Hebrews 10

Dala matamatana

Taravatu na ḡau namodia bae vara laulaudia mo, dia ḡau korikoridia. Idia ese hari boubou ḡaudia laḡani laḡani e hahelaḡamu. To taravatu na asi goadana ia ese e raka kahi maimu taudia baine hanamodia ḡuḡuru. Bema mai goadana, boubou ḡaudia ihahelaḡadia na bema doko, ani? Badina be toma-diho taudia bema ḡoeva vaitani, idia na kara dika basiema lalo lou. A unu boubou lalodiai idia ese laḡani ta ta amo edia kara dika e helalolai loulou. Badina be boromakau mamaruanedia raradia bona nani raradia ese kara dika basie abi oho diba.

Taunabunai, Keriso na tanobada ema, eto,

Helaḡa karadia bona boubou ḡaudia so uramu,
A tau-anina ta vada o abia heḡaeḡae lauegu;
Lahi ese e gole oho ḡaudia bona kara dika iabi-ohodia ḡaudia so moalelaimu.
Bena nato “Lau o ina,
Taravatu bukana ai e torelaigu heḡereḡerena
Dirava e, emu ura ikarana totona nama”.
Ena hereva gini-gunana eto, Helaḡa karadia bona boubou ḡaudia bona lahi ese e ḡole oho ḡaudia bona kara dika iabi-ohodia ḡaudia so uramu bona so moalelaimu. Ḡau tamona idia ese taravatu heḡereḡerena ai vada e hahelaḡamu. Ma eto, Lau o ina, emu ura ikarana nama. Gini-gunana e abia ohomu, iharuana baine haginia helaoreana. 10 Una ura ese vada e hahelaḡada, Iesu Keriso tau-anina nega tamona mo boubou ḡauna ai vada e halaoa dainai.

11 Hahelaḡa taudia iboudiai dina ta ta amo e ginimu, helaḡa karadia e karamu, boubou ḡaudia tamodia e hahelaḡa louloumu. Ḡau tamona, unu helaḡa ḡaudia ese kara dika basie abi oho diba. 12 A Keriso ese boubou ḡauna tamona vada e hahelaḡaia, kara dika iabi-ohodia; bena Dirava idibana kahana ai vada e helai diho. 13 Una negana ema vada e henarimu, ela bona ia inaina na aena ihadaidia ḡaudia ai baine halaodia. 14 Badina be boubou ḡauna tamona amo ia ese e hahelaḡadiamu taudia na vada e haḡoevadia ḡuḡuru ela hanaihanai. 15 Lauma Helaḡa danu vada e hadibalaida; badina be ia eto,

16 Lohiabada na e gwaumu: Unu dina muridiai,
Ina tarava idia ida baina atua;
Egu haheḡani na kudoudia ai baina ato,
Lalodia ai baina tore.
17 Ma eto,

Edia kara dika bona edia kara havara basina lalo tao.
18 A unu kara bae gwaudia tao, kara dika iabi-ohodia ḡaudia bae hahelaḡa na asi badina.

19 Taunabunai, varavaragu e, asi eda daradara Helaḡa Herea gabuna lalonai baita raka vareai, Iesu rarana dainai. 20 Ia ese dala matamatana, mauri dalana, vada e kehoa ita eda; seseahu e hanaiamu, ia tau-anina bunai. 21 Ita na mai eda hahelaḡa tauna badana, Dirava ena ruma ita-taona. 22 Taunabunai, baita raka kahira mai laloda momokanidia ida bona mai kamonai lava-daena ida. Laloda na vada eme nevari; lalo-hadai dikadia vada eme heabi oho, tau-anida danu ranu negari-negari ai vada eme hehuri ḡoevaḡoeva. 23 Eda helaro herevadia baita kahu tarika-tarika, basita raivaraiva, badina be e gwaurai hamata tauna ena gwauhamata na momokani. 24 Baita helalolai heheni, bena baita hahealo heheni, Ialokau bona kara namodia baita havara. 25 Eda hegogo karadia danu basita nege, haida ese e nege heḡereḡerena, a baita hahealo heheni; oibe, ina kara baita habadaia, badina be, o itaiamu, dina badana eme kahikahi.

26 Badina be hereva momokani vada ta diba vaitani murinai ma baita kara havara, boubou ḡauna ta dia mia eda kara dika iabi-ohodia; 27 a hahemaoro inarina mo mia, mai gari-badana ida, bona lahi danu mia, Dirava inaina baine aradia ore. 28 Tau ta ese Mose ena taravatu e tataia utumu, bena dibadia taudia rarua eiava tatoi ese e gwauraia hedinaraimu, una tau na baine mase, basie bogaia hisi. 29 Ede o laloa tomamu? Dirava Natuna vada e moia tao; bona herohemaino rarana, e hahelaḡaia ḡauna, na asi ena helaḡa ḡauna ai vada e halaoa; bona Harihari-bada Laumana vada e taoa tari tauna, na davana ede baine bada toma? 30 Badina be ita dibada daika eto “Dava ikarana be lau; lau ese dava baina heni”. Ma eto “Lohiabada ese ena bese taudia baine hahemaoro henidia”. 31 Mauri Diravana imana ese baine butuda tao na mai garina.

32 Nega gunadia ba helalolai: Ialomui e diariva murinai hisihisi momo ese e butumui taova, a o haheaukava. 33 Nega haida e lodu henimui bona e daḡedaḡe henimui; ma nega haida unu e karadia toma taudia na o bamodia. 34 Badina be e ḡuidia taudia o bogadia hisi, bona emui kohu e dadi negadia ai edia kara o abi dae mai moalemui ida; badina be dibamui emui kohu namo-hereana na mia hanaihanai. 35 Taunabunai, emui boga auka basio negea; ia davana baine bada. 36 Badina be emui haheauka badina binai: Dirava ena ura ba karaia ḡuḡuru, bena gwauhamata anina do bavabia.

37 Badina be asi vanahana
Bainema tauna do bainema, basine halahe;
38 A kara maoromaoro tauna na ena kamonai dainai do baine mauri;
To baine raka kerehai tauna na laumagu ese basine moalelaia.
39 A ita na dia raka-kerehai tauda, dia boio tauda; ita na kamonai tauda, laumada na do bae mauri.

Copyright information for `MEU