Genesis 27

Esau bona Iakob

Isaak na vada e ḡauka, matana danu e valahu-valahu, ḡau ta seitaia ḡoeva. Bena ia ese natuna roboana Esau e boiria, eto, Natugu o! Esau eto, Lau o ina. Isaak ma eto, Ame itagu, vada name buruka, egu mase dinana na asi dibagu. Taunabunai na noimumu, emu diba pauana bona emu peva bavabi, ba ha labana, dia ta bavalaia lauagu; bena vamu namona lalogu ese e ura heniamu heḡereḡerena na ba nadua, dekegu ba mailaia; baina ania, bena do basina mase ai baina hanamomu guna. Hari Isaak ena hereva natuna Esau e hamaorolaia na Rebeka danu e kamonai. Bena Esau na eha labana, dia ta baine alaia, baine mailaia eto.

Bena Rebeka ese natuna Iakob e hereva henia, eto, Tamamu ese kakamu Esau e hamaorolaia herevana na kamonai; ia eto “Dia ta ba mailaia, vamu namona ba nadua lauagu; baina ania, bena do basina mase ai Iehova vairanai baina hanamomu guna”. Taunabunai, natugu e, eregu ba kamonai, baina haduamu heḡereḡerena mo ba karaia. Aola, nani serina ai nani natudia namodia rua bavabi, dekegu ba mailai; bena lau ese vamu namona ai baina halao tamamu ana, ia ese e ura heniamu ḡauna heḡereḡerena. 10 Bena vada ba laohaia tamamu dekenai; baine ania bena do basine mase ai baine hanamomu. 11 Bena Iakob ese sinana Rebeka e haere henia, eto, Kakagu Esau na tauna mai derana, a lau kopigu be manada. 12 Readia tamagu ese baine darahugu, baine dibagu koikoi taugu, bena baine uduguiraigu, basine hanamogu. 13 Sinana eto, Heuduguirai na lau latagu ai baine mia: lau eregu a kamonai, aola, bavabi, dekegu ba mailai. 14 Bena ia ese eha abidia, sinana dekena e mailai. Bena sinana ese vamu namona e nadua, tamana ese e ura henia ḡauna heḡereḡerena. 15 Bena Rebeka ese natuna roboana Esau ena dabua namona ta ruma ai mia na e abia, natuna tau-muritai Iakob e hadokilaia; 16 nani natudia kopidia danu imana ruaosi bona aiona e havavalai. 17 Bena hari vamu bona flaoa e dabara, natuna Iakob e henia.

18 Iakob na tamana dekena ela, eto, Tamagu e! Ia na e haere, eto, Lau o ina: natugu e, oi be daika? 19 Iakob ese tamana e haere henia, eto, Lau binai Esau, natumu roboana, emu hahedua vada na badinaia; a helai tore, dia vada na alaia be bavania, bena ba hanamogu. 20 Bena Isaak ese natuna e nanadaia, eto, Natugu e, ede o davaria haraḡa-haraḡa toma? Ia e haere, eto, Badina be Iehova emu Dirava ese e durugu. 21 Bena Isaak ese Iakob e hamaoroa, eto, Natugu e, mani a raka kahi mai, baina darahumu oi na momokani lau natugu Esau eiava lasi. 22 Bena Iakob na tamana Isaak dekena e raka kahi lao. Ia ese e darahua, bena eto, Gado be Iakob gadona, a ima be Esau imana. 23 Ia na toana asi dibana, badina be imana na huika-huika, kakana Esau imana na heto; taunabunai ia ese e hanamoa. 24 Bena Isaak eto, Momokani, oi na natugu korikori Esau ani? Ia eto. Oibe. 25 Bena Isaak eto, Mani a mailaia dekegu ai, natugu emu vamu baina ania, bena baina hanamomu. Taunabunai, ia ese e mailaia, bena e ania; vine ranuna danu e mailaia, bena e inua. 26 Bena tamana Isaak ese e hamaoroa, eto, Natugu e, mani a raka kahi mai, ame harahugu. 27 Bena ia na e raka kahi, e harahua. Isaak ese ena dabua bonana e kamonai, bena e hanamoa, eto,

