Genesis 38

Tamara sivaraina

Nega ta Iuda ese tadikakana e rakatanidia, ela, Adulama tauna ta, ladana Hira, dekenai e nohova. Unuseni ai ia ese Kanaan tauna ta, ladana Sua, natuna ulatona e itaia; bena e adavaia. Una hahine e mara, mero ta e abia, ladana e hatoa Ere; ma ta e abia, ladana e hatoa Onan; ma ihatatoina e abia, ladana e hatoa Sela. Una mero e vara negana ai, hahine na Kesib ai e nohova.

Iuda ese hane-ulato ta davana e heni, natuna roboana Ere adavanaai bainela; ia ladana na Tamara. A hari Ere, Iuda natuna roboana, na Iehova vairanai e kara havara, bena Iehova ese e alaia mase. Bena Iuda ese Onan e haduaia, eto, Vabu enai ba raka vareai, bavadavaia, natuna ba havaraia, kakamu ena. Bena Onan dibana mero na basie gwauraia ia natuna dainai ia na hahine enai e raka vareai, a gau be tano ai e hahebubua, natuna ta basine vara helaoreana. 10 Una kara dikana dainai Iehova ese e badu henia, e alaia mase, kakana bamona. 11 Bena Iuda ese ravana Tamara e hamaoroa, eto, Do ba lou lao, tamamu ena ruma ai ba noho vado, ela bona natugu Sela baine bada. Ena lalo-hadai korikori be Sela danu baine mase, kakana heḡereḡeredia. Taunabunai, Tamara na e lou lao. tamana ena ruma ai e nohova.

12 Nega taina vada ela, bena Sua natuna, hari Iuda e adavaia hahinena, na e mase. Bena Iuda ena lalo-hisihisi e ore ai, ia na e tore isi, Timuna ela; ena mamoe huidia e utu gabuna bunai. Ia turana Hira, tau Adulama, ese e bamoa. 13 Tamara ese ravana harina e kamonai, ia na mamoe huidia iutudia totona Timuna e laova; 14 bena ia ese ena vabu dabuadia e doki oho, vairana na dabua amo e ḡovaia, ela, Timuna dalana isena ai e helai dala katakata ai. Badina be ia vada e diba hari Sela vada e tauhau, a tamana na se haheadavadia. 15 Bena Iuda ese e itaia, banava ia na ariara hahinena eto, badina be vairana vada e ḡovaia. 16 Bena ia ese e hereva henia, eto, Mani aita eno bou. Ia na asi dibana hahine na ia ravana. Bena hahine na eto, Davagu be dahaka ba henigu? 17 Ia eto, Nani natuna ta baina henimu. Hahine na eto, Toana be dahaka ba henigu ela bona ba siaia? 18 Ia ma eto, Dahaka bavabia o tomu? Hahine na eto, Imamu kwakikwakina vaḡivaḡina bona emu gana bona emu itotohi. E henia, bena raruosi e eno bou; gabeai hahine na e rogorogo. 19 Hahine na e tore isi, ela, vairana e ḡovalaia dabuana e negea, ena vabu dabuadia e doki lou.

20 Iuda ese turana Hira e siaia, nani natuna baine laohaia, bona toa gaudia hahine vada e henia ma baine abi lou. To ia na lasihia. 21 Bena ia ese una gabu taudia e nanadaidia, eto, Hari ariara hahinena dala katakata ai e helaiva be edeseni ai? Idia eto, Ariara hahinena ta lasi iniseni ai. 22 Taunabunai, ia na Iuda dekena e lou lao, eto, Asina davaria, bona una gabu taudia e tomu ariara hahinena ta lasi unuseni ai. 23 Bena Iuda eto, Egu ḡau ia dekenai bae mia, baita hemarai garina; nani natuna na siaia, to hahinena na so davaria.

24 Hua toi vada ela, bena Iuda ese harina e kamonai ia ravana Tamara na mai bogana. Bena ia eto, A hakaua lasi, lahi ai do baine mase. 25 E hakaua lasi, bena ia ese hereva e siaia ravana enai, eto, Ini ḡau biagudia ese e harogorogogu; mani a hereva, ina ima-kwakikwaki vaḡivaḡina, ina gana, ina itotohi be daika ena? 26 Bena Iuda ese e gwauraia hedinarai, eto, Iena kara maoromaoro ese lauegu e hereaiamu, badina be natugu Sela ida asina haheadavadia. Bena ia ida se eno bou lou.

27 Ena mara negana vada e kahira-kahira, vada e diba hekapa na bogana ai. 28 Bena e mara negana ai, mero ta imana e toia lasi, bena hegwaroto hahinena ese varo kakakakana ta imana ai e kwatua, eto, Roboana binai. 29 A mero na imana ma e veria vareai, bena tadina e vara guna. Hegwaroto hahinena na eto, Oi na dala vada o lailaia. Bena ladana e hatoa Perese.
“Perese” anina be “dala ilailaina”.
30 Bena kakana e vara; ia ladana e hatoa Sera.

Copyright information for `MEU