Genesis 5

Adam garana

Adam besena karoana binai. Dirava ese taunimanima e karaia dinana ai ia ese Dirava ida-idana ai e karaia. Maruane bona hahine e karadia, ladadia e hato Taunimanima; e karadia dinana ai danu e hanamodia. Adam ena mauri laḡanidia na sinahu-ta toi-ahui negana ai, ia ese natuna ta e havaraia, ia ida-idana ai bona ia heḡereḡerena ai; bena ladana e hatoa Set. Set e vara murinai Adam ma laḡani sinahu-taurahani e mauri nohova, natuna mamaruanedia bona hahinedia e havaradia. Adam ena mauri laḡanidia iboudiai na sinahu-taurahani-ta toi-ahui: bena e mase.

Set ena mauri laḡanidia na sinahu-ta dikoana ima negana ai, ia ese Enos e havaraia; bena Enos e vara murinai Set na laḡani sinahu-taurahani dikoana hitu e mauri nohova, natuna mamaruanedia bona hahinedia e havaradia. Set ena mauri laḡanidia iboudiai na sinahu-taurahani-ta gwautarua: bena e mase.

Enos ena mauri laḡanidia na taurahani-ta-ahui negana ai, ia ese Kenan e havaraia; 10 bena Kenan e vara murinai Enos na laḡani sinahu-taurahani gwauta-ima e mauri nohova, natuna mamaruanedia bona hahinedia e havaradia. 11 Enos ena mauri laḡanidia iboudiai na sinahu-taurahani-ta dikoana ima: bena e mase.

12 Kenan ena mauri laḡanidia na hitu-ahui negana ai, ia ese Mahalalel e havaraia; 13 bena Mahalalel e vara murinai Kenan na laḡani sinahu-taurahani hari-ahui e mauri nohova, natuna mamaruanedia bona hahinedia e havaradia. 14 Kenan ena mauri laḡanidia iboudiai na sinahu-taurahani-ta bona gwauta: bena e mase.

15 Mahalalel ena mauri laḡanidia na tauratoi-ahui ima negana ai, ia ese Iared e havaraia; 16 bena Iared e vara murinai Mahalalel na laḡani sinahu-taurahani toi-ahui e mauri nohova, natuna mamaruanedia bona hahinedia e havaradia. 17 Mahalalel ena mauri laḡanidia iboudiai na sinahu-taurahani taurahani-ta-ahui ima: bena e mase.

18 Iared ena mauri laḡanidia na sinahu-ta tauratoi-ahui rua negana ai, ia ese Enok e havaraia; 19 bena Enok e vara murinai Iared na laḡani sinahu-taurahani e mauri nohova, natuna mamaruanedia bona hahinedia e havaradia. 20 Iared ena mauri laḡanidia iboudiai na sinahu-taurahani-ta tauratoi-ahui rua: bena e mase.

21 Enok ena mauri laḡanidia na tauratoi-ahui ima negana ai, ia ese Metusela e havaraia. 22 Metusela e vara murinai Enok na Dirava ida e hebamo heheniva ela bona laḡani sinahu-toi e ore; natuna mamaruanedia bona hahinedia danu e havaradia. 23 Enok ena mauri laḡanidia na sinahu-toi tauratoi-ahui ima; 24 ia na Dirava ida e hebamo heheniva, murinai tau ta ese se itaia lou, badina be Dirava ese e abia.

25 Metusela ena mauri laḡanidia na sinahu-ta taurahani-ahui hitu negana ai, ia ese Lamek e havaraia; 26 bena Lamek e vara murinai Metusela na laḡani sinahu-hitu taurahani-ahui rua e mauri nohova, natuna mamaruanedia bona hahinedia e havaradia. 27 Metusela ena mauri laḡanidia iboudiai na sinahu-taurahani-ta tauratoi-ahui taurahani-ta: bena e mase.

28 Lamek ena mauri laḡanidia na sinahu-ta taurahani-ahui rua negana ai, ia ese natuna ta e havaraia, 29 ladana e hatoa Noa.
“Noa” anina be “Laga-ani”.
Ia eto, Iehova ese vada e hadikaia tanona amo ina mero ese baine harohoda mauri, imada ḡaukaradia bona eda hekwarahi amo baita laḡa ani.
30 Noa e vara murinai Lamek na laḡani sinahu-ima taurahani-ta-ahui ima e mauri nohova, natuna mamaruanedia bona hahinedia e havaradia. 31 Lamek ena mauri laḡanidia iboudiai na sinahu-hitu hitu-ahui hitu: bena e mase.

32 Noa ena mauri laḡanidia na sinahu-ima negana ai, ia ese Sem bona Ham bona Iafet e havaradia.

Copyright information for `MEU