia; gabeamo emui dala ai do ba raka. Lau, emui hesiai tauna, egu ai vada o kau badina korikori binai. Idia eto, Emu hereva heḡereḡerena vada ba karaia.

Bena Abraham na dabua kalagana ai e heau vareai, Sara e hamaoroa, eto, Flaoa irau autoi avabi, ba kuia, ataga ba gabu. Bena e heau lao, ena boromakau serina ai boromakau natuna ta, hidiona manoka-manokana bona mai digarana ḡauna, e abia, ena hesiai tauna ta e henia; bena ia ese e nadua haraḡa-haraḡa. Bena bata bona rata e abi, bona ena mero ese e nadua boromakauna; bena hari tatoiosi vairadiai e dabara, au ikerukeruna ai, bona badibadidiai e gini ela bona vada e aniani vaitani.

Bena idia ese e nanadaia, eto, Adavamu Sara be edeseni ai? Ia eto, Ia na dabua kalagana lalonai. 10 Bena idia ta eto, Laḡani vairai do baina lou henimu, bena adavamu Sara baine mara, mero ta baine abia. Sara na dabua kalagana iduarana murinai gini, bena ia ese una hereva e kamonai. 11 Una negana ai Abraham bona Sara vada e buruka herea, bona Sara ena nega vada e hanaia. 12 Taunabunai, Sara na e kiri, eto, Egu nega vada e ore, bona adavagu danu vada e buruka, be, moale baina davaria diba a? 13 Bena Iehova ese Abraham e nanadaia, eto, Dahaka dainai Sara e kirimu, e tomu “Burukagu ai natugu ta baina abia a”? 14 Be, hoa karana ta mia Iehova basine karaia diba, a? Laḡani vairai, vada na gwauraia hamata negana ai, do baina lou henimu, bena Sara ese natuna baine abia. 15 Bena Sara e heḡore, eto, Lau na asina kiri. Badina be ia na e gari. A ia eto, Lasi, oi na o kiri.

16 Bena hari tatoiosi e tore isi, Sodoma dalana ai e raka; bona Abraham ese dala ai e bamodia. 17 Bena Iehova eto, Egu kara na Abraham ena amo baina hunia, namo eiava? 18 Badina be Abraham na bese badana bona goadana ai bainela, bona tanobada besedia iboudiai na ia dainai hahenamo bae abia. 19 Badina be vada na abia hidi, ia ese natuna bona garana do baine reḡudia, idia na Iehova ena dala ai bae raka, bona kara namodia bona maoromaorodia bae kara, Iehova ese ena gwauhamata Abraham enai baine hamomokania helaoreana. 20 Bena Iehova eto, Sodoma bona Gomora haridia na didika bona edia kara havara danu na babada heherea dainai, 21 harihari vada baina diho, baina itadia, edia kara na unu haridia dikadia egu ai vada e kau heḡereḡeredia eiava lasi: baina diba ḡoevaḡoeva. 22 Bena hari raruosi na e raka oho, Sodoma dalana ai ela; a Abraham na dounu Iehova vairanai gini.

23 Bena Abraham na e raka kahira, e nanadaia, eto, O, kara maoromaoro taudia na kara dika taudia ida ba habuadia tari hebou a? 24 Bema kara maoromaoro taudia imahui nonoho una hanua ai, ba habuaia tari a? Basio bogaia hisi, unu kara maoromaoro taudia imahui daidiai a? 25 Kara maoromaoro taudia bona kara dika taudia na basio aladia bou ani? Kara maoromaoro taudia bona kara dika taudia ahudia bae tamona na dia oiemu kara ani? Tanobada idoinai ihahemaoro-henina Diravana basine kara maoromaoro a? 26 Bena Iehova eto, Sodoma lalonai kara maoromaoro taudia imahui baina davaridia, hanua idoinai baina bogaia hisi idia daidiai. 27 Bena Abraham ma e hereva, eto, Lau na ḡahu kavakava mo, to lalogu vada na ha-aukaia Ḡaubada iherevahenina: 28 readia kara maoromaoro taudia hariahui ima mo nonoho; o, hanua idoinai ba habuaia tari, ima mo lasi dainai a? Iehova eto, Hari-ahui ima baina davaridia, hanua na basina habuaia tari. 29 Ia na ma eto, Readia hari-ahui nonoho dahaka. Iehova eto, Hari-ahui daidiai baina bogaia hisi. 30 Ma eto, Ḡaubada e, baina noinoi lou basio badu ani? Toi-ahui bema noho ede bema heto? Iehova eto, Toi-ahui baina davaridia, basina habuaia tari. 31 Ma eto, Lalogu vada na ha-aukaia, Ḡaubada ihereva-henina: ruahui bema noho, ede bema heto? Iehova eto, Ruahui daidiai baina bogaia hisi. 32 Ma eto, Ḡaubada e, basio badu, ina nega tamona mo ma baina noinoi: gwauta hona bema noho, ede bema heto? Iehova eto, Gwauta daidiai baina bogaia hisi. 33 Iehova na Abraham ida e hereva-hereva vaitani, bena ena dala e raka lao, a Abraham na ena noho gabuna e lou henia.

Copyright information for `MEU