Hosea 6

Aoma, Iehova aita lou henia;

badina be vada e dareda, baine hamaurida helaoreana;
vada e botada, bena ia ese beroda baine kumidia.
Dina rua muridiai ia ese baine hamaurida;
dina ihatoina ai ia ese baine hatoreda isi,
ia vairanai baita mauri helaoreana.
Iehova baita dibaia,
baguda baita hololai, ia baita dibaia helaoreana;
ena raka vaira na momokani, daba na heto;
ia na dekedai bainema sisimu na heheto,
bona medu barokodia, tanobada e haparipariamu ḡaudia, na heheto.
Efraim e, ede baina karamu toma?
Iuda e, ede baina kara henimu toma?
Emui uraheni na daba orina na heto,
eiava hunu, e puki haraḡamu ḡauna, na heto.
Taunabunai, peroveta taudia imadia amo vada na dapadia,
udugu herevadia amo vada na aladia mase;
egu hahemaoro na e lasimu, diari na heto.
Badina be hebogahisi na uramu, dia boubou karadia,
Dirava idiba-ḡoevana, dia ḡole-oho bouboudia.

A Adam ai idia ese taravatu vada e tataia utu;
unuseni ai idia ese vada e koigu.
Gilead na kara dika taudia edia hanua;
vatagadia na mai raradia.
Dadidadi taudia ese tau ta e bani heniamu na heto,
hahelaḡa taudia na e haheboumu;
Sekem dalana ai idia ese taunimanima e roromadiamu,
oibe, kara dika-hereadia e karamu.
10 Israel iduhuna ai ḡau dika-rohorohona ta vada na itaia,
Efraim ena ariara karadia na unuseni ai;
Israel vada e hahemiro.

11 Iuda e, oi danu, itaboromu negana
vada e gwauraia guna.

Israel ena kara havara bona ena daḡedaḡe

Egu bese taudia edia noho-namo bama havaraia lou nato negana ai,
Copyright information for `MEU