Genesis 48

Iakob ese tubuna e hanamodia

Ini ḡau muridiai, Iosef na harina e kamonai tamana vada e gorere; bena ia ese natuna raruosi, Manase bona Efraim, e hakaudia lao. Bena haida ese Iakob e hamaoroa, eto, Natumu Iosef na oi i'itamu e maimu. Bena Israel na e haheauka, ena mahuta patana ai e helai tore. Bena Iakob ese Iosef e hereva henia, eto, Siahu-idoinai Diravana ese Lusu ai, Kanaan tanona ai, e hahedinarai henigu bona e hanamogu, eto “Momokani lau ese besemu baina havaraia, baina hahohomu, bese bada-hereana ai bainahalaomu; ina tano danu oi garamu baina henidia, edia tano ai bainela, ela bona hanaihanai”. Harihari oi natumu raruosi, oi dekemu do asinama negana ai ina Aigupto ai e vara memerodia na lau natugu ai baela; Ruben bona Simeon na lau natugu heḡereḡerena, idia danu lau natugu ai baela. A idia muridiai bae vara memerodia na oi natumu; kakadia bae nemaidia bona ahudia bae abi. A lau be Padan amo nama negana ai Rahela na dala ai e mase, Kanaan tanona Efrata ai do asita kau ai. Bena Efrata dalana badinai na guria: una gabu ladana ta be Betelehem.

Bena Israel ese Iosef natuna e haḡeredia, eto, Ini be daidia? Iosef ese tamana e haere henia, eto, Ini be lau natugu, Dirava ese vada e henigu ina tano ai. Tau buruka eto, Bae raka kahira, bena baina hanamodia. 10 Israel vada e buruka dainai ia matana vada e valahuvalahu, ḡau se ita ḡoeva. Taunabunai e boiridia, bae raka henia kahi; bena e harahudia bona e rosidia. 11 Bena Israel ese Iosef e hamaoroa, eto, Lau banava nato oi vairamu basina itaia lou, to Dirava ese e bogagu hisi dainai oi bona natumu vada na itamui. 12 Bena Iosef ese memero raruosi na tubudia tuina padadia amo e abidia, bena ia na tano ai e goru diho. 13 Bena Iosef ese raruosi e abidia; imana idibana amo Efraim e abia, Israel laurina kahana ai e atoa, bona imana laurina amo Manase e abia, Israel idibana kahana ai e atoa. 14 Bena Israel na imana idibana e haroroa, Efraim, tau-muritai, tubuana ai e atoa kau, bona imana laurina e haroroa, Manase, tau-guna tubuana ai e atoa kau. Mai ena laio-hadai dainai imana ruaosi unu e toiroro hanai toma. 15 Bena ia ese Iosef e hanamoa, eto,

Tubugu Abraham bona tamagu Isaak e toma henia dihova Diravana,
Egu mauri dinadia iboudiai ema harihari vada e regugu Diravana,
16 Dika iboudiai amo vada e hamaurigu aneruna,
Ia ese ini memero baine hanamodia;
Lau ladagu, bona tubugu Abraham ladana, bona tamagu Isaak ladana, bae nemaidia;
Bese badana ai baela tanobada ai.
17 A Iosef na e itaia tamana ese imana idibana Efraim tubuana ai e atoa kau, bena lalona e hekwakwanai. Bena tamana imana e abia, Manase tubuana ai baine atoa kau eto. 18 Iosef eto, Tamagu e, dia eneheto, badina be ina na tau-guna; imamu idibana be ia tubuana ai bavatoa kau. 19 A tamana na se ura, eto, Natugu e, mai dibagu na karaiamu: momokani, ia be bese badana ta baine havaraia, to tadina ese baine hereaia, bese bada-hereanabaine havaraia. 20 Taunabunai ia ese e hanamodia una dina ai, eto,

Umui be hahenamo toana ai bae halaomui Israel ai, baeto,
Dirava ese baine hanamomui, Efraim bona Manase bamodia.
Unu amo ia ese Efraim na tau-guna ai Manase tau-muritai ai e halaodia.

21 Bena Israel ese Iosef e hamaoroa, eto, Egu mase vada eme kahikahi; a Dirava ese baine bamomui, bona baine hakaumui lou, tubu tama edia tano ba lou henia. 22 Oi ahumu danu name henimu, tadikakamu iboudiai ahudia e hereadiamu: Sekem bunai, Amoro taudia edia amo na abia, egu dare bona egu peva goadadia ai.

Copyright information for `MEU