Hebrews 8

Taravatu matamatana

Ai ese vada ame gwaurai herevadia anidia bini: ita na mai eda hahelaḡa tauna badana, Herea Mikamika Diravana ena terono idibana kahana ai vada e helaimu, guba ai. Ia na helaḡa ḡaudia bona ḡuriḡuri kalagana korikori ireḡudia tauna: una kalaga na taunimanima ese asie taruhaia, a Lohiabada ese e taruhaia.

Hahelaḡa taudia badadia iboudiai vada e duanaidia, herahia ḡaudia bona boubou ḡaudia bae boudia; taunabunai, ina hahelaḡa tauna badana danu mai ena herahia ḡauna. Tanobada ai bema noho, ia na hahelaḡa tauna ai basinema lao; badina be hahelaḡa taudia haida nonoho, idia ese boubou ḡaudia e hahelaḡamu, taravatu heḡereḡerena. Idia edia ḡaukara na guba ai e karamu ḡaukarana ihaheḡereḡerena bona laulauna mo. Dirava ese Mose e tamanua na heto, ḡuriḡuri kalagana baine karaia negana ai; eto, Nahuamu ba tohoa, ḡau iboudiai ba kara, ororo ai na haheitalaimu ḡaudia oromadia heḡereḡedia. A harihari Keriso ese hereḡu dagina hereana vada e abia, dagi gunadia e hereadiamu; ina na iena herohemaino ese taravatu gunana e hereaiamu heḡereḡerena, badina be gwauhamata hereadia latadiai e hadaia dainai.

Badina be taravatu gunana bema asi kererena, iharuana bema asi badina. A Dirava ese kereredia e gwaurai, eto,

Lohiabada na e gwaumu, dina vada be maimu,
Taravatu matamatana do baina karaia, Israel besena ida
Bona Iuda besena ida;
Dia senedia ida na karaia taravatuna heḡereḡerena,
Imadia na abi dinana ai,
Aigupto tanona amo baina hakaudia lasi nato;
Badina be egu taravatu asie badinaiava,
Taunabunai na dadaraidiava;
Lohiabada na unu e gwau tomamu.
10 Lohiabada ma e gwaumu: unu dina muridiai,
Ina tarava baina atua, Israel besena ida;
Egu haheḡani na lalodia ai baina ato,
Kudoudia ai baina tore;
Edia Dirava ai bainala,
Idia danu besegu ai baela.
11 Basie hahediba heheni danu, basieto
“Lohiabada ba dibaia”,
Badina be kikina-badana iboudiai ese lau bae dibagu.
12 Badina be edia kara dikadia lalodiai baina bogadia hisi,
Bona edia kara havara basina lalo tao.
13 Taravatu matamatana iherevalaina ai, ia ese gunana na vada e ore ḡauna ai e halaoa. Bona siahuna e ore ḡauna, ḡau gunana, vada be pukimu.

Copyright information for `MEU