Genesis 30

Iosef e vara

Rahela na gabani, una dainai ia ese kakana e mama henia. Bena ia ese Iakob e gwau henia, eto, Natugu basio henigu vada baina mase. Bena Iakob ese Rahela e badu henia, eto, Lau Dirava a? Ia ese mero emu ai e ruamu. Hahine na eto, Egu hesiai hahinena Bilha binai: ia dekenai ba raka vareai; bena lau tuigu ai baine mara, iena amo natugu baina abia. Taunabunai, ia ese ena hesiai hahinena Bilha na Iakob e henia, bena ia ese e adavaia. Bena Bilha na e rogorogo, e mara, mero ta e abia. Bena Rahela eto, Dirava ese vada e hahemaoro henigu, egu noinoi vada e abia dae, natugu vada e henigu. Bena ladana e hatoa Dan.
“Dan” anina be “Hahemaoro”.
Rahela ena hesiai hahinena Bilha ma e rogorogo, e mara, mero ihararuana e abia. Bena Rahela eto, Kakagu ida a hedaverai, vada na kwalimu. Bena mero ladana e hatoa Napatali.
“Napatali” anina be “Hedaverai”.


Lea vada e diba ia na basine rogorogo; bena ia ese ena hesiai hahinena Silpa e abia, Iakob e henia, baine adavaia. 10 Bena Lea ena hesiai hahinena Silpa e rogorogo, e mara, mero ta e abia. 11 Bena Lea eto, Egu madinamo negana binai. Bena mero ladana e hatoa Gad.
“Gad” anina be “Madi-namo”.
12 Bena Lea ena hesiai hahinena Silpa ma e rogorogo, e mara, mero ihararuana e abia. 13 Bena Lea eto, Na moalemu; hahine iboudiai danu bae hanamogu. Bena mero ladana e hatoa Asere.
“Asere” anina be “Moale”.


14 Uit iutuna negana ai, Ruben na ela, au-huahua ladana dudai haida e davaridia. bena e abi, sinana Lea dekena e laohai. Bena Rahela ese e noia, eto, Natumu ena dudai haida mani a henigu. 15 A Lea ese e gwau henia, eto, Adavagu o henaoa na ḡau pipikina a? Matona natugu ena dudai ba dadi o tomu. Bena Rahela eto, Natumu ena dudai ba henigu, bena hari hanuaboi adavada ida ba eno bou. 16 Adorahi ai, Iakob na uma amo e lasi, bena Lea na vairana ela, eto, Hari hanuaboi raruosi baita eno bou, natugu ena dudai na heni davadia. Bena una hanuaboi idia raruosi e eno bou. 17 Bena Dirava ese Lea e hakala henia; bena e rogorogo, e mara, mero iha-imana e abia, Iakob ena. 18 Bena Lea eto, Egu hesiai hahinena na adavagu na henia davana binai, Dirava ese vada e henigu. Bena natuna ladana e hatoa Isakara.
“Isakara” anina be “Davana”.
19 Lea ma e rogorogo lou, e mara, mero ihatauratoina e abia, Iakob ena. 20 Bena ia eto, Dava namona Dirava ese vada e henigu; harihari adavagu na dekegu ai baine noho tari, badina be natuna mamaruanedia tauratoi vada na henia. Bena mero ladana e hatoa Sebulun.
“Sebulun” anina be “Noho-tari”.
21 Una murinai ia ese natuna kekenina ta e abia, bena kekeni ladana e hatoa Daina.

22 Una negana ai Dirava ese Rahela e haḡerea, ena noinoi e abia dae; Bena ia danu e rogorogo. 23 E mara, mero ta e abia: bena eto, Dirava ese egu hemarai vada e abia oho. 24 Bena ladana e hatoa Iosef;
“Iosef” anina be “Ma ta”.
eto, Iehova ese ma ta bema henigu bema namo.

Iakob ese ravana e koia

25 Iosef e vara murinai, Iakob ese Laban e hamaoroa, eto, Mani emu kara a kahugu nege, egu gabu korikori bainala, egu tano korikori baina lou henia. 26 Adavagu bona natugu ba henigu, badina be idia daidiai oi isiaimu vada na lao heni. A kahugu nege; egu hekwarahi emu hesiai ilao-henina ai vada dibamu. 27 Laban eto, Na noimumu, mani emu kara basio raka oho; badina be lalogu vada eme parara Iehova ese vada e hanamogu oi daimu ai. 28 Davamu a gwauraia, bena baina henimu. 29 Iakob ese e haere henia, eto, Ede na hekwarahi tomava emu hesiai ilao-henina ai vada o itaia; dibamu danu emu seri vada e hutuma lau imagu ai. 30 Lau do asinama negana ai oi na vada o ogoḡami, harihari vada o taḡa; lau nama ema bona hari Iehova ese vada e hanamomu. A edena nega ai adavagu bona natugu ihataḡadia baina ḡaukara matama a?

31 Bena Laban eto, Dahaka baina henimu? Iakob eto, Ḡau ta basio henigu, to egu ura bavabia dae, bena emu seri ma baina reḡudia. 32 Hari dina ai emu seri ba hididia, mamoe mai toutoudia eiava mai revarevadia bona mamoe koremadia bona nani mai toutoudia eiava mai revarevadia iboudiai baina hakaudia siri: lau davagu bunu. 33 Nega gabedia ai vada ba dibagu, maoro eiava kerere: egu seri ai nani haida asi toutoudia asi revarevadia eiava mamoe kurokurodia ba davaridia, henao taugu ba gwauraigu. 34 Bena Laban eto, Emu hereva heḡereḡerena, unu baita kara toma. 35 Una dina ai ia ese nani mamaruanedia mai toutoudia bona mai revarevadia, bona nani hahinedia mai toutoudia bona mai revarevadia, bona mamoe koremadia, iboudiai e hakaudia siri, natuna e henidia, bae reḡudia. 36 Bena e siaidia lao, dauhai bae noho, dina toi rakadia heḡereḡerena. A Laban ena seri oredia Iakob ese e reḡudia.

37 Bena Iakob ese au rigidia matamatadia e utu, kopidia kahadia e nege, kahadia mimia, ita-itadia revareva na heheto. 38 Bena unu rigi mai revarevadia ranu gabudia ai e hagini, seri e ha-inudia negadia ai. Bena nani bona mamoe hahinedia na ranu gabudia ai e rogorogo, 39 unu rigi vairadiai; una dainai natudia e havaradia, kopidia na mai revarevadia. 40 Ini nani bona mamoe natudia Iakob ese e abidia hidi, iena seri ida e haboudia, Laban ena seri ai se atodia. 41 Bena nani bona mamoe hahinedia mai goadadia e rogorogova negadia ai, Iakob ese hari rigi vairadiai e hagini, ranu gabudia ai, rigi i'itadia ai bae rogorogo totona. 42 A manokadia e rogorogova negadia ai, hari rigi se hagini vairadiai. Taunabunai, nani bona mamoe manokadia na Laban ena seri ai, a goadadia na Iakob ena seri ai. 43 Taunabunai, Iakob ena taḡa e bada e laova: ena seri e hutumava; ena hesiai hahinedia bona ena hesiai taudia bona ena kamelo bona ena doniki danu hutuma herea.

Copyright information for `MEU