Haggai 1

Hagai ena hahegoada herevadia

King Darauese ena lohia laḡanina iharuana lalonai, hua ihatauratoina dinana gini-gunana ai, Iehova ena hereva na peroveta tauna Hagai ena amo e hedinarai, Serubabele Sealtiele, Iuda lohiana, bona Iosua Iehosadak, hahelaḡa tauna badana, ediai e kau, eto, Iehova Sabaota na ini e gwau tomamu: Ini taunimanima na e tomu Iehova ena dubu ihagini-louna negana na do se kau. Bena Iehova ena hereva na peroveta tauna Hagai ena amo e kau, eto, Ina na emui ruma hairaidia lalodiai o nohomu negana a? A ina dubu be heḡiḡi-dobina ai mia. Taunabunai Iehova Sabaota na ini e gwau tomamu: Dahaka dahaka emui ai vada e vara na ba haeroa. Emui hadohado na bada, to emui taboro anina na maragi; o anianimu, to bogamui asie kunumu; ranu o inumu, to gadomui asie doromu; dabua o hahedokilaimu, to ta tauna se lomu. Moni ḡaukaradia e karamu tauna ese ena ḡaukara davana e abiamu, bena puse mai matumatuna lalonai e udaiamu. Iehova Sabaota ini e gwau tomamu: Dahaka dahaka emui ai vada e vara na ba haeroa. Ororo ai ba dara dae, au ba mailai, dubu ba haginia, baina moalelaia bona mai hairaigu ida baina hedinarai helaoreana. Iehova na e herevamu. Ḡau momo o tahu, matogana, sisina mo o davaria; bena o mailaia negana ai lau ese na hiriria oho. Iehova Sabaota na e henanadaimu, e tomu, Dahaka dainai? Badina be egu dubu na e heḡiḡi dobimu, a umui ese ta ta ena ruma ena ruma o ḡaukaralaidiamu. 10 Una dainai guba daemui ai ese hunu vada e rua, bona tano ese anina vada e rua. 11 Lau ese doe vada na gwauraia, taora bona ororo latadiai, bona uit bona vine ranuna bona dehoro bona tano anidia iboudiai latadiai, bona taunimanima bona boromakau bona edia hekwarahi idoinai latadiai.

12 Bena Serubabele Sealtiele bona hahelaḡa tauna badana, Iosua Iehosadak, bona taunimanima kwabukwabudia iboudiai ese Iehova, edia Dirava, gadona bona peroveta tauna Hagai, Iehova, edia Dirava, ese e siaia tauna, ena hereva danue kamonai; bena taunimanima na Iehova vairanai e gari. 13 Bena Hagai, Iehova ena gwaukau tauna, ese Iehova ena gwaukau herevana na taunimanima e hamaorolaidia, eto, Iehova na e tomu: Lau na umui ida. 14 Bena Iehova ese Serubabele Sealtiele, Iuda lohiana, bona Iosua Iehosadak, hahelaḡa tauna badana, bona taunimanima kwabukwabudia iboudiai na lalodia e hasiahudia; bena idia na ela, Iehova Sabaota, edia Dirava, ena dubu e ḡaukaralaia, 15 hua ihatauratoina dinana iharuahui-hanina ai, King Darauese ena lohia laḡanina iharuana lalonai.

Copyright information for `MEU