Inai! Natugu bonana na
Iehova ese e hanamoa imeana na heto:

28 Taunabunai guba hununa Dirava ese baine henimu,
Bona tanobada digarana danu,
Uit momo bona vine ranuna momo danu.
29 Taunimanima ese oi isiaimu bae lao heni,
Bese idau-idau be vairamu ai bae igo diho;
Tadikakamu biagudia ai baola,
Sinamu natuna be vairamu ai bae igo diho;
Bae uduguiraimu taudia na do bae uduguiraidia,
Bae hanamomu taudia na do bae hanamodia.
30 Isaak ese Iakob ihanamona e hadokoa, Iakob danu Isaak vairana amo e raka lasi, asi vanahana kakana Esau na labana amo e lasi. 31 Ia danu vamu namona e nadua, tamana dekena e laohaia, tamana e hamaoroa, eto, Tamagu e, a helai tore, natumu egu vamu avania, bena ba hanamogu. 32 Tamana Isaak ese e nanadaia, eto, Oi be daika? Ia e haere, eto, Lau binai natumu roboana Esau. 33 Bena Isaak kudouna e hetaha, eto, Hari tau be daika, vamu eha abia, e mailaia dekegu ai, oi do toma ai na ania ore, bona vada na hanamoa danu? Momokani, ia ese hahenamo anina do baine abia. 34 Esau ese tamana ena hereva e kamonai ai e tai, e tai lolololo, tamana e tai henia, eto, Lau danu, tamagu e, lau danu ame hanamogu. 35 Tamana eto, Tadimu vada ema, mai ena koikoi, ihanamomu vada e dadia. 36 Esau eto, Ia ladana e hatoa Iakob
“Iakob” anina be “Ibolona”.
na mai anina ani? Badina be nega rua vada e bologu: roboa ahuna e abia guna, harihari ihanamogu danu vada e abia. Hahenamo ta dia mia lauegu a?
37 Isaak ese Esau e haere henia, eto, Inai! Oi biagumu ai vada na halaoa, bona tadikakana iboudiai vada na henia, ena hesiai taudia ai baela; uit bona vine ranuna danu vada na gwaurai iena. Natugu e, dahaka baina karaia oiemu ai? 38 Bena Esau ese tamana e hamaoroa, eto, Tamagu e, emu hahenamo be tamona mo a? Tamagu e, lau danu ame hanamogu. Bena Esau e tai dikadika. 39 Bena tamana Isaak ese e haere henia, eto,

Inai! tanobada digarana gabuna ai basio noho,
Guba hununa atai amo e dihomu gabuna ai basio noho.
40 To emu dare goadana ai ba mauri.
Tadimu isiaina ba lao heni;
To negana baine gini dae emu siahu baine herea,
Bena ena maduna na paḡamu amo ba negea daure.
41 Esau ese Iakob e inai henia, tamana ena hahenamo dainai; bena lalona ai eto, Tamagu itai-taina dinadia be kahikahi; unu muridiai tadigu Iakob baina alaia mase. 42 Haida ese Esau ena hereva Rebeka e hamaorolaia, bena Rebeka ese natuna tau-muritai Iakob e boiria, e hamaoroa, eto, A kamonai, kakamu Esau ese lalona e hadaiamu, baine alamu mase e tomu. 43 Taunabunai, natugu e, eregu a kamonai: a tore isi haraḡa, Haran baola, taihugu Laban dekenai; 44 nega taina ia dekenai ba noho, ela bona kakamu lalona baine keru. 45 Ia na do baine laloa boio ede o karaia toma, bena ena badu do baine ore; una negana ai hereva baina siaia, bena ba lou mai. Umui raruosi dina tamona egu ai ba boio anina be dahaka?
46 Bena Rebeka ese Isaak e hereva henia, eto, Name hesiku ini Hiti hahinedia daidiai. Iakob ese ini Hiti taudia natudia ina tano ai e nohomu ta baine adavaia, egu noho ede baine heto?

Copyright information for `MEU